Gaoi 3 - Tosi Tapu

Fakamauli o se tagata kito

¹ Na pale fakatasi Petelo mo Soane ki le fale tapu, i le ola o le faikole : Ko le ola tolu lena o le sili lalatea.

² Ti na i ai se tagata kito mei lona tupu, leia na aumai i aso fuli, o tuku i mua o le matapa lasi o le fale tapu, leia na igoa ko Fulumalie, o tupu ke kaiisi paaga i ai kia latou ala na ulu ki le fale tapu.

³ Ko le tagata lena, i lana tio kia Petelo mo Soane ala ka ulu ki le fale tapu, na kaiisi paaga loa kia laua.

⁴ Ti na tio fakamaumau loa Petelo mo Soane kiate ia, o pati : Tio mai kia maua.

⁵ Ti na tio tokaga a ia kia laua, o amanaki ke tali e ia se nea meia laua.

⁶ Ti na pati loa Petelo kiate ia : E leaise kau maua se paaga pe ko se aulo ; kae ko le nea leia e kau maua, e kau soli atu a ia kiate koe : I le suafa o Sesu-Kilisito mei Nasaleti, tuu ki aluga, o saele.

⁷ Ti na too loa e Petelo lona lima atamai, o fakatuu a ia ki aluga. I le temi fai lena, na makeke loa ona vae mo ona fatuvae ;

⁸ ti na sopo aifai a ia ki aluga o tuu, ti na kamata saele loa a ia. Na ulu loa a ia mo laua ki le fale tapu, o saele, mo soposopo, ti mo fakavikiviki ki le Atua.

⁹ Ti na tio loa le kakai katoa kiate ia, kua saele mo fakavikiviki ki le Atua.

¹⁰ Ti na lotou iloa ko ia leia na tonatona i le matapa Fulumalie o le fale tapu, o kaiisi paaga i ai, ti na lotou apele loa i le punamauli mo le i o tupu ko le nea kua soko kiate ia.

¹¹ Kae tupu na leaise mavae a ia ia Petelo mo Soane, na feoso ake loa le kakai katoa kia latou, i lolatou punamauli, ki le Poletike, leia na fakaigoa kia Salomone.

Masau a Petelo

¹² Ko Petelo, i lana tio ki le nea lena, na masau loa ki le kakai, o pati : Tagata Iselaele, kolea e kotou punamauli ai ki le nea leinei ? Kolea e kotou tio fakamaumau mai ai kia maua, o sakinake kua ma fakasaele le tagata leinei i loma makeke pe i loma tausi malie ki le Atua ?

¹³ Ko le Atua o Apalaamo, mo Isaake, mo Sakopo, ko le Atua o otatou tamana, kua fakakololia ia lana tagata fakasausau ko Sesu, leia na kotou fakatau mo fakafiti ki ai i mua o Pilato, i le lakaga leia na fakatotonu ai e ia ke fakamauli Sesu.

¹⁴ Kae ko koutou, na kotou fakafiti ki le Maokioki mo le Agatonu, ti na kotou kole ke fakamauli atu kia koutou se tagata tukipo.

¹⁵ Na kotou tamate le Tupuaga o le mauli, leia kua fakatuuake e le Atua mei le kau mate, ti ko le kau fakamaoki matou ki ai.

¹⁶ Ti ko lona suafa, ko le tui ki lona suafa, leia kua fakamakeke ia a ia leia e kotou tio ki ai mo iloa ia ; io, ko le tui kia Sesu leia kua soli ia ki le tagata leinei le malolo ki lona tino katoa, i mua okoutou fuli.

¹⁷ Ti ko leinei, fetaina, e kau iloa na kotou fai i le fakapouli, ti e tatau foki mo okoutou pule.

¹⁸ Kae i le nea lena kua fakasoko e le Atua le nea leia na fakasa fakatomua e ia i le gutu o ana polofeta fuli, e tonu ke mamae lona Kilisito.

¹⁹ Koia kotou fakasemala mo kotou tafoki, ke fakamolemole ai akoutou agasala,

²⁰ o tupu ke soko mai ni aso o le fakamauli mei mua o le Aliki, ti ke kakau mai e ia Sesu-Kilisito, leia na fakatuutuu e ia mei mua kia koutou,

²¹ leia e tonu ke tali e Selo o kaku ki aso o le toe fakafoou o nea fuli, leia na masau ki ai le Atua i le gutu o ana polofeta maokioki o le temi mua.

²² Na pati Moisese : Ko le Aliki lokoutou Atua e fakanofo ia loa mei okoutou fetaina se polofeta kia koutou ofaipe au ; e kotou fakalogo loa kiate ia i nea fuli ala e fakasa atu loa e ia kia koutou,

²³ ti ko leia e leaise fakalogo loa ki le polofeta lena, e motusi loa a ia mei lotomalie o lona kakai.

²⁴ Io, na masau le kau polofeta katoa, meia Samuele ki muli, o fakasa a aso anei.

²⁵ Ko vosa koutou o le kau polofeta ti mo le fakapapau leia na fai e le Atua mo otatou tamana, i lana pati kia Apalaamo : E tapuakina loa a famili fuli o le malama nei i lou sakoga.

²⁶ Koia na fakatuu ai e le Atua lana tagata fakasausau ko Sesu kia koutou mua, ti kua kakau mai e ia a ia ke tapuaki kia koutou ki le tafoki o le tagata taki toka tasi mei ana agaveli.