Gaoi 23 - Tosi Tapu

¹ I le tio fakamaumau a Paulo ki le kau fono, na pati loa a ia : Tagata fetaina, e iloa e loku loto na kau saele mea i mua o le Atua o kaku mai ki le aso nei…

² Ti na fakatotonu loa e le pule faisakilifisio ko Ananiasi kia latou ala na tutuu i ona tafa ke paai lona gutu.

³ Ti na pati loa Paulo kiate ia : E taai loa a koe e le Atua, paa pena tea ! E ke ekeeke ke fakamaaui au, o mulimuli ki le lao, ti e ke maumaui le lao, o fakatotonu ke paai au !

⁴ Ti na pati loa latou ala na nonofo i ona tafa : E ke tauvele ki le pule faisakilifisio a le Atua !

⁵ Ti na pati loa Paulo : Na leaise kau iloa, fetaina, ko le pule faisakilifisio a ia ; talie e tuu i le tosi : E leaise ke masau veli loa ki le pule o lou kakai.

Fakasa e Paulo e faliseo a ia

⁶ Ko Paulo, i lana iloa ko le tasi vaega o le fakatasi ko le kau Satuseo ti ko leia ake ko le kau faliseo, na kalaga loa i le fono lasi : Tagata fetaina, e kau faliseo, vosa o se faliseo ; e fakamaaui au o tupu ko le amanaki ki le toe tuuake o le kau mate.

⁷ I lana fakasa le nea lena, na visi loa le kau faliseo mo le kau Satuseo, ti na vaelua loa le kakai.

⁸ Talie na pati le kau Satuseo e leaise toe tuuake, ti e leai ni aselo mo ni laumalie, kae na tui ki nea ana le kau faliseo.

⁹ Na toe asilisili ake loa le taukalaga, ti na tuu ake loa ki aluga ni sekelipa i le fetuuga o le kau faliseo, o kamata ia se visi lasi, o pati : E leaise motou maua fua se nea veli i le tagata leinei ; na saga na masau kiate ia se laumalie pe ko se aselo.

¹⁰ I le tupu o le visi o lasi, na i loa le pule lasi o le kau solia, na lotou sae ia Paulo, ti na fakatotonu loa e ia ki le kau solia ke ifo o too ake Paulo meia latou, o ave ki le fale solia.

Sa o le Atua kia Paulo

¹¹ I leia ake a po, na sa loa le Aliki kia Paulo, o pati : Ke ke loto makeke ; talie, ofaipe lau fakamaoki kiate au i Selusalemi, e tonu foki ke ke toe fakamaoki i Loma.

Fono a le kau Sutea ke tamate Paulo

¹² I le mafoa mai o le ao, na kauakii loa e le kau Sutea se nea veli, ti na lotou fakapapau loa ke aua na lotou kai pe inu i mua o le tamate o Paulo.

¹³ Na tino fa tupu latou ana na kauakii ia le nea lena,

¹⁴ ti na lotou ano loa ki le kau pule faisakilifisio mo le kau fakamatuatua, o pati kia latou : Kua motou fakapapau ke aua na motou kai mo inu i mua o le tamate o Paulo.

¹⁵ Ti ko leinei, ke kotou fakatasi mo le fono lasi o kole ki le pule lasi o le solia, ke aumai Paulo ki okoutou mua, o sakinake ke kotou fia iloa maoki lona anoaga totonu ; ti ko matou, i mua o lana fakaofi, e motou teuteu o tamate a ia.

¹⁶ I le logo a le tama o le tuagaane o Paulo ki le puleaki fakapikoi lena, na ano loa a ia o ulu ki le fale solia, o fakasa le nea lena kia Paulo.

¹⁷ Ti na kalagai loa e Paulo se tasi o le kau setulio, o pati kiate ia : Taki le tupulaga leinei ki le pule lasi, talie e fia fakasa e ia kiate ia se nea.

¹⁸ Ti na too loa e le setulio le tupulaga, o taki ki le pule solia, o pati : Na kalagai au e le tagata pilisoni ko Paulo, ti na kole mai e ia kiate au ke kau taki mai kiate koe le tupulaga leinei, talie e fia fakasa atu e ia kiate koe se nea.

¹⁹ Ti na too loa e le pule solia le tupulaga i lona lima o taki kese, ti na vesili loa a ia kiate ia : Kolea le nea leia e ke fia fakasa mai kiate au ?

²⁰ Ti na tali loa a ia : Kua loto tasi le kau Sutea ke kole atu kiate koe, ke avake Paulo apogipogi ki mua o le fono lasi, o sakinake ke lotou fia iloa maoki lona anoaga totonu.

²¹ Aua na ke tali lalatou kole, talie kua lama a ia e se tino fa tupu o latou, ala kua fakapapau ke aua na kai pe inu i mua o le tamate o Paulo ; i le temi nei kua lotou tokamalie, ti e lotou talitali fua ke ke io.

²² Ti na kakau loa e le pule solia le tupulaga, i le oki o lana fakatotonu kiate ia ke aua na toe masau ki se tasi o uiga mo le nea lena.

Fakasola o Paulo i le pouli ki Sesalea

²³ Ti na kalagai loa e le pule solia ni setulio e toka lua, o pati kia laua : Kolua teuteui loa ki le ola iva pouli, ni tagata solia e tino lelau lua, mo ni tagata eke osi e tino fitu, ti mo ni tagata too kalolo e tino lelau lua, ke ano o kaku ki Sesalea.

²⁴ Toe teuteui foki mo ni osi ke eke ai Paulo, o tupu ke ave mauli a ia ki le kovana ko Felise.

²⁵ Ti na fai loa e ia se tosi, o pati ai :

²⁶ Kolote Lisiasi, ki le agai o le kovana lasi ko Felise, malo le mauli !

²⁷ Na too le tagata lena e le kau Sutea ke tamate, ti na kau au mo le kau solia o saofaki a ia, i laku logo ko se tagata Loma a ia.

²⁸ I laku fia iloa le tupuaga o lalatou tukugavelii a ia, na kau ave loa a ia ki mua o le fono lasi.

²⁹ Ti na kau matala loa e tupu lona fakamaaui ko ni nea o uiga mo lalatou lao, kae na leikiaise fai fua e ia se sala leia e tonu ke mate ai, pe ke pilisoni ai.

³⁰ Ti i laku maua se logo kua kauakii e le kau Sutea se tukipo kiate ia, na kau kakau atu aifai a ia kiate koe, ti na kau fakasa kia latou ala na tukugavelii ia a ia, ke lotou tagi kiate koe totonu. Nofo la.

³¹ Ti na ave loa Paulo e le kau solia, o mulimuli ki le fakatotonu kua fai kia latou, o taki a ia i le pouli o kaku ki Atipatilisi.

³² I leia ake a aso, na toe liliu loa le kau solia ki le fale solia, kae lotou tuku loa le kau tagata eke osi ke ano mo Paulo.

³³ Ti na kaku loa le kau tagata eke osi ki Sesalea, ti na lotou fakatoo loa le tosi ki le kovana, ti mo fakasa loa Paulo kiate ia.

³⁴ I le oki o le lau o le tosi e le kovana, na vesili loa a ia pe kau Paulo ki le fenua fea. I lana iloa na au Paulo mei Silisia, na pati loa a ia :

³⁵ Koi kau fakalogo loa kiate koe, mo ka kaku mai loa latou ala na fakalakasala ia a koe. Ti na fakatotonu loa e ia ke leoleo a ia i le fale fakamaau o Elote.