Gaoi 2 - Tosi Tapu

Ifo o le Laumalie Maokioki

¹ I le aso lasi o le Penikosite, na lotou fakatasi fuli i se ganea e tasi.

² Ti fokifa kua au loa mei le lagi se gugulu ofaipe se gugulu o se matagi makeke ai, o fakaapele le fale katoa leia na lotou nonofo ai.

³ Ti ko ni alelo, ofaipe ni alelo afi, na sa loa kia latou, ti na ifo loa kia latou taki toka tasi.

⁴ Na lotou apele fuli loa i le Laumalie Maokioki, ti na lotou kamata masau loa i ni iki ake masau o mulimuli ki lona tuku ake kia latou e le Laumalie Maokioki.

⁵ I aso ana, na nonofo i Selusalemi ni kau Sutea, tagata tausi lotu malie, mei puleaga fuli o le malama nei.

⁶ I le logoa leia kua soko, na oso ake loa se kakai toka api, ti na lotou punamauli loa talie na tasi logo le tagata kia latou e masau ake i lana masau totonu.

⁷ Na lotou punamauli, mo tutuu noa fuli, o fepatiaki : Ko kakai ana e masasau, pe leaise lotou Kalilea fuli ?

⁸ Pe feaki e tou logo ai kia latou i atatou masau totonu ala na tupu ake mo tatou ?

⁹ Ko tatou ko kau Palete, mo kau Mete, mo kau Elame ; mo la e nonofo i Mesopotamia, mo Sutea, mo Kapatose, mo Potuse, mo Asia,

¹⁰ mo Filisia, mo Pafilia, mo Esipito ti mo potu o Lipia e feofi ki Silene, mo latou ala na au mei Loma, Sutea mo poloselita ;

¹¹ mo le kau Kelete mo le kau Alape. Pe feaki e tou logo ai kia latou e masau ia tou masau ki nea fulumalilie a le Atua ?

¹² Na lotou punamauli fuli, kae na leaise iloa sa latou manatu, ti na lotou fepatiaki : Kolea le uiga o le nea leinei ?

¹³ Kae na gologolo ni iki, o pati : Kua lotou konana i le vino.

Uluaki akonaki a Petelo

¹⁴ Ti na tuu loa Petelo ki aluga mo le tino agafulu tupu tasi, o masau leo lasi, o pati : Tagata Sutea, ti mo koutou fuli ala e nonofo i Selusalemi i aso anei, ke kotou iloa le nea leinei ti ke kotou fakalogo mai ki aku masau !

¹⁵ E leaise konana a kakai anei, ofaipe le nea leia e kotou manatu ki ai, talie ko le ola iva fai leinei o le usu.

¹⁶ Kae ko le nea leinei na fakasa e le polofeta ko Soele :

¹⁷ I aso fakamuli, e pati le Atua, e kau tufaki loa loku Laumalie Maokioki ki kanofi fuli ; Efaikikite loa okoutou vosa mo okoutou taineliki, Emaua loa e okoutou kau tupulaga ni tio, Ti e maua loa e okoutou kau matua ni moe miti.

¹⁸ Io, ki aku tagata fakasausau mo aku fafine fakasausau, Iaso ana, e kau tuku loa kia latou loku Laumalie ; ti e lotou faikikite loa.

¹⁹ E kau fai loa ni nea fakaofolele i aluga i le lagi Ti mo ni milakulo i lalo i le kele, Ei ai loa se toto, mo se afi, ti mo se afui afi ;

²⁰ E fakapouli loa le laa, Ti e toto loa le masina, Imua o le soko o le aso o le Aliki, Ole Aso lasi lena ti mo fakakololia.

²¹ Ti ko leia e fetapa loa ki le suafa o le Aliki, e fakamauli loa.

Ko Sesu leia na fakasa e Tavite

²² Tagata Iselaele, kotou fakalogo mai ki folafola anei ! Ko Sesu mei Nasaleti, le tagata lena kua fakamaoki ki ai le Atua i okoutou mua ki ni milakulo, mo ni nea fakaofolele, ti mo ni fakamailoga ala na fai e le Atua iate ia i lotolotoga o koutou, ofaipe lakotou iloa, e koutou totonu ;

²³ ko le tagata lena na fakatau o mulimuli ki le fakatuutuu mo le poto o le Atua, ti na kotou tutuki a ia i se koluse, ti na kotou tuku a ia ke tamate e le lima o tagata agasala.

²⁴ Kua toe fakatuuake a ia e le Atua, o saofaki a ia mei sai o le mate, talie na leaise mafai ke taofi a ia e le mate.

²⁵ Talie na fakasa e Tavite o tosi kiate ia : Na kau tio tuumau ki le Aliki i oku mua, Talie e agai a ia i loku fetuu atamai, o tupu ke aua na kau siga.

²⁶ Koia e fiafia ai loku loto, ti e fiafia lasi ai loku alelo, Ti e nofo ai loku tino i le amanaki malie,

²⁷ Talie e leaise ke tuku loa loku laumalie i le nofoaga o le kau mate, Ti e leaise ke fakataga loa ke pala le tino o lou Sagato.

²⁸ Kua ke fakasa kiate au a ala o le mauli ; Eke fakaapele loa au ki le fiafia i lou agai.

²⁹ Fetaina, kotou fakataga mai ke kau masau fakalauatea atu kia koutou, o uiga mo lotatou tamana ko Tavite : kua mate a ia, ti kua tanu a ia, ti koi tuu nei foki lona tanuma i lotolotoga o tatou.

³⁰ Talie na polofeta a ia, ti na iloa e ia na fakapapau ake e le Atua kiate ia e fakaeke loa e ia se tasi i lona sakoga totonu ki lona ekeekeaga fakasau,

³¹ ko le toe tuuake lena o le Kilisito na fakasa kiate ia, ti na tio a ia ki ai, ti kua fakasa fakatomua e ia, i lana pati : e leaise tuku loa e ia a ia i le nofoaga o le kau mate ti e leaise tio loa lona tino ki le pala.

³² Ko le Sesu lena, leia kua toe fakatuuake e le Atua ; e motou fakamaoki fuli ki ai.

³³ Kua siki a ia ki le fetuu atamai o le Atua, ti kua tali e ia mei le Tamana le Laumalie Maokioki leia na fakapapau mai, ti kua liligi e ia a ia kia matou, ofaipe le nea leia kua kotou tio mo logo ki ai.

³⁴ Talie na leaise pale Tavite ki le lagi kae na fakasa e ia totonu : Na pati le Aliki ki loku Aliki : Eke a koe i loku fetuu atamai,

³⁵ O kaku ke kau fakaliliu ou fili ko lou tekiaga vae.

³⁶ Ke iloa fakapapau e le fale katoa o Iselaele kua fakanofo e le Atua ke Aliki mo Kilisito le Sesu lena na kotou tutuki ki le koluse.

³⁷ I lalatou logo ki le masau lena, na lotou logoi i olatou loto se fakasemala lasi ai, ti na lotou pati loa kia Petelo mo la ake apositolo : Kau tagata ko fetaina, kolea le nea leia e tonu ke motou fai ?

³⁸ Na pati loa Petelo kia latou : Kotou fakasemala ti ke kotou tasi papitema i le suafa o Sesu-Kilisito, o tupu ko le fakamolemole o akoutou agasala ; ti e kotou tali loa le nea alofa o le Laumalie Maokioki.

³⁹ Talie na fai le fakapapau lena kia koutou, mo akoutou fanau, ti mo latou fuli ala e nonofo i mamao, latou fuli ala e kalagai loa e le Aliki lotatou Atua.

⁴⁰ Ti ki ni iki ake folafola mauke ai, na fakalotoi mo fakamakeke e ia latou, o pati : Kotou sosola mei le tautupu agaveli leinei.

⁴¹ Ko latou ala na tali ia loa lana folafola na papitema loa ; ti i le aso fai lena, na lasi loa le api o le kau tisipulo i laumalie e tino afe tolu.

Uluaki fakatasi a le kau kilisiteano

⁴² Na lotou kataki fualoa i le akonaki a le kau apositolo, mo le komunio fakatautaina, mo le tofitofi o le pane, ti mo faikole.

⁴³ Ti na vilo ki le kakai katoa le i, ti na lasi a nea fakaofolele mo milakulo na fai e le kau apositolo.

⁴⁴ Ko latou fuli ala na tui na nonofo i se ganea e tasi, ti na lotou maua fakatasi a nea fuli.

⁴⁵ Na lotou fakatau olatou kele mo olatou koloa, ti na lotou tufatufa ia latou fuli lona paaga, o mulimuli ki le nea leia e aoga ki le tagata taki toka tasi.

⁴⁶ Na lotou fakatasi i aso fuli i le fale tapu, ti na lotou tofitofi le pane i olatou fale, ti na lotou too lalatou nea kai i le fiafia mo le loto faigaofie,

⁴⁷ o fakamalo ki le Atua, ti mo alofainai e le kakai katoa. Ti na fakaulu e le Aliki i le aso taki tasi ki le Ekelesia latou fuli kua saofaki.