Esitele 9 - Tosi Tapu

Lagavaka a le kau Sutea ki olatou fili

¹ I le masina kau agafulu tupu lua, leia ko le masina o Atale, i le aso tolu o le masina, aso leia e tonu ke fakasoko ai le fakatotonu mo le lao a le sau, ti ko le aso lena na amanaki ki ai a fili o le kau Sutea ke lotou pulei ai loa le kau Sutea, na mafuli loa a nea fuli, ti na pulei loa e le kau Sutea olatou fili.

² Na fakatasi loa le kau Sutea i olatou kolo, i fenua fuli o le sau ko Asuelusi, ke lotou taofi latou fuli ala na loto ki lolatou puli ; ti na leaise tasi fua na mafai ke tuu i olatou mua, talie kua vilo ki kakai fuli le i ki le kau Sutea.

³ Ti na tokoi loa ki le kau Sutea a pule fuli o fenua, mo tagata mauiga fuli, mo kovana, mo tagata lalasi a le sau, o tupu ko lolatou i kia Maletoseo.

⁴ Ti na makeke Maletoseo i le fale o le sau, ti na mafola lona logologona i fenua fuli, talie na fakaau a ia o asilisili makeke.

⁵ Na taai loa e le kau Sutea olatou fili fuli ki le seleta, mo se matea lasi, ti mo se maumaui lasi. Na lotou fai loa ki olatou fili o mulimuli ki olatou loto.

⁶ I Suse, le kolo mua, na tamate loa o fakapuli e le kau Sutea ni tagata e tino lelau lima,

⁷ Ti na lotou tamate loa a Palesanatata, mo Talefono, mo Asipate,

⁸ Mo Polata, mo Atalia, mo Alitate,

⁹ Mo Palemasita, mo Alisai, mo Alitai ti mo Vasesata,

¹⁰ Mo vosa e tino agafulu o Amane, vosa o Ametata, le fili o le kau Sutea. Kae na leaise lotou maumaui loa le kolo.

¹¹ I le aso lena, na fakasa ki le sau le lasi o latou ala na tamate i Suse, le kolo mua.

¹² Ti na pati loa le sau ki le fafine sau ko Esitele : Kua tamate e le kau Sutea i Suse, le kolo mua, ni tagata e tino lelau lima, ti mo vosa e tino agafulu o Amane ; kolea loa le nea kua lotou fai i la ake fenua o le sau ? Kolea lau kole ? E soli atu loa a ia. Kolea lou oli ? E ke maua loa a ia.

¹³ Ti na tali loa Esitele : Kapau e malie ki le sau, ke fakataga ki le kau Sutea ala i Suse ke toe gaoi i apogipogi o mulimuli ki le lao o le aso nei, ti ke tautau ki le laakau a vosa e tino agafulu o Amane.

¹⁴ Na fakatotonu loa e le sau ke fai ki ai. Ti na fakasa loa le lao lena i Suse. Ti na tautau loa ki le laakau a vosa e tino agafulu o Amane.

¹⁵ Ti na fakatasi loa le kau Sutea o Suse i le aso kau agafulu tupu fa o le masina o Atale, ti na lotou tamate loa ni tagata e tino lelau tolu, kae na leaise lotou maumaui le kolo.

¹⁶ Na fakatasi foki le kau Sutea leia na nofo i la ake fenua o le sau, o puipui olatou mauli ; ti na lotou maua loa le malolo i lalatou saofaki latou mei olatou fili, ti na lotou tamate ni tagata e tino fitu tupu lima afe i olatou fili, kae na leaise lotou maumaui loa a kolo.

Fakatuu o le aso o Pulimi

¹⁷ Na soko a nea ana i le aso kau agafulu tupu tolu o le masina o Atale. Na malolo loa le kau Sutea i le aso kau agafulu tupu fa, ti na lotou fakatuu loa le aso lena ko se aso fakafiafia.

¹⁸ Na fakatasi loa latou ala na nonofo i Suse i le aso kau agafulu tupu tolu, mo le aso kau agafulu tupu fa, ti na lotou malolo loa i le aso kau agafulu tupu lima, ti na lotou fakatuu loa le aso lena ko se aso lasi mo fakafiafia.

¹⁹ Koia leia na fakatuu ai e le kau Sutea o kolo vao, mo latou ala e nonofo i kolo, le aso kau agafulu tupu fa o le masina o Atale ko se aso fakafiafia, mo se aso kai, ti mo se aso lasi, leia e fai ai ni nea alofa.

²⁰ Na tosi loa e Maletoseo a nea ana, ti na kakau loa e ia ke ave ni tosi ki le kau Sutea fuli ala e nonofo i fenua fuli o le sau, feofi pe mamao.

²¹ Na tosi loa e ia kia latou ke lotou tausi i fetuu fuli le aso kau agafulu tupu fa mo le aso kau agafulu tupu lima o le masina o Atale,

²² ofaipe ni aso ala na malolo ai le kau Sutea i olatou fili, ke lotou fakamanatu le masina leia na fetogi ai lolatou mamae ki le fiafia, lolatou tagi ki se aso malie, ke lotou fai ki aso ana ni aso kai mo fakafiafia, ti ke lotou fai ni nea alofa ia latou mo ni nea alofa ki le kau mativa.

²³ Ti na fakapapau loa e le kau Sutea ke lotou fai le nea leia na lotou aga o kamata ti na tosi Maletoseo kia latou.

²⁴ Talie na fakakaukaui e Amane, vosa o Ametata, le tagata Akake, le fili o le kau Sutea, ke tamate latou, ti na ti e ia le pulimi, ko lona uiga le toso, o tupu ke iloa ai le aso leia e tonu ke tamate ai latou ti ke maumaui ai latou ;

²⁵ Kae i le ano a Esitele ki mua o le sau, na fakatotonu loa e le sau i se tosi ke toe fakavilo ki le ulu o Amane le fakatuutuu veli leia na fai e ia ki le kau Sutea, ti ke tautau a ia ki le laakau, a ia mo ona vosa.

²⁶ Koia na fakaigoa ai loa a aso ana : Ko Pulimi, mei le kupu Puli. Na fai loa e le kau Sutea o mulimuli ki nea fuli o le tosi lena, ti mo nea fuli ala na lotou tio totonu ki ai, ti mo nea ala na fai kia latou.

²⁷ Na fai loa e le kau Sutea le fakamaua mo le fakatotonu kia latou, mo olatou sakoga, ti mo latou fuli ala e pipiki loa kia latou, ke fakamanatu i fetuu fuli a aso ana e lua o mulimuli ki le nea leia kua tosi.

²⁸ E tonu loa ke fakamanatu mo tausi a aso ana i tautupu mo tautupu, i le famili taki tasi, i le fenua taki tasi, ti mo le kolo taki tasi ; ti e leaise tonu loa ke puli a aso ana o le Pulimi i loto malie o le kau Sutea, pe ke puli lona fakamanatu i olatou sakoga.

²⁹ Na fai loa e le fafine sau ko Esitele, taine o Apikaile, ti mo le tagata Sutea ko Maletoseo, se tosi, i se pule lasi, ke fakamaoki tua lua ai le tosi ki le Pulimi.

³⁰ Na ave loa ni tosi ki le kau Sutea fuli i fenua e kau lelau kau lua tupu fitu o le sau ko Asuelusi. Ti na ave i ai ni fakaamu ki le tokamalie mo le agatonu.

³¹ Na fakamaoki loa e tosi ana le aso o Pulimi i lona aso totonu, leia na fakatuu e le fafine sau ko Esitele mo le Sutea ko Maletoseo kia latou, ofaipe le fakatuutuu leia na fai kia latou mo olatou sakoga, i le aso leia na lotou sesunio ai mo tagi ai.

³² Na fakamaoki loa e le fakatotonu a Esitele le fakatuu o aso o Pulimi, ti na tosi loa le nea lena i le tosi.