Gaoi 19 - Tosi Tapu

Akonaki a Paulo i Efeso

¹ I le koi nofo a Apolosio i Kolinito, na kaku loa Paulo ki Efeso, i le oki o lana fakalaka i fenua o Asia. I lana felavei mo ni iki o le kau tisipulo, na pati loa a ia kia latou :

² Pe na kotou tali le Laumalie Maokioki, i le temi leia na kotou tui ai ? Ti na lotou tali loa kiate ia : E leikiaise motou logo fua e i ai se Laumalie Maokioki.

³ Ti na pati loa a ia : Ko le papitema fea leia na kotou tali ? Ti na lotou tali loa : Ko le papitema leia a Soane.

⁴ Ti na pati loa Paulo : Na fai papitema Soane ki le papitema o le fakasemala, o pati ki le kakai ke tui ki leia e au i ona muli, ko lona uiga, kia Sesu.

⁵ I masau ana, na papitema loa latou i le suafa o le Aliki ko Sesu.

⁶ I le teki loa e Paulo ona lima kia latou, na ifo loa le Laumalie Maokioki kia latou, ti na lotou masau loa ki ni masau kesekese, ti na lotou kikite loa.

⁷ Ko ni tagata latou e tino agafulu tupu lua.

Nofo o Paulo i Efeso i fetuu e lua,

⁸ Ti na ulu loa Paulo ki le sinakoka o masau fakalauatea i ai. I le lolotoga o masina e tolu, na masau a ia ki nea o le Puleaga o le Atua, o faiga ke tafoki latou ala na fakalogo kiate ia.

⁹ Kae, i le fakafefeka mo le tui gataa o ni iki, o lauveli i mua o le toka api ki le ala o le Aliki, na tiaki loa e Paulo latou. Kae na too kese loa e ia le kau tisipulo mo ia, o ako loa e ia latou i aso fuli i le fale ako o Tilanusi.

¹⁰ Na fetuu lua le nea lena, o tupu ai loa le logo ki le folafola a le Aliki o le kakai katoa leia na nofo i Asia, Sutea mo Keleka.

¹¹ Ti na fai e le Atua ni milakulo lalasi i le lima o Paulo,

¹² o kaku ai ki le fakalave o ni kie pe ko ni musuala kua lave ki lona tino ki le kau masaki, ti na mavae a masaki mo temonio meia latou.

¹³ Ti na asiasii loa e ni tagata Sutea kapu temonio ala na feanoaki saele, ke lotou kapu i le igoa o le Aliki Sesu a laumalie veli meia latou ala na lotou nonofo ai, o pati : E kau fakatotonu atu kia koutou, i le Sesu leia e fakasa e Paulo !

¹⁴ Ko latou ala na fai ia le nea lena, ko vosa e toka fitu o se tagata ko Seva, tagata Sutea, ko se tasi o le kau pule faisakilifisio.

¹⁵ Kae na tali loa le laumalie veli kia latou : E kau iloa Sesu, ti e kau iloa pe ko ai Paulo, kae ko koutou, ko ai ma koutou ?

¹⁶ Ti na oso loa kia latou le tagata leia na nofo ai le laumalie veli, mo se makeke lasi ai, o fakavelivelii le toka lua o latou, o lotou fesolaki ai mei le fale lena, kua telefua mo lavelavea.

¹⁷ Ti na iloa loa le nea lena e le kau Sutea katoa mo le kau Keleka katoa ala na nonofo i Efeso, ti na lotou i fuli, o fakakololia ki le suafa o le Aliki ko Sesu.

¹⁸ Ti na toka api ai o latou ala na tui na au loa o kofesio mo fakasa a nea ala na lotou fai.

¹⁹ Ti na toka api foki ia latou ala na fai nea fakatemonio na aumai ia alatou tosi, o tutu i mua o le kakai katoa : Na fakaano lona totogi ki ni fa piesi paaga e kau lima afe.

²⁰ Ti na asilisili mafola mo makeke le folafola a le Aliki.

²¹ I le sili o nea ana, na manatu loa Paulo ke ano ki Selusalemi, o fakalaka atu i Masetonia mo Akaia. Na pati a ia : Ka oki loa laku ano ki ai, e tonu loa ke kau tio i Loma.

²² Ti na kakau loa e ia ki Masetonia se toka lua i ona tokoi, ko Timoteo mo Elaseto, kae toe nofo atu mua a ia totonu i Asia.

Maveuveu i Efeso

²³ I le temi lena, na soko loa se maveuveu lasi o uiga mo le ala o le Aliki.

²⁴ Ko se tagata fau nea fakateuteu na igoa ko Temetiliusi, na fau ia ki le siliva ni fakatata liliki o le fale tapu o Atelemisi, ti na fakagaoi e ia se kakai toka lasi ai.

²⁵ Ti na fakatasii loa e ia latou ana, mo latou ala na gaoi tatau mo latou, o pati : Kau tagata, e kotou iloa e fakalogo lotatou mauli ki le matani gaoi leinei ;

²⁶ kae kua kotou tio ti kua kotou logo, i Efeso mo Asia katoa, kua fakalotoi mo toso e le Paulo lena se kakai toka api ai, o pati ko atua ala na fau e le lima o le tagata, e leaise ko ni atua latou.

²⁷ Ko le tutamaki leia ka soko e leaise gato fua ki le saele veli o latatou matani gaoi ; kae e toe fakanoai foki mo le fale tapu o le finealiki lasi ko Aletemisi, leia e atolasio ki ai Asia katoa mo malama nei katoa, ti e toe puli ai foki mo lona kololia.

²⁸ Ti na lotou itaita ai i lalatou logo ki masau ana, ti na lotou kalaga loa : E lasi le Aletemisi o le kau Efeso !

²⁹ Ti na maveuveu loa le kolo katoa. Na lotou feoso fakatasi fuli loa ki le malae fai manogi, o too le sa tagata Masetonia ko Kaiusi mo Alisitake, ko kau folau o Paulo.

³⁰ Ti na loto loa Paulo ke ano ki mua o le kakai, kae na taofi loa a ia e le kau tisipulo ;

³¹ ti ko ni iki foki o le kau pule fai manogi, ko ona kaukau nea, na kakau ia loa kiate ia ni tagata, o kole kiate ia, ke aua na ano ki le malae fai manogi.

³² Na kalaga kesekese le kakai, talie kua maveuveu le fakatasi katoa, ti na api ai latou ala na leaise malama ki le tupuaga o lalatou fakatasi.

³³ Ti na fakamavae loa mei le kakai a Alesatelo, leia na fakasolosolo loa e le kau Sutea ke masau ; ti na siki loa e Alesatelo lona lima ke masau ki le kakai.

³⁴ Kae i lalatou iloa ko le Sutea a ia, na lotou kalaga fakatasi fuli loa i ni ola e lua : E lasi le Aletemisi o le kau Efeso !

³⁵ Kae na lolomi loa le kakai e le sekalaipe o le kolo, o pati : Tagata Efeso, ko ai le tagata leia e leaise iloa ia e taupau e le kolo ko Efeso le fale tapu o le Aletemisi lasi, ti mo lona fakatata leia na vilo mei le lagi ?

³⁶ Talie e leaise mafai ke fakafesagai se tasi ki le nea lena ; e tonu ke kotou nonofo fakamalielie fai mua, kae aua na kotou osoi fakatavili se nea.

³⁷ Talie kua kotou aumai a tagata anei, kae na leikiaise lotou fai ni maumau i le fale tapu, pe ko ni masau veli ki lotatou finealiki ko Aletemisi.

³⁸ Kapau e i ai se tasi leia e mamae ki ai Temetiliusi mo lana kau gaoi, e i ai ni aso fai fakamaau, ti i ai mo ni pule fakamaau ; ke lotou tagi ki le telepinale.

³⁹ Kapau e i ai ni iki ake a nea ala e kotou tio ki ai, ti koi fakatokatoka loa latou i le fono, o mulimuli ki le lao.

⁴⁰ E feala ke fakalakasala loa tatou, o tupu ko le maveuveu leia kua soko i le aso nei, talie e leaise nea fua ke fakamaoki ai le tupuaga o latatou fakatasi leinei. I le oki o lana masau, na veteki loa e ia le fakatasi.