Gaoi 25 - Tosi Tapu

Paulo i mua o Fesitusi

¹ I le sili o aso e tolu ki lana kaku mai ki le fenua, na pale loa Fesitusi mei Sesalea ki Selusalemi.

² Ti na fai loa kiate ia e le kau pule faisakilifisio, mo le kau lalasi o le kau Sutea alotou tagi o uiga mo Paulo, o lotou kole loa kiate ia,

³ ke alofa ake kia latou, o fakatotonu ke aumai Paulo ki Selusalemi. Talie kua lotou teuteui se pikoi ke tamate Paulo i le ala.

⁴ Ti na tali loa Fesitusi ke pilisoni fai Paulo i Sesalea, ti ko ia totonu foki kua vave fua lana toe ano ki ai.

⁵ Ti na toe pati loa a ia : ke ifo mo au latou ala e mauiga ia koutou, ti kapau e maua se sala i le tagata lena, ti ke lotou fakasa loa a ia.

⁶ Ti na nofo loa Fesitusi mo latou i ni aso fai e kau agafulu, ti na ano loa a ia ki Sesalea. I leia ake a aso, na eke loa a ia i le telepinale, ti na fakatotonu loa e ia ke taki ake Paulo.

⁷ I le kaku mai a Paulo, na takatakai loa a ia e le kau Sutea leia na au mei Selusalemi, ti na lotou tuku loa kiate ia ni sala mamafa mauke ai, kae na leaise mafai fua ke lotou maua ni olatou fakamaoki.

⁸ Ti na pati loa Paulo o uiga mo lona puipui : Na leaise kau sala fua i se nea e tasi ki le lao a le kau Sutea, pe ki le fale tapu, pe kia Sesale.

⁹ Kae i lona fia mata malie ki le kau Sutea, na tali loa Fesitusi kia Paulo : Pe ke loto ke ke pale ki Selusalemi ke fakamaaui ai a koe o uiga mo nea ana i oku mua ?

Tagi a Paulo kia Sesale

¹⁰ Ti na tali loa Paulo : E kau tuu nei i mua o le telepinale a Sesale, leia e tonu ke kau fakamaaui ai. Na leaise kau fai fua se sala ki le kau Sutea, ti e ke iloa malie a ia, e koe totonu.

¹¹ Kapau na i ai ni aku sala, pe na kau fai se nea leia e tonu ke kau mate ai, e leaise kau fakafiti ki le mate ; kae kapau e leaise nea fua e maoki i nea ala e lotou tuku kiate au, e leaise tonu loa ke tuku au e se tasi kia latou. E kau tagi loa kia Sesale o uiga mo nea anei.

¹² Koia, i le oki o lana felogoi mo le kau fono, na tali loa Fesitusi : Kua ke kalaga kia Sesale, e ke ano loa ki mua o Sesale.

Fakasa o Paulo e Fesitusi kia Akilipa

¹³ I le sili o ni iki a aso, na kaku ake loa ki Sesalea le sau ko Akilipa mo Pelenise, o fakafelavei kia Fesitusi.

¹⁴ I le fualoa o lala nofo i ai, na fakasa loa e Fesitusi ki le sau le anoaga o Paulo, o pati : Na tuku e Felise se tagata pilisoni,

¹⁵ ti i laku nofo i Selusalemi, na tagi mai kiate au le kau pule faisakilifisio mo le kau fakamatuatua o le kau Sutea, ke tamate a ia.

¹⁶ Ti na kau tali loa kia latou, e leaise ko le agamasani a le kau Loma ke tuku ke tamate se tagata, kae e leikiaise tuu a ia i mua o latou ala e fakalakasala ia a ia, ti ke tuku kiate ia se faigamalie ke saofaki ai a ia mei le nea leia e fakalakasala ai.

¹⁷ Ti na lotou au loa ki leinei, ti i leia ake fai a aso, na kau eke loa ki loku nofoaga i le telepinale, ti na kau fakatotonu loa ke aumai le tagata lena.

¹⁸ Ti na au loa latou ala na fakalakasala ia a ia, kae na leaise lotou tuku fua kiate ia se sala e tasi i nea ala na kau amanaki ki ai ;

¹⁹ ti na lotou visi loa mo ia o uiga tafito mo lalatou lotu, ti mo se Sesu leia na mate, ti na fakasa e Paulo e mauli.

²⁰ I le visi o nea ana kiate au, na kau vesili loa ki le tagata lena pe fia ano a ia ki Selusalemi ke fakamaaui ai o uiga mo nea ana.

²¹ Kae na tagi mai loa Paulo ke fakamaaui a ia i mua o Sesale, ti na kau fakatotonu loa ke leoleo a ia o kaku ki laku kakau a ia kia Sesale.

²² Ti na pati loa Akilipa kia Fesitusi : E kau loto foki ke kau logo ki le tagata lena. Ti na tali loa Fesitusi : I apogipogi, e ke logo loa kiate ia.

Teuteu a Akilipa ke logo kia Paulo

²³ Koia, i leia ake a aso, na au loa Akilipa mo Pelenise mo ni kofu fakaalialiki, o ulu ki le kogafale fai fakamaau, mo le kau pule solia, ti mo le kau lalasi o le kolo. Na fakatotonu loa e Fesitusi ke aumai Paulo.

²⁴ Ti na pati loa Fesitusi : Sau Akilipa, mo koutou fuli ala e nonofo mo matou i leinei, kua kotou tio ki le tagata leia na tupu ai le au o se kau Sutea toka api ai kiate au i Selusalemi ti mo leinei foki, o kalaga e leaise koi tonu a ia ke mauli.

²⁵ Kiate au, na leaise fai e ia se nea fua leia e tonu ke mate ai, kae kua tagi a ia totonu kia Sesale, ti kua kau fakatotonu ke ave a ia kiate ia.

²⁶ Ti e leaise kau maua se nea leia e tonu ke kau tosi kia Sesale o uiga mo ia ; ko le tupuaga lena o laku aumai a ia ki okoutou mua, kae tafito ki ou mua, sau Akilipa, o tupu ke kau maua se nea ke tosi, mo ka oki loa lona fakavesilii.

²⁷ Talie e mata galivale kiate au laku kakau se tagata pilisoni kae e leaise kau fakasa le tupuaga o lona fakalakasala.