Filipe 4 - Tosi Tapu

¹ Koia, ei oku fetaina alofaina, koutou ala ko loku fiafia mo loku palaa, ke kotou tuu mau i le Aliki, ei oku alofaaga !

Tokoi fakamuli

² E kau kole kia Evoti ti e kau kole kia Sinitise ke la maua se manatu loto e tasi i le Aliki.

³ Ti ko koe foki, ko loku kaukau nea agatonu, io, e kau kole atu kiate koe ke ke tokoi kia laua, ala na tau fakatasi mo au ki le Evaselio, ti mo Kelemete mo la ake oku kaukau soa i le gaoi, latou ala kua tuu olatou igoa i le tosi o le mauli.

⁴ Kotou fiafia tuumau i le Aliki, e kau toe liuga atu a ia, kotou fiafia.

⁵ Ke iloa lokoutou agamalie e tagata fuli, kua ofi le Aliki.

⁶ Aua na kotou tokaga mamae ki se nea e tasi, kae kotou fakasa ki le Atua a nea ala e aoga kia koutou i ni kole, mo ni kolekole, ti mo ni fakafetai,

⁷ ti ko le tokamalie o le Atua, leia e fakalaka ake i atamai fuli, e taupau ia loa okoutou loto mo akoutou manatu ia Sesu-Kilisito.

⁸ Fakaoki loa, fetaina, kotou tokaga ki nea fuli ala e malilie ti mo gali i le fakavikiviki : tafito a nea fuli ala e maoki, mo fakaapaapa, mo totonu, mo mea, mo aloalofa, ti mo mata malie.

⁹ Ko le nea leia na kotou ako, mo kotou tali, ti mo kotou logo ki ai meiate au, ti mo le nea leia na kotou tio ki ai iate au, kotou fai a ia, ti e nofo loa le Atua o le tokamalie ia koutou.

Loto fakafetai o Paulo

¹⁰ Na kau logoi se fiafia lasi i le Aliki i laku tio kua kotou toe fakafoou le maoki o lokoutou alofa kiate au ; ko le maoki, na kotou manatu tuumau kiate au, kae na leaise kotou maua ia fua se faigamalie ke fakasa ai a ia.

¹¹ E leaise kau fakasa le nea lena, o tupu ko le mativa, talie kua kau ako ke kau fiafia i le nofo leia e kau nofo ai.

¹² E kau iloa le mauli i le mativa, ti e kau iloa le mauli i le mou. I nea fuli mo ganea fuli kua kau ako le makona ti mo le fia kai, le nofo i le mou ti mo le nofo i le oge.

¹³ E kau mafai a nea fuli i leia e fakamakeke ia au.

¹⁴ Kae logo ai le nea lena, kua kotou fai se nea malie i lakoutou kau ki loku faigataaia.

¹⁵ E kotou iloa e koutou totonu, kau Filipe, i le kamataaga o le akonaki o le Evaselio, i le temi leia na kau mavae ai mei le fenua o Masetonia, na leaise Ekelesia fua e tasi leia na loto fakafetai o soli mai kiate au se nea ;

¹⁶ ko kotou tefua ala na fai ia le nea lena, talie i Tesalonika, na kotou aumai le nea leia e aoga kiate au, o tua lua foki.

¹⁷ E leaise kau afa ni nea alofa, kae e kau afa le fua leia e fakalasi ia okoutou kau pepa.

¹⁸ Kua kau maua nea fuli, ti kua kau nofo i le mou ; kua kau apele pipi i koloa, i laku tali meia Epafolotito le nea leia e au meia koutou ofaipe se kaloni manogi malie, pe se sakilifisio leia e tali e le Atua, ti e mata malie kiate ia.

¹⁹ E tokaga loa loku Atua ki nea fuli ala e aoga kia koutou o mulimuli ki lona mou koloa, i le kololia, ia Sesu-Kilisito.

²⁰ Ke tuku ki lotatou Atua ko le Tamana le kololia i sekulo mo sekulo ! Amene !

Fakaalofa

²¹ Kotou fakaalofa ake ki le kau sagato fuli ia Sesu-Kilisito. E fakaalofa atu fetaina ala e nonofo mo au.

²² E fakaalofa atu kia koutou le kau sagato fuli, kae tafito latou o le fale o Sesale.

²³ Ko le kalasia o le Aliki ko Sesu-Kilisito ke nofo mo okoutou laumalie.