Esitele 6 - Tosi Tapu

Siki o Maletoseo ; luma o Amane

¹ I le po lena, na leaise feala ke moe le sau, ti na pati loa a ia ke aumai le tosi fakamatala o nea fakapuleaga, le tosi o Koloniko. Na lau loa latou i mua o le sau,

² ti na maua loa i ai le nea leia na fakasa e Maletoseo o uiga mo Pikitane mo Telese, a enuke a le sau, tagata leoleo matapa, ala na loto ke teki ola lima ki le sau ko Asuelusi.

³ Na pati loa le sau : Kolea le fakamailoga malie mo le fakamauiga na maua e Maletoseo o uiga mo le nea lena ? Ti na tali loa latou ala na tausi ki le sau : Na leaise maua e ia se nea.

⁴ Ti na pati loa le sau : Ko ai i le malae ? Talie na au Amane ki le malae o le fale o le sau, ke kole ki le sau ke tautau Maletoseo ki le laakau leia na teuteui e ia.

⁵ Na tali loa a tagata fakasausau a le sau kiate ia : Ko Amane leia e tuu i le malae. Ti na pati loa le sau : Ke ulu mai a ia.

⁶ Na ulu loa Amane ki fale, ti na pati loa le sau kiate ia : Kolea le nea e tonu ke fai ki se tagata leia e loto le sau ke fakamauiga ? Na pati loa Amane i lona loto : Ko ai foki se tasi ake iate au leia e loto le sau ke fakamauiga ?

⁷ Ti na tali loa Amane ki le sau : Ki se tagata leia e loto le sau ke fakamauiga,

⁸ E tonu ke too le kofu fakasau leia e tui e le sau mo le osi leia e eke ai le sau ti e teki i lona ulu se pala fakasau,

⁹ Ti ke tuku le kofu mo le osi ki se tasi i le kau pule lalasi a le sau, ti ke fakakofu le tagata leia e loto le sau ke fakamauiga, ti ke fakaevaeva a ia i le osi i le malae lasi o le kolo, ti ke kalaga i ona mua : E fai feneeki loa ki le tagata leia e loto le sau ke fakamauiga !

¹⁰ Na pati loa le sau kia Amane : Too nei le kofu mo le osi, ofaipe lau pati, ti ke fai fenaaki kia Maletoseo, le tagata Sutea, leia e tonatona i le matapa o le sau ; aua na ke tiaki se nea i nea fuli ala kua ke pati ki ai.

¹¹ Ti na too loa e Amane le kofu mo le osi, ti na fakakofu loa e ia ki ai Maletoseo, ti na fakaevaeva loa e ia a ia i le osi i le malae lasi o le kolo, ti na kalaga loa a ia i ona mua : E fai feneeki loa ki le tagata leia e loto le sau ke fakamauiga !

¹² Na toe liliu loa Maletoseo ki le matapa o le sau, kae na ano fakatavili loa Amane ki lona fale, kua uufi ona mata i le lasi o lona luma.

¹³ Na fakamatala loa e Amane kia Selesa, lana avaga, mo ona kaukaunea fuli, le nea katoa leia kua soko kiate ia. Ti na pati loa ana tagata popoto fuli mo Selesa, lana avaga, kiate ia : Kapau ko Maletoseo, leia kua ke kamata vilo ai i ona mua, e kau maoki ki le kau Sutea, ti e leaise ke mafai loa se nea kiate ia, kae e ke vilo loa i ona mua.

¹⁴ Koi lotou lolotoga masau kiate ia, kae kaku mai loa a enuke a le sau, o taki aifai Amane ki le kai leia na teuteui e Esitele.