Filipe 1 - Tosi Tapu

Fakaalofa

¹ Paulo mo Timoteo, ko tagata fakasausau a Sesu-Kilisito, ki le kau sagato fuli ia Sesu-Kilisito ala i Filipe, ki le kau epikopo, ti mo le kau tiakono :

² Ke soli atu kia koutou le kalasia mo le tokamalie e le Atua lotatou Tamana ti mo le Aliki ko Sesu-Kilisito !

Alofa o Paulo ki le kau Filipe

³ E kau fakafetai ki loku Atua o uiga mo koutou i temi fuli e kau manatu ai kia koutou,

⁴ o leaise toe gato laku ulufaki koutou,

⁵ ti mo laku fakasa loku fiafia o tupu ko le vaega leia na kotou too i le Evaselio, talu mei le uluaki aso o kaku mai ki le aso nei.

⁶ E kau iloa papau ko leia na kamata ia ia koutou le gaoi malie lena e fakasoko ia loa a ia ke malie tukupau o kaku ki le aso o Sesu-Kilisito.

⁷ E totonu ke kau manatu fenaaki kia koutou fuli, talie e kau amo koutou i loku loto, pe i oku tini, pe i le taofi ti mo le fakamaoki o le Evaselio, koutou ala e kau fuli mo au ki le kalasia e tasi.

⁸ Talie e fakamaoki le Atua kiate au e kau alofa mamae kia koutou fuli i le alofa o Sesu-Kilisito.

⁹ Ti ko le nea leia e kau kole i aku faikole, ke tuputupua lokoutou alofa o lasi i le iloa ti mo le atamai katoa,

¹⁰ talie ke kotou iloa a nea ala e malilie tukupau, o tupu ke kotou mea mo lee mele ki le aso o Kilisito,

¹¹ ti ke kotou apele i le fua o le maokioki leia ia Sesu-Kilisito, ke kotou fakakololia ai mo fakavikiviki ai ki le Atua.

Ko le pilisoni o Paulo e aoga ki le fakamafola o le Evaselio

¹² E kau loto ke kotou iloa, fetaina, ko le nea leia na soko kiate au kua aoga tafito ki le fakamafola o le Evaselio.

¹³ Talie, i le fale katoa o le sau o Loma ti mo ganea fuli, e leaise koi puli ki se tasi oku sai ki tini o tupu ko Kilisito,

¹⁴ ti ko le lasiga o fetaina i le Aliki na loto makeke o tupu ko oku sai, ti mo toe asilisili toa o fakasa le Evaselio, sala i.

¹⁵ Ko le maoki, e fakasa e ni iki a Kilisito i se finenonofo ti mo se loto fefele ; kae e fakasa a ia e ni iki ake i ni manatu malilie.

¹⁶ E gaoi latou anei i le alofa, talie e lotou iloa kua fakanofo au ki le taofi o le Evaselio,

¹⁷ kae e fakasa e latou ake ala a Kilisito i se loto fefele, mo ni manatu ala e leaise mea ti mo le amanaki ke fakalasi oku sai ki ni iki mamae.

¹⁸ Kae e feaki foki ? Ko leinei, i nea fuli, pe i le fakakaka, pe i le maoki, e lotou fakasa Kilisito ; ti e kau fiafia i le nea lena, io, ti e kau toe fiafia loa i ai.

¹⁹ Talie kau iloa e maliu loa le nea lena ki loku fakamauli o tupu ko akoutou faikole ti mo le tokoi a le Laumalie o Sesu-Kilisito ;

²⁰ o mulimuli ki loku oli makeke ti mo laku amanaki malie, e leaise kau luma loa i se nea fua, kae i le temi nei ofaipe temi fuli ai, e fakakololia loa Kilisito i loku tino, pe kau mauli, pe kau mate ;

²¹ talie ko Kilisito ko loku mauli, ti ko le mate ko se fakapale a ia kiate au.

²² Kae kapau e aoga ki laku gaoi ke kau mauli i le tino, e leaise kau iloa loa le nea leia e tonu ke kau filifili.

²³ Talie e toso au e nea e lua : E kau oli ke kau ano, o nofo mo Kilisito ; ko se nea a ia leia e malie tukupau ake ;

²⁴ kae o tupu ko koutou, e aoga ake ke kau nofo i le tino.

²⁵ Ti e kau iloa papau i loku loto, e kau iloa e kau mauli loa o nofo mo koutou fuli, ki lokoutou saele ki mua ti mo lokoutou fiafia i le tui,

²⁶ o tupu, i laku toe liliu atu kia koutou, ke kotou maua iate au se nea ke kotou fakakololia ai ia Sesu-Kilisito.

Fakamakeke ki le faa kataki

²⁷ Koleia fua, kotou saele i se saele leia e gali mo le Evaselio o Kilisito, o tupu, pe kau natu o tio kia koutou, pe kau puli, ke kau logo e kotou tuu makeke i se loto e tasi, o tau i se laumalie e tasi ki le tui o le Evaselio ;

²⁸ ti ke aua na kotou i ki nea ala e au mei okoutou fili, talie ko se fakamaoki a ia o le malaia kia latou, kae o le mauli kia koutou ;

²⁹ ti e au le nea lena mei le Atua, talie kua tuku atu kia koutou le kalasia, o tupu ko Kilisito, ke aua na gato fua i lakotou tui kiate ia, kae ke kotou toe mamae foki o tupu ko ia,

³⁰ o too lokotou vaega i le tau leia na kotou tio na kau fai i mua, ti e kotou iloa e kau fai nei.