Esitele 5 - Tosi Tapu

Esitele i mua o le sau

¹ I le tolu o aso na tui loa e Esitele ona teu fakasau ti na ulu loa a ia ki le malae loto o le fale o le sau, i mua o le fale o le sau. Na nofo le sau i lona ekeekeaga fakasau i lona fale, o tautonu mo le matapa ulu.

² I le tio a le sau ki le tuu a le fafine sau ko Esitele i le malae, na maua loa e Esitele se kalasia i ona mua, ti na velo loa e ia kia Esitele le tokotoko aulo leia na too e ia i lona lima. Na fakafeofi loa Esitele, o fafa ki le tumutumu o le tokotoko fakasau.

³ Ti na pati loa le sau kiate ia : Kolea le nea kua soko kiate koe, fafine sau Esitele, ti kolea lau kole ? Kapau foki ko le vaelua o le puleaga, e soli atu loa a ia kiate koe.

⁴ Na tali loa Esitele : Kapau e malie ki le sau, ti ke au le sau i le aso nei mo Amane ki le kai leia kua kau teuteui kiate ia.

⁵ Ti na pati loa le sau : Kotou ano nei o afa mai Amane, ofai ki le loto o Esitele. Ti na ano loa le sau mo Amane ki le kai leia na teuteui e Esitele.

⁶ I le lolotoga inu o le vino, na pati loa le sau kia Esitele : Kolea lau kole ? E soli atu loa a ia kiate koe. Kolea e ke oli ki ai ? Kapau foki ko le vaelua o le puleaga, e ke maua loa a ia.

⁷ Ti na tali loa Esitele : Ko leinei le nea leia e kau kole ti mo le nea leia e kau oli ki ai.

⁸ Kapau kua kau maua se kalasia i mata o le sau, ti kapau e fiafia le sau o tali malie laku kole mo fai le nea leia e kau oli ki ai, ke toe au le sau mo Amane ki le kai leia e kau teuteui loa kia laua, ti e kau tuku loa laku tali ki le sau o mulimuli ki lana fakatotonu.

Teuteu o Amane ke tamate Maletoseo

⁹ I le aso lena na mavae loa Amane i le fiafia mo se loto fimalie. Kae i lana tio, i le matapa o le sau, kia Maletoseo leia na leaise tuu ki aluga pe tutuli i ona mua, na apele loa a ia i le ita kia Maletoseo.

¹⁰ Kae na mafai lana taofi a ia, ti na ano loa a ia ki lona fale. Ti na kakau loa e ia ke afa mai ona kaukaunea mo Selesa, lana avaga.

¹¹ Na masau loa Amane kia latou ki le lasi mo le fulumalie o ona koloa, mo le lasi o ona vosa, mo nea fuli ala na fai e le sau ke fakaalialiki ai a ia, mo le tuulaga leia na soli ake e le sau kiate ia i aluga o le kau pule mo le kau tagata fakasausau a le sau.

¹² Ti na pati foki a ia : Ko au fai foki toka tasi leia na fakataga e le fafine sau ko Esitele ke ano mo le sau ki le kai leia na teuteui e ia, ti e toe fakaafe foki au i apogipogi ki lona fale mo le sau.

¹³ Kae e leaise kau maua se fiafia i nea fuli ana mo kapau e kau tio tuumau kia Maletoseo, le tagata Sutea, e tonatona i le matapa o le sau.

¹⁴ Na pati loa Selesa, lana avaga, mo ona kaukaunea fuli kiate ia : Ke teuteui se laakau ke meta kau lua tupu fitu lona taualuga, ti ke kole loa ki le sau i apogipogi ke tautau i ai a Maletoseo ; ti o ke ano loa i le fiafia ki le kai mo le sau. Na malie le manatu lena kia Amane ti na fakatotonu loa e ia ke teuteui le laakau.