Gaoi 24 - Tosi Tapu

Paulo i mua o le kovana ko Felise

¹ I le sili o aso e lima, na kaku ake loa le pule faisakilifisio ko Ananiasi mo ni kau fakamatuatua, mo se tagata poto masau na igoa ko Teletule. Na lotou tagi loa ki le kovana kia Paulo.

² Ti na kalagai loa Paulo, ti na kamata fakalakasala loa a ia e Teletule, o pati :

³ Agai o Felise, e ke soli kia matou se tokamalie lasi ai, ti kua maua e le puleaga leinei ni nea malilie ai o tupu ko lau pule fakapoto tuumau aifuai ; ti e motou fakamaoki ki le nea aia i nea fuli mo potu fuli i se loto fakafetai katoa.

⁴ Kae, o tupu ke aua na taofi fualoa a koe, e motou kole atu kiate koe ke ke fakalogo mai, i lou agamalie, ki le nea leia e matou fia fakasa kiate koe i ni ga kupu teiki fua.

⁵ Na motou maua le tagata leinei, leia ko se taumasaki veli, leia e fakatupu ia ni maveuveu i le kau Sutea katoa o le malama nei, leia ko le pule o le magai lotu o le kau Nasaleti,

⁶ leia foki na faiga ke fakakelekele ia le fale tapu. Ti na motou too a ia ti na motou loto ke fakamaaui a ia o mulimuli ki lamatou lao,

⁷ kae na au loa le pule lasi o le solia ko Lisiasi, o too fakamakeke a ia mei omatou lima,

⁸ kae fakatotonu e ia kia latou ala na fakalakasala ia a ia ke au kiate koe. E feala loa kiate koe totonu, mo ka ke fakavesilii a ia, ke ke iloa a nea fuli ala e motou fakalakasala ai a ia.

⁹ Ti na fakamaoki loa le kau Sutea ki le masau a Teletule, o lotou pati e maoki fuli a nea ana.

Masau a Paulo i mua o Felise

¹⁰ I le fakataga ake loa e le kovana kiate ia ke masau, na tali loa Paulo : E kau iloa, e ke tui fakamaau ki le puleaga leinei talu mei ni fetuu mauke ai, koia e kau masau loa i le fanaki i ou mua, o uiga mo loku puipui.

¹¹ E leikiaise fakalaka ni aso e kau agafulu tupu lua, e mafai ke ke iloa le nea lena, na kau pale ki Selusalemi o atolasio.

¹² Ti na leaise lotou maua au i le fale tapu, pe i se sinakoka, pe i le kolo, e kau masau mo se tasi, pe kau fakatupu ia se maveuveu i le kakai.

¹³ Ti e leaise mafai ke lotou fakamaoki ki le nea leia e lotou fakalakasala ai au i le aso nei.

¹⁴ E kau fakasa fakalauatea i ou mua le nea leinei : E kau tausi ki le Atua o oku tamana o mulimuli ki le ala leia e lotou fakaigoa ko se lotu mavae, kae e kau tui ki nea fuli ala e tosi i le lao ti mo le kau polofeta,

¹⁵ ti e kau maua i le Atua le amanaki malie leinei, leia e lotou maua foki e latou anei, e i ai loa se toe tuuake o le kau agatonu mo le kau lee agatonu.

¹⁶ Ti e kau faiga ke kau maua tuumau se loto mea i mua o le Atua mo mua o le tagata.

¹⁷ I le oki o laku puli i ni fetuu mauke ai, na kau au loa o fai ni nea alofa ki loku puleaga, ti mo fai ni moliga.

¹⁸ Ti na maua loa au e ni iki Sutea o Asia, na kau lolotoga fai a lekula o loku fakamea i le fale tapu, ti na leaise kau nofo mo ni kakai kese, pe na kau fakatupu ia se maveuveu.

¹⁹ Ko latou loa ana na tonu ke au ki ou mua ti ke lotou fakalakasalai au, mo kapau na lotou maua ia se nea iate au.

²⁰ Ti ko latou anei, ke lotou fakasa pe kolea le nea veli leia na lotou maua iate au, i le temi leia na kau tuu ai i mua o le fono lasi,

²¹ na saga fai ko le kalaga leia na kau fai i lotomalie o latou : E tupu ko le toe tuuake o le kau mate, leia e kau tuu ai i mua o koutou.

²² Ko Felise, leia na malama malie ki le anoaga o le akonaki lena, na toe solo atu loa ki muli le fakamaau, o pati : E kau tioi loa le nea lena, mo ka kaku mai loa le pule solia ko Lisiasi.

²³ Ti na fakatotonu loa e ia ki le setulio ke leoleo Paulo, o tuku kiate ia ke evaeva, ti ke aua na taofi ona kaukau nea ke tausi kiate ia.

Fakaloa e Felise o le pilisoni o Paulo i Sesalea

²⁴ I le sili o ni iki a aso, na au loa Felise mo lana avaga ko Tulusila, leia ko se fafine Sutea, ti na kalagai loa e ia Paulo. Na fakalogo loa a ia kae masau loa Paulo ki le tui kia Kilisito.

²⁵ Kae i le masau a Paulo ki le faitotonu, mo le oli veli, ti mo le fakamaau fakamuli, na lulu loa Felise, o pati kiate ia : Ano, kua feauga le aso nei ; ka kau toe maua loa se tasi faigamalie, ti e kau toe kalagai atu loa a koe.

²⁶ Talie na amanaki a ia e soli ake loa e Paulo se paaga kiate ia ; koia leia na tautau kavelogo ai a ia ke au ke la lakupati.

²⁷ Kae i le oki o fetuu e lua, na fetogi loa Felise e Polisiusi Fesitusi. I le fia mata malie a Felise ki le kau Sutea, na tuku loa e ia Paulo i le pilisoni.