Gaoi 26 - Tosi Tapu

Masau a Paulo i mua o Akilipa

¹ Ti na pati loa Akilipa kia Paulo : Kua taga lau masau o uiga mo koe. Ti na siki loa e Paulo lona lima, o pati :

² Sau Akilipa, e kau fiafia i le aso nei i laku masau i ou mua, o uiga mo nea fuli ala na fakalakasala ai au e le kau Sutea,

³ talie e ke iloa malie a agai fenua fuli o le kau Sutea ti mo nea ala e lotou masau ki ai. E kau kole atu loa kiate koe ke ke kataki fualoa o fakalogo mai kiate au.

⁴ Ko loku mauli, mei loku ikiiki, e iloa e le kau Sutea katoa, talie na soko a ia i Selusalemi, i lotomalie o loku puleaga.

⁵ E lotou iloa talu mei fualoa, mo kapau e lotou loto ke fakamaoki ki ai, na kau mauli faliseo o mulimuli ki le maga makeke lasi o latatou lotu.

⁶ Ti ko leinei, kua fakamaaui au talie e kau amanaki malie ki le fakapapau leia na fai e le Atua ki omatou tamana,

⁷ ti e fakaamu fuli ki ai omatou faasiga e kau agafulu tupu lua, ala e tausi sosoko ki le Atua i le po mo le ao. Ko le amanaki malie lena e tupu ai, ei Aliki sau, loku fakalakasala e le kau Sutea !

⁸ Kolea ! Pe leaise feala ke tui e toe fakatuuake e le Atua le kau mate ?

⁹ Kiate au foki, na kau manatu e tonu ke kau fakafesagai fakamakeke ki le suafa o Sesu mei Nasaleti.

¹⁰ Ti na kau fai le nea lena i Selusalemi. Na kau velo ki le pilisoni se toka api o le kau sagato, i le oki o lona fakataga mai e le kau pule faisakilifisio, ti e ka tamate ni iki o latou, na kau tuku ki ai laku fakamaoki.

¹¹ Na kau tautea latou o tua lasi ai i sinakoka, ti na kau fakamakeke latou ke fatituu. I loku ita fakavale kia latou, na kau fakavelivelii latou o kaku ki kolo matapule.

¹² Koia i laku ano loa ki Tamaso o tupu ko le nea lena, ti kua kau maua le pule mo le fakataga mei le kau pule faisakilifisio,

¹³ Na kau tio loa, ei sau, i le ala i le lalatea malie, ki se malama mei lagi, leia na gigila ake i le laa, ti na takatakai ia au mo oku kau fanoga.

¹⁴ Ti na motou fetekai fuli loa ki le kele, ti na kau logo loa ki se leo leia na pati mai kiate au i le fakaepeleo : Saulo, Saulo, kolea e ke fakavelivelii ai au ? E faigataa loa kiate koe ke akasi ia a ukamea kakai o lou pule.

¹⁵ Ti na kau tali loa : Ko ai a koe, Aliki ? Ti na pati loa le Aliki : Ko au Sesu leia e ke fakavelivelii.

¹⁶ Kae, tuu ki aluga, ti ke tuu i ou vae ; talie kua kau sa atu kiate koe ke fakanofo a koe ko le tagata avelogo mo le tagata fakamaoki o nea ala kua ke tio ki ai ti mo nea ala e kau toe sa atu ai loa kiate koe.

¹⁷ Na kau filifili a koe mei lotomalie o le kakai leinei ti mo lotomalie o le kau pagani, ala e kau kakau a koe ki ai,

¹⁸ o tupu ke ke fakamavaa olatou mata, ke lotou tafoki mei le fakapouli ki le malama, mei le pule a Satana ki le Atua, ti ke lotou tali, i le tui kiate au, le fakamolemole o agasala ti mo le tofiga o fakatasi mo latou ala kua fakamaokioki.

¹⁹ Talu mei ai, sau Akilipa, na leaise kau toe patigataa ki le nea leia na sa mei lagi :

²⁰ kae na kau fakasa kia latou ala i Tamaso mua, mo latou ala i Selusalemi, mo latou ala i le fenua katoa o Sutea, ti mo le kau pagani, ke lotou fakasemala ti ke lotou tafoki ki le Atua, o fai a gaoi ala e gali mo le fakasemala.

²¹ Ko lena loa le tupuaga o loku too e le kau Sutea i le fale tapu, ti mo lalatou faiga ke tamate au.

²² Kae, i le tokoi a le Atua, koi kau mauli o kaku mai ki le aso nei, o fakamaoki i mua o le kau liliki mo le kau lalasi, kae e leaise kau sese fua i se nea fakaikiiki mei nea ala na fakasa e le kau polofeta mo Moisese e tonu ke soko,

²³ ke iloa e tonu ke mamae le Kilisito, ti ke toe tuuake a ia ko le uluaki mei le kau mate, ti e fakasa loa e ia le malama ki lotatou kakai ti mo atu puleaga.

Tali a Fesitusi

²⁴ I lana masau fenaaki ke fakamatatonu a ia, na kalaga loa Fesitusi : Paulo, kua ke valea ! Kua fakauluvale a koe e lou poto lasi.

²⁵ Ti na tali loa Paulo : E leaise kau ulu vale, ei Fesitusi malie ai ; kae e kau fakasa ni masau poto mo maoki.

²⁶ Ti kua ako e le sau a nea anei, koia e kau masau fakalauatea ai kiate ia ; talie e kau iloa e leaise fakapouli a ia ki se nea fua e tasi, talie na leaise fai fakafufu a nea anei.

²⁷ Ei sau Akilipa, pe ke tui ki le kau polofeta ?… E kau iloa e ke tui ki ai.

²⁸ Ti na pati loa Akilipa kia Paulo : Kua vave nei fua lau fakalotoi au ke kau liliu o kilisiteano !

²⁹ Ti na tali loa Paulo : Pe soko vave a ia pe soko tuvai, e kau kole ki le Atua ke aua na gato fua kiate koe, kae kia latou fuli foki ala e fakalogo mai kiate au i le aso nei, ke kotou liliu ofaipe au, kae sala fua mo tini anei !

³⁰ Na tutuu ake loa le sau ki aluga, mo le kovana, mo Pelenise, ti mo latou fuli ala na nonofo mo latou,

³¹ ti ei lalatou mavete, na lotou fepatiaki loa : Na leaise fai e le tagata leinei se nea fua e tasi ke tupu ai lona mate pe ko lona pilisoni.

³² Ti na pati loa Akilipa kia Fesitusi : Kanapau na leaise tagi le tagata leinei kia Sesale, kua tonu loa ke tuku a ia ke lauatea.