Gaoi 10 - Tosi Tapu

Petelo mo Kolenelio

¹ Na i ai i Sesalea se tagata na igoa ko Kolenelio, ko se pule tau o le kau solia na pati ko le solia Italia.

² Na tausi malie a ia mo alofa ki le Atua, a ia mo lona fale katoa ; ti na fai e ia ni nea alofa lasi ki le kakai, mo faikole tuumau ki le Atua.

³ I se sili lalatea vae ola tolu, na tio malama loa a ia i se sa ki se aselo a le Atua na ulu ake ki lona fale, o pati ake kiate ia : Kolenelio !

⁴ Ti i lana tio fakamaumau kiate ia mo se i lasi, na tali loa a ia : Aliki, kolea ? Ti na pati loa le aselo kiate ia : Kua kaku au faikole mo ou nea alofa ki mua o le Atua, ti kua manatui e ia latou.

⁵ Kakau i le lakaga nei ni tagata ki Sope, o taki mai Simone leia e igoa ko Petelo ;

⁶ e nofo a ia i le fale o se tagata gaoi kilii manu e igoa ko Simone, leia e ofi lona fale ki le tai.

⁷ I le mavae a le aselo leia na masau kiate ia, na kalagai loa e Kolenelio se toka lua i ana tagata fakasausau, ti mo se tagata solia agatonu ia latou ala na tausi kiate ia ;

⁸ ti i le oki o lana fakamatala kia latou o nea fuli, na kakau loa e ia latou ki Sope.

Tio a Petelo ki se kie na ifo mei lagi

⁹ I le pogipogi ake, i le lolotoga o lalatou fanoga i le ala, ti kua lotou ofi foki ki le kolo, na pale loa Petelo ki le tua aluga o le fale, i le vae tupu lua lalatea, o faikole.

¹⁰ Ti na fia kai loa a ia, ti na loto loa a ia ke kai. I le lolotoga o le teuteui o se nea kai kiate ia, na fakatio loa a ia ki se tio.

¹¹ Ti na tio loa a ia ki le lagi kua mavaa, ti ko se nea leia na faipe se fa kie lasi kua nonoa i ona tapa e fa, na ifo loa o kaku ki le kele,

¹² ti na maua i ai a manu vae fa fuli, mo manu totolo o le kele, ti mo manu lele o le lagi.

¹³ Ti na pati loa se leo kiate ia : Petelo, tuu ki aluga, ti ke tamate, o kai.

¹⁴ Kae na tali loa Petelo : Leai, Aliki, talie e leikiaise kau kai fua i se aso ki se nea e tapu pe kelekele.

¹⁵ Ti na toe pati loa le leo kiate ia ko lona tua lua a ia : Ko le nea leia kua fakasa e le Atua e mea, aua na ke tio ki ai ofaipe se nea e kelekele.

¹⁶ Na soko tua tolu le nea lena, ti na toe too loa a ia ki le lagi.

¹⁷ Ti i le lolotoga fifili a Petelo ki le uiga o le nea leia na tio ki ai, ko leinei, na tutuu ake loa ki le matapa a tagata ala na kakau mai e Kolenelio, o afa le fale o Simone.

¹⁸ Ti na lotou vesili loa o leo lasi pe nofo i leinei a Simone, leia e igoa ko Petelo.

¹⁹ I le fakakaukau a Petelo ki le nea leia na tio ki ai, na pati loa le Laumalie kiate ia : Ko nei ni tagata e toka tolu e afa ia a koe ;

²⁰ tuu ki aluga, o ifo ki lalo, ti ke ano mo latou ; aua na ke i, talie ko au leia na kakau ia mai latou.

²¹ Ti na ifo loa Petelo, o pati ki tagata ana : Ko leinei, ko au leia e kotou afa ; kolea le nea e kotou au ai ?

²² Ti na lotou tali loa : Ko Kolenelio, ko se setulio Loma, tagata agatonu mo alofa ki le Atua, leia kua fakamaoki ki ai le puleaga katoa o le kau Sutea, na fakasa kiate ia e le Atua i lana aselo maokioki ke aumai a koe ki lona fale, ke logo a ia ki au folafola.

Ano a Petelo ki le fale o Kolenelio

²³ Ti na fakaulu loa e Petelo latou ki fale, o fakamomoe i ai. I leia ake aso, na tuu loa a ia ki aluga, o ano mo latou. Ti na ano foki ni iki i fetaina o Sope mo ia.

²⁴ Na lotou kaku loa ki Sesalea i leia ake a aso. Ti na talitali Kolenelio kia latou, ti kua fakaafe e ia ona matua mo ona kaukau nea.

²⁵ I le kaku atu a Petelo, na au loa Kolenelio o fakafetaulaki mai kiate ia, ti na fakapulou loa a ia ki lalo i ona vae ke su kiate ia.

²⁶ Kae na fakatuu ake loa a ia ki aluga e Petelo, o pati : Tuu ki aluga ; ko au foki ko se tasi tagata.

²⁷ Ti na koi masau a ia kiate ia, na ulu loa a ia ki fale, o maua se kakai toka api kua fakatasi i ai.

²⁸ Ti na pati loa a ia kia latou : E kotou iloa e tapu ki se Sutea ke fakatasi mo se matapule pe ke ulu ki lona fale ; kae na fakasa mai e le Atua kiate au ke aua na kau tio ki se tagata fua e tasi e tapu pe kelekele.

²⁹ Koia na leaise faigataa ai kiate au ke kau au, talie kua kotou kalagai au ; ti e kau kole atu loa kia koutou pe kolea na kotou aumai ai au.

³⁰ Ti na pati loa Kolenelio : Kua aso fa nei loa, i le ola leinei, na kau faikole i loku fale i le vae ola tolu sili lalatea ; ti ko leinei, na tuu mai loa ki oku mua se tagata kua teu gigila, o pati :

³¹ Kolenelio, kua tali lau kole, ti kua manatui e le Atua au nea alofa.

³² Koia kakau se tasi ki Sope, o aumai Simone, leia e igoa ko Petelo ; e nofo a ia i le fale o Simone, tagata gaoi kilii manu, i le mata tai.

³³ Ti na kau kakau atu aifai se tasi kiate koe, ti ko se nea malie ai lau au. Koia i le temi nei, kua motou nofo fuli i leinei i mua o le Atua, ke fakalogo ki nea fuli ala kua fakatotonu atu e le Aliki kiate koe ke fakasa mai kia matou.

Akonaki a Petelo ki le kau pagani

³⁴ Ti na fakamavaa loa e Petelo lona gutu, o pati : E maoki e kau iloa e leaise filifili lanu le Atua,

³⁵ kae i puleaga fuli, ko leia e alofa kiate ia mo saele i le maokioki, e malie a ia ki ona mata.

³⁶ Na kakau e ia le folafola ki vosa o Iselaele, o fakasa kia latou le tokamalie ia Sesu-Kilisito, leia ko le Aliki o tagata fuli.

³⁷ Ti kua kotou iloa le nea leia na soko mua i Kalilea, o sosolo i Sutea katoa, i le oki o le akonaki mo le papitema a Soane.

³⁸ Ti kua kotou iloa le fakanofo e le Atua o Sesu mei Nasaleti i le Laumalie Maokioki mo le makeke. Ti kua kotou iloa foki le ano saele a Sesu i le fenua katoa o fai a nea malilie ti mo fakamauli latou fuli ala na saisai e le pule o le temonio, talie na nofo iate ia le Atua.

³⁹ Ko tagata fakamaoki matou o nea fuli ala na fai e ia i le fenua o le kau Sutea mo Selusalemi. Na lotou tamate a ia, o tautau i le laakau.

⁴⁰ Kae na toe fakatuuake a ia e le Atua i le tolu o aso, ti na fakataga e ia ke sa a ia,

⁴¹ o leai ki le kakai katoa, kae ki tagata fakamaoki ala na filifili fakatomua e le Atua, kia matou ala na kai mo inu fakatasi mo ia, i le oki o lona toe tuuake mei le kau mate.

⁴² Ti na fakatotonu mai e Sesu kia matou ke fakasa ki le kakai mo fakamaoki ko ia totonu leia kua fakanofo e le Atua ko le tui fakamaau o le kau mauli mo le kau mate.

⁴³ Ti na fakamaoki kiate ia le kau polofeta fuli : ko leia e tui kiate ia e tali loa e ia i lona suafa le fakamolemole o agasala.

Ifo o le Laumalie Maokioki ki le kau pagani

⁴⁴ Ti na koi puaki e Petelo a masau ana, ko leinei na ifo loa le Laumalie Maokioki kia latou fuli ala na fakalogo ki le folafola.

⁴⁵ Ti na punamauli loa le kau agatonu silikosisio leia na au mo Petelo, o tupu kua toe tufaki foki le nea alofa o le Laumalie Maokioki ki le kau pagani.

⁴⁶ Talie kua lotou logo kia latou e masau i masau kesekese, o fakakololia ki le Atua.

⁴⁷ Ti na pati loa Petelo : Pe mafai ke taofi le vai o le papitema kia latou ala kua tali ia le Laumalie Maokioki ofaipe tatou ?

⁴⁸ Ti na fakatotonu loa e ia ke papitema latou i le suafa o le Aliki. Ti na lotou kole loa kiate ia ke toe nofo mua mo latou i ni iki ake ga aso.