Gaoi 27 - Tosi Tapu

Kakau o Paulo ki Loma

¹ Ti kua tonu loa ke motou ano vaka ki Italia, na tuku loa Paulo mo ni iki ake tagata pilisoni ki se setulio na igoa ko Suliusi, mei le kau solia a Aukusito.

² Ti na motou sopo loa ki se vaka mei Atalamite, leia na tonu ke ano i tafatafa o Asia, ti na motou ano loa mo Alisitake ko se Masetonia mei Tesalonika.

³ I leia ake a aso, na motou tau loa ki Sitone ; ti ko Suliusi, leia na tokaga fakamalielie kia Paulo, na fakataga ia loa ke ano a ia ki ona kaukau nea ti ke lotou tokaga kiate ia.

⁴ Ti na motou mavae loa i ai o fakalaka atu i le motu ko Sipele, talie na tutuu le matagi.

⁵ I le oki o lamatou fakalaka i le tai o Silisia mo Pafilia, na motou kaku loa ki Mila i Lisia.

⁶ I ai, na maua loa e le setulio se vaka mei Alekasia leia na ano ki Italia, ti na fakasopo loa e ia matou ki ai.

⁷ Ti na motou ano mamalie loa i ni aso mauke ai, ti na faigataa ai lamatou kaku o tautonu mo Kinite, kae na leaise mafai ke motou tau ki le taulaga o tupu ko le matagi. Na motou fakalaka loa i tafa o le motu ko Kelete, o tautonu ake mo le fa komo ko Salomone.

⁸ Na faigataa ai lamatou fakalaka i ai, ti na motou kaku loa ki se ganea na igoa ko Taulaga Malie, o ofi ki le kolo ko Lasea.

⁹ Ti kua sili foki se temi fualoa ai, ti kua soko loa le temi faigataa o le fai folau i le tai, talie kua oki le temi sesunio leia e malie ki le folau.

¹⁰ Koia na valoki loa e Paulo, o pati kia latou : Kau tagata, e kau tio e leaise sao loa le folau mo tutamaki ti mo maumau ; e leaise gato fua ki le uta mo le vaka, kae e toe tatau foki ki otatou mauli.

¹¹ Kae na tui lasi ake loa le setulio ki le pailate mo le kapiteni, kae leai ki masau a Paulo.

¹² Ti e tupu na leaise malie le taulaga ki le tau i ai i le temi momoko, na loto loa le toka api ke toso le taula, o asiasi ke kaku, mo kapau e feala, ki Fenisia, ko le taulaga o Kelete leia na agaaga ki le potu saute uesite ti mo le noleto uesite, o tupu ke nofo ai i le temi momoko.

¹³ Ti na kamata agi loa se ga matagi maamaa mei le potu saute, kae i lalatou pati e lotou pulei a ia, na lotou toso loa le taula, o lotou folau i tafatafa o Kelete.

Le afa

¹⁴ Kae na leaise fualoa ti na agi loa mei le motu, se matagi afa na igoa ko Elakilone.

¹⁵ Ti i le tafea o le vaka talie na leaise koi mafai le fakatau ki le matagi, na motou tuku loa ke motou tafea.

¹⁶ Na motou fakalaka loa i le saute o se ga motu na igoa ko Kalauta, ti kua pakia ai i le tataofi o le paopao ;

¹⁷ I le oki o lona siki ake ki le vaka, na motou taliu loa a ia, mo saisai a ia ki ni kapa ki le vaka. I le i na piki ia le vaka i le lauone na igoa ko Site, na tuku loa ki lalo a la. Kae motou tuku loa matou ke tafea.

¹⁸ I lomatou ta fakaveliveli e le afa, i le pogipogi ake, na motou laku loa le uta ki le tai,

¹⁹ ti i le tolu o aso na motou laku loa ki omatou lima totonu a nea gaoi o le vaka.

²⁰ Na leaise toe sa loa le laa mo fetuu i ni aso mauke ai, ti na makeke tuumau aifai le afa, o puli ai loa ia matou le amanaki malie ki le mauli.

²¹ Na leaise motou kai talu mei fualoa. Ti na tuu loa Paulo i lotomalie o latou, o pati : Kau tagata, na tonu fai ke kotou fakalogo mai kiate au, ke aua na tou mavae mei Kelete, o mafai ai loa ke aua na soko kia koutou le tutamaki mo le maumau leinei.

²² I le temi nei e kau kole kia koutou ke kotou loto makeke ; talie e leaise puli loa le mauli o se tasi fua o koutou, kae gato fai ki le vaka.

²³ Talie na fakafeofi mai kiate au i le po leinei se aselo o le Atua, leia e kau fakalogo mo tausi ki ai,

²⁴ o pati mai kiate au : Paulo, aua na ke i, talie e tonu ke ke tuu i mua o Sesale, ti ko leinei, kua soli atu e le Atua kiate koe le mauli o latou fuli ala e folau mo koe.

²⁵ Koia ei kau tagata, ke kotou loto makeke talie e kau tui ki le Atua, e soko loa ofaipe lona fakasa mai kiate au.

²⁶ Kae e tonu ke tou kaku mua ki se motu.

²⁷ I le kaku ki le kau agafulu tupu fa o po, na fetaaki matou i le tai o Atiliatike, ti na masalosalo loa le kauvaka, i le vaeluapo, kua ofi mai se kele.

²⁸ I le oki o le fua o le loloto o le tai, na lotou maua loa ko le kau tolu tupu ono meta ; ti na toe soso atu ki mamao, na lotou toe fua loa, o maua loa ko meta e kau lua tupu valu.

²⁹ I lolatou i na piki ia le vaka i le mata utua, na lotou tuku loa a taula e fa i le taumuli, ti na lotou talitali loa ke mafoa ake le ao.

³⁰ Kae na faiga loa le kau matelo ke fesolaki mei le vaka, o lotou tuku loa ki le tai le paopao, o sakinake e lotou fia tuku ki mamao a taula o le taumua.

³¹ Kae na pati loa Paulo ki le setulio mo le kau solia : Kapau e leaise nofo latou anei i le vaka, e leaise mafai ke kotou mauli.

³² Ti na tuuti loa e le kau solia a maea o le paopao, o lotou tuku loa a ia ke vilo ki le tai.

³³ I lalatou talitali ke mafoa mai le ao, na kole ake loa e Paulo kia latou fuli ke lotou kai, o pati loa a ia : Ko le kau agafulu tupu fa leinei o aso mo lakotou talitali ti mo lakotou nofo pakupaku, na leaise kotou kai fua se nea.

³⁴ Koia, e kau kole atu kia koutou ke kotou kai, talie e aoga ki lokoutou mauli, ti e leaise puli loa se fa fului ulu o se tasi fua ia koutou.

³⁵ I le oki o lana masau, na too loa e ia se pane, ti na fakafetai loa a ia ki le Atua i mua o latou fuli, o tofitofi loa e ia, ti na kamata kai loa a ia.

³⁶ Ti na lotou loto makeke fuli loa, o lotou kai loa.

³⁷ Ko lomatou api i le vaka ko tino lelau e lua mo le tino fitu tupu ono.

³⁸ I le oki o le kai, na lotou fakamaamaa loa le vaka, o laku loa le fulumeto ki le tai.

Goto o le vaka i le motu ko Malete

³⁹ I le mafoa mai o le ao, na leaise lotou iloa fua le igoa o le fenua, kae na lotou tio loa ki se ava mo se mata one, ti na lotou fakatotonu loa ke lotou fakaulu i ai le vaka mo kapau e feala.

⁴⁰ Ti na lotou tatala loa a taula o tiaki i le moana, ti na lotou veteki loa a sai o le foeuli ; ti na lotou toso loa le la o le taumuli, o lotou ano ai loa ki uta.

⁴¹ Ti na lotou felavei loa mo se tuuga one lasi i lotomalie o le ava, o pikiia ai loa le vaka ; na ulu loa le taumua i le one o mau ai le vaka, kae na maofa loa le taumuli i le makeke o galu.

⁴² Ti na loto tasi loa le kau solia ke tamate le kau pilisoni i lolatou i na kakau se tasi ia latou ki uta, o sola.

⁴³ Kae na taofi loa latou e le setulio, leia na loto ke fakamauli ia Paulo. Ti na fakatotonu loa e ia kia latou ala e poto i le kakau ke uluaki sopo ki le tai, o kakau ki uta,

⁴⁴ kae ki la ake, ke lotou ano loa ki uta i ni papa pe ko ni koga o le vaka. Ti na lotou kaku saosaoa fuli loa ki uta.