Gaoi 20 - Tosi Tapu

Folau a Paulo ki Masetonia mo Keleka

¹ I le oki o le maveuveu, na fakatasii loa e Paulo le kau tisipulo, ti i le oki o lana fakalotomakeke latou, na poloaki loa a ia kia latou, ti na ano loa a ia ki Masetonia.

² Na foli loa e ia le fenua lena, o fai ni akonaki lasi fakalotomakeke ki le kau tisipulo,

³ Ti oki, na ano loa a ia ki Keleka o nofo loa i ai i masina e tolu. I lana sapena ke ano ki Silia, na kauakii loa e le kau Sutea se fakaveliveli kiate ia. Koia na loto ai loa a ia ke toe liliu i le ala o Masetonia.

⁴ Ti na ano loa mo ia ki Asia : Sopatele mei Pelea, vosa o Pilusi, mo Alisitake, mo Sekonitusi mei Tesalonika, mo Kaiusi mei Telepe, mo Timoteo, ti mo Tisike mo Tolofime mei Asia.

⁵ Ti na muamua loa latou ana, o talitali mai kia matou i Toloasi.

Aso e fitu o Paulo i Toloasi

⁶ Ko matou, i le oki o le aso lasi o pane sala fakatupu, na motou sopo loa ki se vaka i Filipe, ti i le sili o aso e lima, na motou kaku loa kia latou i Toloasi, o motou nonofo ai loa i aso e fitu.

⁷ I le uluaki aso o le vasaa, na motou fakatasi loa ki le tofitofi o le pane. Ti na akonaki loa Paulo kia latou ; na tonu ke mavae a ia i leia ake a aso, ti na akonaki loa a ia o kaku ki le vaeluapo.

⁸ Ti na mauke ai a malama i le kogafale fata leia na motou fakatasi ai.

⁹ Kae na i ai se tama tupulaga na igoa ko Eutikusi, leia na ekeeke i le katupa, ti na tulemoe loa a ia o moe mate i le lolotoga o le akonaki a Paulo ; i lana moe mate na vilo loa a ia mei le lau fata tolu ki lalo, ti na lagai ake loa a ia kua mate.

¹⁰ Kae na ifo loa ki lalo Paulo, o punou kiate ia, o luluku a ia i ona lima, o pati : Aua na kotou mamae, talie e nofo lona laumalie iate ia.

¹¹ Ti na toe pale ake loa Paulo ki fata, o tofitofi le pane mo kai, ti na toe masau fualoa a ia o kaku ki le mafoata. Ti i le oki o le nea lena, na mavae loa a ia.

¹² Kae na paleaki ake loa ki fata le tupulaga kua mauli, ti na lotou fiafia lasi ai.

Folau mei Toloasi ki Mileti

¹³ Kia matou, na motou muamua loa i se vaka, o folau ki Asosi, ki le ganea leia na motou fakatuutuu ai ke fakaeke ai Paulo, talie na loto loa a ia ke saele lalo.

¹⁴ I lana kaku mai loa kia matou i Asosi, na motou fakaeke loa a ia ki le vaka, ti na motou ano loa ki Mitilene.

¹⁵ I lena, na motou toe folau loa, o fakalaka i mua o Kiosi i leia ake a aso. I le lua o aso, na motou kaku loa ki le motu ko Samosi. I le tolu o aso, na motou pale loa i Mileti.

¹⁶ Ti na fakatotonu loa e Paulo ke tuku a Efeso, o tupu ke aua na puli se temi i Asia ; talie na fakavilivili a ia ke kaku ki Selusalemi i mua o le Penikosite, mo kapau na feala.

Masau a Paulo ki fakamatuatua o Efeso

¹⁷ Kae na tukulogo loa a ia mei Mileti ki Efeso ke nake kiate ia le kau fakamatuatua o le Ekelesia.

¹⁸ I lalatou kaku ake kiate ia, na pati loa a ia kia latou : E kotou iloa le aga leia na kau fai tuumau kia koutou, mei le uluaki aso leia na kau ulu mai ai ki Asia nei.

¹⁹ Na kau fakasausau ki le Aliki i le loto agamalu katoa, mo ni loimata lasi ai, ti mo ni asiasii, ala na kauakii e le kau Sutea kiate au.

²⁰ E kotou iloa na leaise kau fufu se nea fua e tasi leia na aoga kia koutou, kae kua kau fakasa kia koutou mo ako kia koutou a nea fuli ala na aoga kia koutou, i mua o le kaugamalie ti mo loto fale,

²¹ o kau fakasa ki le kau Sutea mo le kau Keleka le fakasemala ki le Atua, ti mo le tui ki lotatou Aliki ko Sesu-Kilisito.

²² Ti i le aso nei ko leinei, kua sai au e le Laumalie i loku loto, ke kau ano ki Selusalemi, ti e leaise kau iloa le nea leia ka soko mai loa kiate au i ai.

²³ Kae ko leinei, kua fakamaoki kiate au le Laumalie Maokioki, e talitali mai loa kiate au ni sai mo ni mamae i kolo fuli.

²⁴ Kae e leaise kau tokaga fua ki loku mauli, o sakinake koi mauiga a ia kiate au, kae kese fua ke kau fakaoki i le fiafia laku makape, ti mo le gaoi leia kua kau tali mei le Aliki Sesu, ke fakasa le logo malie o le kalasia o le Atua.

²⁵ Ti ko leinei, e kau iloa e leaise kotou toe tio loa ki oku mata, koutou fuli ala na kau fakasa ki ai le Puleaga o le Atua.

²⁶ Koia e kau fakapapau atu kia koutou i le aso nei, e kau mea mei le toto o koutou fuli,

²⁷ talie kua kau fakasa kia koutou le finegalo katoa o le Atua, o leaise kau toe fufu fua se nea e tasi.

²⁸ Koia kotou tokaga ai kia koutou totonu, ti mo le kau ovi katoa leia kua fakanofo koutou ki ai e le Laumalie Maokioki ko epikopo, ke fagai ia le Ekelesia o le Atua, leia kua totogi e ia ki lona toto totonu.

²⁹ E kau iloa, i le oki o laku mavae, e ulu mai loa kia koutou ni lupo fekai, ala e leaise mamae loa ki le kau manu ;

³⁰ ti e mafuta loa i lotomalie o koutou, ni tagata ala e ako ia loa ni nea salasala, ke toso ai a tisipulo i olatou muli.

³¹ Koia, ke kotou leoleo ai, o kotou manatui i fetuu ai e tolu, i le ao mo le pouli, na leaise toe gato laku valoki koutou taki toka tasi mo ni loimata.

³² Ti ko leinei, e kau tuku koutou ki le Atua ti mo le folafola o lona kalasia, ki leia e maua ia le makeke ke faufau ia koutou ti ke soli ia kia koutou le tofiga o fakatasi mo latou fuli kua fakamaokioki.

³³ Ti na leaise kau manumanu ki se paaga, pe ki se aulo, pe ki ni kofu o se tasi.

³⁴ E kotou iloa, e koutou totonu, ko lima anei na tausi ki nea ala na aoga kiate au ti mo latou ala na nofo mo au.

³⁵ Ti na kau fakasa kia koutou i nea fuli ana, e tonu ke kotou gaoi fenaaki, o tokoi ki le kau mativa, ti mo manatui a folafola a le Aliki, leia na pati totonu : E manuia lasi ake le soli i le tali.

³⁶ I le oki o lana masau, na tuutuli loa Paulo ki lalo, o faikole mo latou fuli.

³⁷ Ti na lotou tagi mamae fuli loa, ti na lotou kalu loa ki le ua o Paulo, o sogi kiate ia,

³⁸ o toe lasi ake loa lolatou mamae, o tupu ko le pati a Paulo, e leaise lotou toe tio loa ki ona mata. Ti na lotou ano loa, o tuku a ia ki le vaka.