Gaoi 28 - Tosi Tapu

Paulo i Malete, mo lona uuti e le gata

¹ Ti kua motou sao i le tutamaki, na motou iloa loa ko le igoa o le motu ko Malete.

² Na lasi ai le agamalie o le kakai seka lena kia matou ; talie na lotou tafu loa se afi ke fakatalitali ai matou, o tupu na ua ti na momoko.

³ I le tae e Paulo o ni vao malo ke ti ki le afi, na ulu loa mei ai se gata velo i le vevela o le afi, o piki ki lona lima.

⁴ I le tio a le kakai o le fenua ki le piki o le gata i lona lima, na lotou fepatiaki loa : E maoki ai ko le tagata leinei ko se tagata tukipo, talie na leaise loto le Faitotonu ke mauli a ia, i le oki o lona sao mei le tai.

⁵ Kae na tuui loa e Paulo le manu ki le afi, ti na leaise logoi fua e ia se mamae.

⁶ Na talitali loa le kakai lena ke fufula a ia pe mate fakaofolele a ia, kae i le fualoa o lalatou talitali, ti mo lalatou tio na leaise soko fua kiate ia se nea, na lotou fetogi manatu loa, o pati ko se atua a ia.

Fakamauli o le tamana o Pupiliusi

⁷ Na maua i ai, i tafatafa o le ganea lena, ni kele ala na fakalogo ki le pule lasi o le motu, leia na igoa ko Pupiliusi ; leia na fakatalitali malie ia matou mo fakanonofo matou i aso e tolu i lona fale.

⁸ Na moemoe le tamana o Pupiliusi talie na masaki a ia, ti na lasi ai lona fiva mo lona mamae manava. Na ulu loa Paulo ki lona fale o faikole mo teki ona lima kiate ia, o malie ai loa lona masaki.

⁹ I le logo ki le nea lena, na au loa mo la ake foki masaki o le motu, ti na fakamauli fuli loa latou.

¹⁰ Na lasi ai lalatou fai nea alofa kia matou ; ti i lamatou mavae, na lotou soli mai loa kia matou a nea fuli ala na aoga kia matou.

Kaku o Paulo ki Loma

¹¹ I le oki o lamatou nofo i ai i masina e tolu, na motou sopo loa ki se vaka mei Alekasia leia na tau i le temi momoko i le motu lena, ti na tuu ai le fakamailoga leinei, Tiosekule (ata atua).

¹² I lamatou kaku ki Silakuse, na motou nonofo loa i ai i ni aso e tolu.

¹³ Mei ai, o mulimuli i le alo o le motu, na motou kaku loa ki Lesio ; ti na malaga loa le matagi o le Saute i leia ake a aso, o aso lua fai ti motou kaku loa ki Pusole,

¹⁴ leia na motou maua ai loa ni fetaina, ti na lotou kole mai loa ke motou nonofo i ni aso e fitu mo latou. Ti na motou mavae loa i ai, o ano ki Loma.

¹⁵ Ko fetaina o le kolo lena, i lalatou maua loa ni logo o uiga mo matou, na lotou au loa o fakafelavei mai kia matou, o kaku mai ki le Folume o Apiusi ti mo le otele ko Tolu-Talevene. Ko Paulo, i lana tio loa kia latou, na fakafetai loa ki le Atua ti na toe loto makeke ai loa.

¹⁶ I lamatou kaku ki Loma, na fakataga loa kia Paulo ke nofo i sona nofoaga toka tasi, mo le tagata solia leia na leo kiate ia.

Akonaki a Paulo i Loma

¹⁷ I le sili o aso e tolu, na kalagai loa e Paulo le kau lalasi o le kau Sutea ke fakatasi ake kiate ia. I lalatou fakatasi mai, na masau loa a ia kia latou, o pati : Tagata fetaina, na leaise kau fai fua se nea ki le kakai pe ki agai fenua o tatou tamana, kae na tuku au ki le pilisoni i Selusalemi, ti na tuku au mei ai ki lima o le kau Loma.

¹⁸ I le oki o lalatou fakavesilii au, na lotou loto ke lotou fakalauatea au talie na leaise lotou maua fua iate au se nea leia e tonu ke kau mate ai.

¹⁹ Kae na fakafesagai ki ai le kau Sutea, ti na aoga loa ke kau tagi kia Sesale, kae na leaise kau loto ai ke fakalakasala loku puleaga.

²⁰ Ko le tupuaga loa lena o laku kole ke kau felavei mo koutou ti ke kau masau kia koutou ; talie e tupu ko le amanaki malie a Iselaele leia e kau nofo ai mo tini anei.

²¹ Ti na lotou tali loa kiate ia : Na leikiaise motou maua se tosi mei Sutea o uiga mo koe, ti na leaise au se tasi fua i fetaina, o lauveli mai kiate koe.

²² Kae e motou fia logo meiate koe totonu pe kolea lau manatu, talie kua motou iloa le fakafesagai i ganea fuli ki le magai lotu lena.

²³ Ti na lotou fakatuutuu loa kiate ia se aso, ti na au loa se toka api o maua a ia i lona fale. Ti na fakasa loa e ia le Puleaga o le Atua kia latou, o fakamaoki, ti mo afa i le lao a Moisese mo le kau polofeta, ke lotou tio ki nea o uiga mo Sesu. Na fai loa le nea lena mei le usu o kaku ki le afiafi.

²⁴ Ti na malama loa a iki ki le nea leia na masau a ia ki ai, kae na leaise tui loa a iki.

²⁵ I lolatou mavete i le loto kesekese, na fai loa e paulo le masau leinei e tasi : E maoki ai le masau a le Laumalie Maokioki ki otatou tamana i le gutu o le polofeta ko Esaia, o pati :

Maliu o Paulo ki le kau pagani

²⁶ Ano ki le kakai lena, o pati : Ekotou logo loa i okoutou taliga, kae e leaise kotou matala loa ; Ekotou tio loa i okoutou mata, Kae e leaise kotou malama loa.

²⁷ Talie kua liliu o fefeka le loto o le kakai lena ; Kua lotou fakatulituli olatou taliga, ti kua lotou tapono olatou mata, Ke aua na lotou tio i olatou mata, Ke aua na lotou logo i olatou taliga, Ke aua na lotou matala i olatou loto, Ke aua na lotou tafoki, ti ke aua na kau fakamauli latou.

²⁸ Koia ke kotou iloa kua kakau le saofaki lena a le Atua ki le kau pagani, ti e lotou fakalogo loa ki ai.

²⁹ I le oki loa o lana fakasa le nea lena, na ano loa le kau Sutea, o fevisi makeke ia latou.

Pilisoni o Paulo i Loma i fetuu e lua

³⁰ Ti na nofo loa Paulo i fetuu katoa e lua i se fale leia na lue e ia. Na fakatalitali e ia latou fuli ala na au o fakatele mai kiate ia,

³¹ o fakasa le Puleaga o le Atua, ti mo akonaki ki nea o uiga mo le Aliki ko Sesu-Kilisito, i le lauatea katoa ti mo sala fakavisi.