Esitele 7 - Tosi Tapu

Kole a Esitele ; mate o Amane

¹ Na ano loa le sau mo Amane ki le kaitasi i le fale o le fafine sau ko Esitele.

² Ko le lua aso lena, ti na toe pati loa le sau kia Esitele, i le lolotoga inu o le vino : Kolea lau kole, fafine sau Esitele ? E soli atu loa a ia kiate koe. Kolea e ke oli ki ai ? Kapau ko le vaelua o le puleaga, e ke maua loa a ia.

³ Na tali loa le fafine sau ko Esitele : Kapau kua kau maua se kalasia i ou mata, ei aliki sau, ti kapau e malie le nea leinei ki le sau, soli mai kiate au le mauli, ko laku kole a ia, ti saofaki loku kakai, ko le oli a ia o loku loto !

⁴ Talie kua fakatau matou, a au mo loku kakai, ke maumaui, ke tamate, ke fakapuli. Ti kapau na fakatau matou ke motou liliu fua ko ni tagata mo ni fafine fakasausau, e kau fakaleemu loa, talie e leaise uiga ke fakapakia le sau ki le nea lena.

⁵ Ti na masau loa le sau ko Asuelusi ki le fafine sau ko Esitele, o pati : Ko ai a ia, ti kofea a ia, leia kua fia nealasi i lona loto ke fai ia le nea lena ?

⁶ Na tali loa Esitele : Ko le tagata agatuu, ko le fili, ko Amane, le tagata agaveli lena ! Na maua loa e Amane se i lasi i mua o le sau mo le fafine sau.

⁷ Ti na tuu ake loa le sau ki aluga, i lona ita lasi, o mavae i le kai, ti na ulu loa a ia ki fafo ki le oloto o le fale sau. Na nofo loa Amane o kole ki le fafine sau ko Esitele ke soli ake kiate ia lona mauli, talie kua tio malie a ia kua fakatuutuu i le loto o le sau se veli kiate ia.

⁸ I le toe liliu mai a le sau mei le oloto o le fale sau ki le kogafale o le kai, na tio loa a ia ki le oso a Amane ki le palepale leia na nofo ai Esitele, ti na pati loa a ia : Pe toe loto foki a ia ke fakamakekei e ia le fafine sau i oku mua, i loku fale sau ? I le temi fai leia na ulu mai ai le masau lena mei le gutu o le sau, na puloui loa a mata o Amane.

⁹ Ti na pati loa Alepona, ko se tasi o le kau enuke a le sau, i mua o le sau : Ko leinei le laakau leia na teuteui e Amane kia Maletoseo, leia na masau ki le malie o le sau, kua tuu i le malae o le fale o Amane, ti e meta kau lua tupu lima lona taualuga. Na pati loa le sau : Ke tautau Amane ki ai !

¹⁰ Ti na tautau loa a Amane ki le laakau leia na teuteui e ia kia Maletoseo. Ti na malu loa le ita o le sau.