Filemo 1 - Tosi Tapu

Fakaalofa

¹ Ko au Paulo, ko le tagata pilisoni a Sesu-Kilisito, ti mo le taina ko Timoteo, kia Filemo, ko loma alofaaga mo loma kaukau nea i le gaoi,

² ki le tuagaane ko Afia, mo Alesipe ko loma kaukau nea i le tau, ti mo le Ekelesia leia i lou fale :

³ Ke soli atu kia koutou le kalasia mo le tokamalie e le Atua ko lotatou Tamana ti mo le Aliki ko Sesu-Kilisito !

⁴ E kau fakafetai ki loku Atua, o sua mau aifuai a koe i aku faikole,

⁵ talie kua kau logo ki le tui leia e ke maua ki le Aliki ko Sesu, ti mo lou alofa ki le kau sagato fuli.

⁶ E kau kole kiate ia ke fakatupu e le komunio leia e sai ia akoe kia maua i le tui, se iloa lasi o nea malilie fuli ala e tou maua i lotatou mauli ia Kilisito.

⁷ Koia na kau logoi ai se fiafia lasi mo se fakapelepele o tupu ko lou alofa ; talie kua ke fakafimalie ia, ei taina, le loto o le kau sagato.

Kole a Paulo o uiga mo Onesimo

⁸ Koia, logo ai e kau maua ia Kilisito le lauatea katoa ke kau fakatotonu atu kiate koe le nea leia e totonu,

⁹ kae e kau fai mua kiate koe i le igoa o le alofa se tagi, e au Paulo, ko se matua, ti ko se tagata pilisoni foki i le temi nei a Sesu-Kilisito.

¹⁰ E kau kole atu kiate koe, o tupu ko laku fanau ko Onesimo, leia na kau fanaui i oku tini,

¹¹ leia na leaise aoga i mua kiate koe, kae i le temi nei kua aoga kiate koe ti mo au.

¹² E kau kakau atu a ia kiate koe, a ia ko se koga o oku totonu.

¹³ Na kau fia taofi a ia kiate au, o tupu ke tausi a ia kiate au o fetogi a koe, i le temi leinei e kau nofo ai i tini o tupu ko le Evaselio.

¹⁴ Kae na leaise kau loto ke fai se nea leia e leaise ke loto ki ai, o tupu ke aua na sakinake e fakamakeke lou tokoi, kae ke fai a ia i le loto malie.

¹⁵ Na saga na mavae a ia meiate koe i se ga temi noa, o tupu ke ke toe maua a ia ki le lee gato,

¹⁶ kae e leaise koi faipe se tagata popula, kae kua taualuga ake i le tagata popula, ofaipe se taina alofaina, uluaki mua kiate au, ti toe lasi ake kiate koe, i le tino, ti mo le Aliki.

¹⁷ Kapau loa e ke lau au ko lou kaukau nea, ke ke tali a ia ofaipe au totonu.

¹⁸ Ti kapau kua fai e ia se veli kiate koe, pe kua tuu maua a ia kiate koe, lau a ia kiate au.

¹⁹ Ko au Paulo, e kau fai tosi atu i loku lima totonu, e kau totogi loa a ia kiate koe : (kae e leaise kau pati atu kiate koe e ke tuu maua kiate au).

²⁰ Io, taina, ke kau maua meiate koe le alofa lena i le Aliki ; fakafimalie loku loto ia Kilisito.

²¹ E kau fai tosi atu kiate koe talie e kau fanaki ki lau fakalogo, ti e kau iloa e ke fai loa o lasi ake i le nea leia e kau pati atu ki ai.

²² Ti ko le tasi a nea, ke ke teuteui mai kiate au se nofoaga, talie e kau amanaki malie kua vave fua loku tuku atu kia koutou, o tupu ko akoutou faikole.

²³ E alofa atu kiate koe a Epafalasi, ko loku kaukau nea i le pilisoni ia Sesu-Kilisito,

²⁴ mo Maleko, mo Alisitake, mo Temasi, mo Luka, ko oku kaukau nea i le gaoi.

²⁵ Ko le kalasia o lotatou Aliki ko Sesu-Kilisito ke nofo i lou laumalie !