Filipe 3 - Tosi Tapu

Faifaitakiaga o Paulo

¹ Fakatoetoe, ei oku fetaina, kotou fiafia i le Aliki. E leaise kau kaekae fua i le tosi atu kia koutou o nea masani, talie e aoga a ia kia koutou.

² Kotou tokaga ki kuli, kotou tokaga ki tagata gaoi veveli, kotou tokaga ki le kau silikosisio loi.

³ Talie ko le kau silikosisio, ko tatou, ala e fai ia ki le Atua latatou atolasio i le Laumalie o le Atua, ti e fakakololia ia Sesu-Kilisito, kae e leaise tuku ia latatou fanaki ki le kanofi.

⁴ Ko au foki, e feala ke kau tuku laku fanaki ki le kanofi. Kapau e manatu se tasi e feala ke fanaki a ia ki le kanofi, e kau toe lasi ake,

⁵ ko au, na silikosisio au i le valu o aso, mei le lanu o Iselaele, mei le faasiga o Pesamino, Epeleo na tupu mei se Epeleo, ti faliseo i le lao ;

⁶ ti ki le tausi lotu, na kau fakaveliveli le Ekelesia ; ti ki le faitotonu o le lao, na kau lee mele.

⁷ Kae ko nea ana, ala na fai kiate au pe ni fakapale, kua kau tio kia latou ofaipe ni nea ke tiaki o tupu ko Kilisito.

⁸ Ti kua kau tio foki ki nea fuli ofaipe ni nea ke tiaki, o tupu ko le malie tukupau o le iloa o Sesu-Kilisito loku Aliki, leia kua kau fakafiti ai ki nea fuli ; ti e kau tio ki nea ana ofaipe se pela, o tupu ke maua Kilisito ;

⁹ ti ke maua au iate ia, o leai i laku faitotonu, leia e au mei le lao, kae i le faitotonu leia e maua i le tui kia Kilisito, le faitotonu leia e au mei le Atua i le tui.

¹⁰ Ti e kau iloa loa Kilisito, ti mo le makeke o lona toe tuuake, ti mo le komunio o ona mamae, i le fakatatau kiate ia i lona mate, ke kau kaku ai,

¹¹ mo kapau e kau fealagia, ki le toe tuuake mei le kau mate.

Makape ki le tauaga

¹² E leikiaise kau maua ia foki le fakapale, pe kua kau kaku ki le malie tukupau, kae e kau makape, o faiga ke kau kukumi a ia, talie kua kukumi foki au e Sesu-Kilisito.

¹³ Fetaina, e leaise kau manatu kua kau kukumi a ia ; kae e kau fai se nea e tasi : e kau galoi a nea i muli, kae e kau mafao o tio ki nea i mua,

¹⁴ ti e kau makape ki le tauaga, ke kau maua le fakapale o le kalaga mei lagi o le Atua ia Sesu-Kilisito.

¹⁵ Koia ko tatou fuli ala ko ni tagata kua katoa, ke tou maua le manatu lena ; ti kapau e kotou maua se tasi ake manatu, e fakamalamai loa koutou e le Atua i le nea foki lena.

¹⁶ Ko leia fua, i le nofo leia kua tou kaku ki ai, ke tou saele i se laka e tasi.

¹⁷ Kotou faifaitaki mai kiate au, fetaina, ti kotou tio kia latou ala e saele o mulimuli ki le faifaitakiaga leia e kotou maua ia matou.

¹⁸ Talie e toka api latou ala e saele ko ni fili o le koluse o Sesu-Kilisito, ala kua tua lasi laku tau masau ki ai, ti e kau toe masau atu nei ki ai mo ni tagi.

¹⁹ Ko lolatou fakaoki ko le pulinoa ; e lotou atua ki olatou manava, ti e lotou fakakololia latou i le nea leia e tonu ke lotou luma ai, talie lotou manatu fai ki nea o le malama nei.

²⁰ Kae kia tatou, e tuu lotatou kolo i lagi, leia e tou talitali foki mei ai ki lotatou fakamauli, le Aliki ko Sesu-Kilisito,

²¹ leia e fetogi ia loa lotatou tino fakaaloalofa, ke tatau mo lona tino fakakololia, i le pule leia e maua e ia ke aumai ai a nea fuli ke fakalogo kiate ia.