Gaoi 15 - Tosi Tapu

Visi ki le silikosisio i Selusalemi

¹ Ti na ifo loa mei Sutea ni tagata, ala na akonaki ki fetaina, o pati : Kapau e leaise silikosisio koutou o mulimuli ki le lao a Moisese, ti e leaise mafai ke kotou saofaki.

² Ti na fakafesagai loa Paulo mo Palenapa kia latou, o lotou visi lasi ai ; ti na fakatotonu loa e fetaina ke pale Paulo mo Palenapa, mo ni iki o latou, ki Selusalemi ki le kau apositolo mo le kau fakamatuatua, o tupu ko le nea lena.

³ I le oki o lolatou tuku ake e le Ekelesia, na lotou soko atu loa lolatou fanoga i Fenisia mo Samalia, o fakamatala ki fetaina le tafoki o le kau pagani, ti na lotou fiafia lasi ai.

⁴ I lalatou kaku ki Selusalemi, na fakatalitali loa latou e le Ekelesia, mo le kau apositolo, ti mo le kau fakamatuatua, ti na lotou fakamatala loa a nea fuli ala na fai e le Atua ia latou.

Taofi a Petelo : ke aua na fakamaua le kau pagani ki le lao

⁵ Kae na tuu ake loa ki aluga ni iki kua tui i le fetuuga o le kau faliseo, o pati : E tonu ke silikosisio le kau pagani mo fakamaua latou ke mulimuli ki le lao a Moisese.

⁶ Ti na fakatasi loa le kau apositolo mo le kau fakamatuatua o tioi le nea lena.

⁷ Ti na fai loa se visi lasi, ti na tuu ake loa Petelo ki aluga, o pati kia latou : Tagata fetaina, kua kotou iloa talu mei fualoa kua fai e le Atua se filifili ia koutou, o tupu ke logo le kau pagani ki le folafola o le Evaselio mei loku gutu, ti ke lotou tui.

⁸ Ti ko le Atua, leia e iloa ia a loto, na fakamaoki kia latou, o soli le Laumalie Maokioki kia latou ofaipe tatou ;

⁹ Ti na leaise fai fua e ia se fakakesekese ia tatou mo latou, o fakamea e ia olatou loto i le tui.

¹⁰ Ti ko leinei, kolea e kotou asiasii ai le Atua, o kotou teki ai ki le ua o le kau tisipulo se kavega leia na leaise mafai ke amo e otatou tamana pe ko tatou totonu ?

¹¹ Kae e tou tui na fakamauli tatou o tupu ko le kalasia o le Aliki Sesu, o tatau mo latou.

¹² Na fakalologo loa le fakatasi katoa, ke fakalogo kia Palenapa mo Paulo, ala na fakamatala ia loa a milakulo fuli mo nea fakaofolele ala na fai e le Atua ia laua i lotomalie o le kau pagani.

¹³ I le oki o lala fakamatala, na masau loa Sakopo, o pati : Tagata fetaina, kotou fakalogo mai kiate au !

¹⁴ Kua fakamatala e Simone le uluaki tuku e le Atua ona mata ki puleaga, o filifili meia latou se kakai ke amo ia lona suafa.

¹⁵ Ti e ano tasi le nea lena mo folafola a le kau polofeta, ofaipe lona tuu i le tosi :

¹⁶ I le sili o le nea lena, e kau toe liliu mai loa, ti e kau toe lagai loa le falela o Tavite leia na solo, E kau toe fakafoou loa a nea na maumau, ti e kau toe fakatuu loa a ia,

¹⁷ O tupu ke afa le Aliki e le toetoega o tagata, Ti mo puleaga fuli e puaki ai loku suafa. Epati le Aliki, leia e fai ia a nea ana,

¹⁸ Ti na fakasa ia latou talu mei fualoa.

E leaise maua le kau pagani ki le lao

¹⁹ Koia e kau manatu ai ke aua na fakatupu ni faigataa kia latou ala kua tafoki ki le Atua i le kau pagani,

²⁰ kae ke tou fai se tosi kia latou ke lotou fakamamao mei fakalialia o taulaatua, mo le fai feauaki, mo manu mamate, ti mo le toto.

²¹ Talie kua maua i kolo fuli, talu mei tautupu afea, ni kakai ala e akonaki kia Moisese mo lau ia a ia i sapato fuli i sinakoka.

Manatu a le kau apositolo

²² Ti na malie loa ki le kau apositolo, mo le kau fakamatuatua, ti mo le Ekelesia katoa, ke filifili ia latou ti ke kakau ki Atiokia, o fakatasi mo Paulo mo Palenapa, a Suta na fakaigoa ko Palasapasi mo Silasi, ko ni tagata mauiga i fetaina.

²³ Ti na lotou fakatoo loa kia latou se tosi kua fai feneeki : Ko le kau apositolo, mo le kau fakamatuatua, ti mo fetaina, fakaalofa atu ki fetaina i le kau pagani, kia latou ala e nonofo i Atiokia, mo Silia, ti mo Silisia !

²⁴ I lamatou logo na natu ni iki ia matou, kae na leaise motou tuku fua kia latou se fakatotonu, ti kua lotou fakamamae koutou ki alatou akonaki, ti kua lotou fakamaveuveui okoutou laumalie,

²⁵ kua sa malie kia matou i le oki o lamatou fakatasi fuli o loto tasi, ke motou filifili ni fakafofoga ti ke motou kakau atu latou kia koutou mo otatou alofaaga ko Palenapa mo Paulo,

²⁶ laua ala na tiaki ia ola mauli o tupu ko le suafa o lotatou Aliki ko Sesu-Kilisito.

²⁷ Koia kua motou kakau atu ai loa a Suta mo Silasi, ala e fakasa gutu ia loa le nea lena kia koutou.

²⁸ Talie na malie ki le Laumalie Maokioki ti mo matou foki, ke aua na fakamaua kia koutou se tasi ake kavega i le nea leia e aoga,

²⁹ ke iloa : ke kotou fakamamao mei inati kua momoli ki taulaatua, mo le toto, mo manu mamate, ti mo le fai feauaki ; e malie kia koutou ke fakamamao mei nea ana. Nonofo la.

Kakau o Suta mo Silasi ki Atiokia

³⁰ Na lotou mavae loa meia latou, o ano ki Atiokia, ti na lotou fakatoo loa le tosi ki le fakatasi katoa.

³¹ I le oki o lona lau, na fiafia loa fetaina ki masau fakalotomakeke ala na lotou maua mei le tosi.

³² Ko Suta mo Silasi, ala na polofeta foki, na fakalotomakeke ia loa a fetaina mo fakamakeke loa latou ki ni akonaki mauke ai.

³³ I le oki o ni aso, na tuku loa laua e fetaina ke toe liliu i le tokamalie kia latou ala na kakau ia mai laua.

³⁴ Kae na malie ia loa e Silasi ke toe nofo atu mua.

³⁵ Ti na nofo loa Paulo mo Palenapa i Atiokia, o akonaki mo fakasa le folafola a le Aliki, ti mo ni iki ake.

Mavete a Paulo mo Palenapa

³⁶ Ti na sili ki ai ni iki a aso, na pati loa Paulo kia Palenapa : Ta toe liliu mua o fakatele ki fetaina i kolo fuli ala na ta fakasa ai le folafola a le Aliki, ke ta iloa lolatou anoaga.

³⁷ Ti na loto Palenapa ke la toe ave foki Soane, na fakaigoa ko Maleko ;

³⁸ kae na leaise malie loa kia Paulo ke la ave leia na tiaki ia laua i Pafilia, ti na leaise ano mo laua i lala gaoi.

³⁹ Ti na makeke ai lala loto kesekese o tupu ai loa lala mavete. Ti na too loa e Palenapa a Maleko mo ia, o la folau i se vaka ki le motu ko Sipele.

⁴⁰ Ti na filifili loa e Paulo a Silasi, ti na la ano loa, i le oki o lola tuku e fetaina ki le kalasia o le Aliki.

⁴¹ Na ano loa a ia i Silia mo Silisia, o fakamakeke a Ekelesia.