Gaoi 22 - Tosi Tapu

Masau a Paulo i mua o le kakai

¹ Tagata ko fetaina mo tamana, kotou fakalogo i le lakaga nei ki le nea leia e kau fia fakasa atu kia koutou, o uiga mo loku puipui !

² I lalatou logo na masau ake a ia kia latou i le fakaepeleo, na lotou toe asilisili fakalologo loa. Ti na pati loa Paulo :

³ E kau Sutea, ti na kau tupu i Talese i Silisia ; kae na kau lasi ake i le kolo leinei, ti na kau ako i vae o Kamaliele i le maoki katoa o le lao o tatou tamana, ti na kau apele i le alofa ki le Atua ofaipe koutou fuli i le aso nei.

⁴ Na kau fakavelivelii o kaku ki le mate le akonaki leinei, ti na kau saisai o velo ki le pilisoni a tagata mo fafine.

⁵ E fakamaoki kiate au le pule faisakilifisio mo le fono o le kau fakamatuatua. Na kau maua foki meia latou ni tosi ki fetaina i Tamaso, ganea leia na kau ano ki ai, o tupu ke saisai latou ala na nonofo i ai, o aumai ki Selusalemi ke fakatuaa.

Fakamatala e Paulo o le sa o le Aliki kiate ia

⁶ I laku ano i le ala, ti kua kau ofi ki Tamaso, na fokifa fai i le vae lalatea, kua mu mei le lagi se malama lasi ai, o au kiate au.

⁷ Ti na kau teka loa ki le kele, ti na kau logo loa ki se leo leia na pati : Saulo, Saulo, kolea e ke fakavelivelii ai au ?

⁸ Ti na kau tali loa : Ko ai a koe, Aliki ? Ti na pati mai loa a ia kiate au : Ko au ko Sesu mei Nasaleti leia e ke fakavelivelii.

⁹ Ko latou ala na ano mo au na tio loa ki le malama, kae na leaise lotou logo loa ki le leo o leia na masau mai kiate au.

¹⁰ Ti na kau pati loa : Kolea e tonu loa ke kau fai, Aliki ? Ti na pati mai loa le Aliki kiate au : Tuu ki aluga, o ano ki Tamaso, ti e fakasa atu loa i ai a nea fuli ala e tonu ke ke fai.

¹¹ I laku leaise koi tio ki se nea, o tupu ko le gigila o le malama lena, na too loa loku lima e latou ala na ano mo au, ti na kau kaku loa ki Tamaso.

¹² Kae na i ai se tagata na igoa ko Ananiasi, tagata tausi malie ki le Atua o mulimuli ki le lao, ti na fakamaoki malie fuli kiate ia le kau Sutea leia na nofo i Tamaso,

¹³ ti na au loa a ia kiate au, o pati mai : Saulo, loku taina, ke toe tio ou mata. I le lakaga fai lena, na toe tio loa oku mata, o kau tio loa kiate ia.

¹⁴ Ti na pati loa a ia : Kua filifili a koe e le Atua o tatou tamana ke iloa ia lona finegalo, mo tio ki le Tagata Faitotonu e Tasi, ti mo logo ki folafola mei lona gutu ;

¹⁵ talie e ke liliu loa ko lana tagata fakamaoki, i mua o tagata fuli, ki nea ala e ke tio loa ki ai mo ke logo loa ki ai.

¹⁶ I le temi nei kolea e ke tuvai ai ? Tuu ki aluga, ti ke papitema mo ke fakamea i au agasala, o kalagai le suafa o le Aliki.

Kalagai o Paulo ke mavae i Selusalemi, o ano ki le kau pagani

¹⁷ I laku toe liliu ki Selusalemi, ti i laku faikole i le fale tapu, na fakatio au e le Atua ki se nea,

¹⁸ ti na kau tio loa ki le Aliki leia na pati mai kiate au : Fakatavili, ti ke mavae vave i Selusalemi nei, talie e leaise lotou tali loa lau fakamaoki kiate au.

¹⁹ Ti na kau pati loa : Aliki, e lotou iloa totonu na kau fakaulu ki pilisoni mo sasa i sinakoka fuli latou ala na tui kiate koe,

²⁰ ti i le aso leia na liligi ai le toto o Setefano, ko lau tagata fakamaoki, na kau nofo tonu i ai, o fakamaoki mo latou ki lona tukipooi, ti mo leoleo a kofu o latou ala na tamate ia a ia.

²¹ Ti na pati mai loa le Aliki kiate au : Ano, e kau kakau loa a koe ki mamao ki atu puleaga…

Fakasa e Paulo e loma a ia

²² Na lotou fakalogo loa kiate ia o kaku ki le masau lena, ti na lotou kalaga leo lasi loa : Ke too mei le kele le tagata lena ! E leaise tonu ke tuku a ia ke mauli.

²³ Ti i lalatou kalaga, mo laku ki lalo olatou kofu, ti mo laku ki aluga le efu,

²⁴ Na fakatotonu loa e le pule lasi o le kau solia ke fakaulu Paulo ki le fale solia, ti ke fakavesilii a ia ki le suipi, o tupu ke iloa le tupuaga o lalatou kalaga fenaaki kiate ia.

²⁵ I le temi leia na sai ai loa a ia ki ni maea ke sasa, na pati loa Paulo ki le setulio leia na nofo i ai : Pe taga kia koutou ke kotou sasa se tagata Loma leia na leikiaise fakamaaui ?

²⁶ I le logo a le setulio ki le nea lena, na ano aifai a ia o fakasa ki le pule lasi, o pati : Kolea loa ka ke fai ia ? Ko le tagata leinei ko se tagata Loma.

²⁷ Ti na au loa le pule lasi, o pati kia Paulo : Fakasa mai kiate au, pe ke Loma ? Ti na tali loa a ia : E io.

²⁸ Ti na toe pati loa le pule lasi : Ko au, na kau totogi ki se paaga lasi ai ke kau maua le natula fakaloma. Ti na pati loa Paulo : Kae ko au, e kau Loma mei loku tupu.

²⁹ I le temi fai lena, na mavae loa iate ia latou ala na tonu ke fakavesilii ia a ia, ti na i foki mo le pule lasi, o tupu ko lana iloa ko le tagata Loma Paulo, ti mo lana fakatotonu ke sai a ia.

Paulo i mua o le fono lasi a le kau Sutea

³⁰ I leia ake a aso, i lona loto ke iloa totonu le tupuaga o le tukugavelii o Paulo e le kau Sutea, na fakatotonu loa e le pule lasi ke tatala ona sai, ti ke fakatasi le kau pule faisakilifisio mo le fono lasi katoa ; ti na fakaifo mai loa e ia Paulo, o fakatuu i lotomalie o latou.