Gaoi 13 - Tosi Tapu

Filifili o Paulo mo Palenapa

¹ Na i ai ni polofeta mo ni toketa i le Ekelesia o Atiokia : Ko Palenapa, mo Simeone na igoa ko Uli, mo Lusiusi mei Silene, mo Manaene leia na lasi ake fakatasi mo le sau ko Elote Atipasi, ti mo Saulo.

² I le lolotoga o lalatou tausi ki le Aliki i lalatou gaoi ki le folafola ti mo le sesunio, na pati loa le Laumalie Maokioki : Kotou vaei kese kiate au a Palenapa mo Saulo ki le gaoi leia kua kau kalagai laua ki ai.

³ Koia, i le oki o lalatou sesunio mo lalatou faikole, na lotou teki loa olatou lima kia laua, ti na lotou tuku loa laua ke ano.

⁴ Ko Palenapa mo Saulo, ala na kakau e le Laumalie Maokioki, na ifo loa ki Selesia, ti na la sopo loa i ai ki se vaka, o ano ki le motu ko Sipele.

⁵ I lala kaku ki Salamina, na la fakasa loa le folafola a le Atua i sinakoka o le kau Sutea. Na tokoi loa Soane kia laua.

Fakafesagai a Satana

⁶ Ti i le oki o lalatou ano i le motu katoa o kaku ki Pafosi, na lotou maua loa se tagata fai nea fakatemonio, ko se polofeta loi, ko se Sutea na igoa ko Pale-Sesu :

⁷ Na nofo a ia mo le kovana Loma ko Selesiusi Paulusi, ko se tagata poto. Na kalagai loa e le kovana lena a Palenapa mo Saulo, talie na fia logo loa a ia ki le folafola a le Atua.

⁸ Kae na fakafesagai loa kia laua a Elimase, le tagata fai nea fakatemonio, talie ko le uiga lena o lona igoa, ti na faiga loa a ia ke aua na tafoki le kovana.

⁹ Koia na apele ai loa Saulo, leia foki ko Paulo, i le Laumalie Maokioki, ti na tio fakamaumau loa a ia kiate ia, o pati :

¹⁰ Ko le tagata a koe kua apele i kaka fuli ti mo veli fuli, ko le vosa o le temonio, ko le fili o le maokioki, pe leaise tuku lau fakavelii a ala totonu o le Aliki ?

¹¹ Ko leinei : I le lakaga nei, kua vilo kiate koe le lima o le Aliki, e ke kivi loa, ti e leaise ke toe tio loa ki le laa o fualoa. Ti na to loa kiate ia le nenefu mo le fakapouli ; ti na taufa loa a ia, o afa se tasi ke taki ia a ia.

¹² Ti ko le kovana, i lana tio ki le nea kua soko, na tui loa a ia, talie kua lave loa iate ia le akonaki a le Aliki.

Akonaki a Paulo i Atiokia i Pisitia

¹³ Na sopo loa Paulo mo ona kaukau nea ki le vaka i Pafosi, o ano ki Pelese i le fenua ko Pafilia. Kae na mavae loa Soane ia laua, o toe liliu ki Selusalemi.

¹⁴ Mei Pelese na la soko atu loa lola fanoga, ti na la kaku loa ki Atiokia i le fenua o Pisitia. I le aso o le sapato, na la ulu loa ki le sinakoka, ti na la tonatona loa i ai.

¹⁵ I le oki o le lau o le tosi o le Lao mo le kau polofeta, na kakau loa e pule o le sinakoka ke pati kia laua : Fetaina, kapau e kolua maua ni akonaki ki le kakai, ke kolua masau.

¹⁶ Ti na tuu loa Paulo ki aluga, o siki lona lima, o pati : Tagata Iselaele, ti mo koutou ala e i ki le Atua, kotou fakalogo mai !

¹⁷ Na filifili e le Atua o le kakai leinei o Iselaele otatou tamana. Ti na siki loa e ia a ia ki aluga i lana nofo i Esipito, ti na fakamavae loa e ia a ia mei ai ki lona lima mafimafi.

¹⁸ Ti na fagai loa e ia latou i fetuu e kau fa i le toafa ;

¹⁹ ti na maumaui loa e ia ni puleaga e fitu i le fenua o Kanaane, o tufa olatou fenua kia latou.

²⁰ Ti oki a ia, i le lolotoga o fetuu e kau lelau fa kau lima, na soli loa e ia kia latou ni tui fakamaau o kaku ki le polofeta ko Samuele.

²¹ Ti sili a ia, na lotou kole loa se sau. Ti na soli loa e le Atua kia latou, i ni fetuu e kau fa, a Saulo vosa o Kise, mei le faasiga o Pesamino ;

²² ti sili lana tiaki a ia, na fakanofo loa e ia Tavite ko lolatou sau, leia na fakamaoki loa a ia ki ai, o pati : Kua kau maua Tavite, Vosa o Isaia, tagata e tatau mo loku loto, leia e fai ia loa loku loto katoa.

²³ Ti kua fakanofo e le Atua ki Iselaele i le sakoga o Tavite se fakamauli ko Sesu, o mulimuli ki lana fakapapau.

²⁴ I mua o lana au, na fakasa e Soane le papitema o le fakasemala ki le kakai katoa o Iselaele.

²⁵ I le fakaoki o le mauli o Soane, na pati loa a ia : E leaise ko au leia e kotou talitali ki ai ; kae ko leinei, e au i oku muli leia e leaise kau gali fua ke tatala ia ona taka.

²⁶ Tagata fetaina, vosa o le sakoga o Apalaamo, ti mo koutou fuli ala e i ki le Atua, kua kakau mai kia koutou le folafola leinei o le mauli.

²⁷ Kae na leaise iloa loa Sesu e le kakai o Selusalemi ti mo olatou pule, talie na leaise lotou matala foki ki folafola a le kau polofeta ala e lau i aso sapato fuli ; koia na lotou fakamaoki ai loa ki folafola ana, o fakatuaa Sesu ki le mate.

²⁸ Ti logo ai na leaise lotou maua se sala iate ia ke mate ai, kae na lotou kole loa kia Pilato ke tamate a ia.

²⁹ I le oki o lalatou fakasoko a nea fuli ala na tosi kia Sesu, na lotou too loa a ia mei le koluse, o tuku ki se tanuma.

³⁰ Kae na toe fakatuuake a ia e le Atua mei le kau mate.

³¹ Ti na sa a ia i le lolotoga o aso mauke ai kia latou ala na pale fakatasi mo ia mei Kalilea ki Selusalemi, ti kua liliu i le temi nei ko ana tagata fakamaoki i mua o le kakai.

³² Ti ko maua, e ma fakasa atu kia koutou le logo malie leinei : ko le fakapapau leia na fai e le Atua ki otatou tamana,

³³ kua fakasoko e ia kia tatou ala ko alatou fanau, i lana toe fakatuuake Sesu mei le kau mate, o mulimuli ki le nea leia e tosi i le pesalemo lua : Ko loku Vosa a koe, Na kau fanaui a koe i le aso nei.

³⁴ Ti e fakasa foki i se tasi ake ganea e toe fakatuuake e ia a ia mei le kau mate, o tupu ke aua na pala lona tino, o pati : E kau soli loa kia koutou a kalasia ala na fakapapau kia Tavite, a kalasia maoki mo lee gato.

³⁵ Ti e toe pati foki i le tasi ake ganea : E leaise ke tuku loa ke pala le tino o lou Sagato.

³⁶ Kae ko Tavite, i le oki o lana fai i lona tautupu le finegalo o le Atua, na mate loa a ia ti kua tanu a ia mo ona tamana, ti kua pala lona tino.

³⁷ Kae na leai fua se pala le tino o leia na toe fakatuuake e le Atua.

³⁸ Koia, fetaina, ke kotou iloa le nea leinei e ma fakasa kia koutou : E maua le fakamolemole o agasala i lona suafa,

³⁹ ti ko leia e tui kiate ia e lauatea loa i agasala fuli ala na leaise mafai ke kotou lauatea ai i le lao a Moisese.

⁴⁰ Koia, kotou tokaga ai ke aua na soko kia koutou le nea leia e fakasa i tosi a le kau polofeta :

⁴¹ Kotou tio, koutou kau fia matasoka, Kotou punamauli ti kotou pupuli ; Talie e kau fai loa i okoutou aso se gaoi, Se gaoi leia e leaise kotou tui loa ki ai mo ka fakamatala atu loa a ia kia koutou.

⁴² I lala ulu ki fafo, na fakaafe loa laua ke la toe masau ki le nea lena i leia ake sapato ;

⁴³ ti i le mavete o le fakatasi, na toka api ai ni Sutea mo ni poloselita tausi malie ki le Atua na muli loa ia Paulo mo Palenapa, ti na la masau loa kia latou, o fakalotoi latou ke pipiki ki le kalasia o le Atua.

Fakafesagai a le kau Sutea kia Paulo

⁴⁴ I leia ake sapato, na teitei fakatasi fuli le kolo katoa, o fakalogo ki le folafola a le Atua.

⁴⁵ Ko le kau Sutea, i lalatou tio ki le kakai, na apele loa i le finenonofo, ti na lotou fakafesagai loa ki nea ala na masau ki ai Paulo, o lotou lauveli mo gologolo kiate ia.

⁴⁶ Kae na asilisili loto makeke loa Paulo mo Palenapa, o pati kia latou : Na tonu ke uluaki fakasa mua kia koutou le folafola a le Atua ; kae, o tupu e kotou fakafiti ki ai, ti e kotou fakasa e leaise kotou aoga ki le mauli lee gato, ko leinei, e ma maliu loa ki le kau pagani.

⁴⁷ Talie ko le fakatotonu a ia leia na tuku mai e le Aliki kia maua : Na kau fakanofo a koe ke liliu ko le malama o puleaga, Ke ave ia le fakamauli o kaku ki potupotu o le malama nei.

⁴⁸ Na fiafia ai le kau pagani i lalatou logo ki le nea lena, ti na lotou fakakololia ki le folafola a le Aliki, ti na tui loa latou fuli ala na fakatuutuu ki le mauli lee gato.

⁴⁹ Ti na mafola le folafola a le Aliki i le fenua katoa.

⁵⁰ Kae na fakavelii loa e le kau Sutea a fafine aliki ala na lotu sutea, mo tagata mauiga o le kolo. Ti na lotou lagai loa se fakaveliveli kia Paulo mo Palenapa, ti na lotou kapu loa laua i lolatou fenua.

⁵¹ Na tutui loa kia latou e Paulo mo Palenapa le efu o ola vae, ti na la ano loa ki Ikone,

⁵² kae na apele le kau tisipulo i le fiafia ti mo le Laumalie Maokioki.