Esitele 2 - Tosi Tapu

Filifili o Esitele

¹ I le sili o nea ana, ti kua oki le ita o le sau ko Asuelusi, na manatu loa a ia kia Vaseti, mo le nea leia na fai e ia, ti mo le tonu leia na too kiate ia.

² Ti na pati loa latou ala na tausi ki le sau : Ke afa mai ki le sau ni taineliki taupoou mo fulumalilie ;

³ Ke fakanofo e le sau i fenua fuli o lona puleaga ni kau tagata, o tupu ke lotou tanaki fakatasi a taineliki taupoou mo fulumalilie fuli ki Suse, le kolo mua, ki le fale o fafine, ti ke leoleo kia latou a Ekai, le enuke a le sau, leia ko le tagata leoleo o fafine, leia e soli ia loa kia latou a nea fuli ala e aoga ki lolatou teuteui ;

⁴ Ti e mailoga le taine leia e malie loa ki le sau, ke liliu loa a ia ko le fafine sau o fetogi Vaseti. Na malie loa le manatu lena ki le sau ti na fai loa a ia ki ai.

⁵ Na i ai i Suse, le kolo mua, se tagata Sutea leia na igoa ko Maletoseo, vosa o Saili, vosa o Simei, vosa o Kise, tagata meia Pesamino,

⁶ Leia na aumai fakapopula mei Selusalemi, mo latou ala na aumai fakapopula mo Sekonia, sau o Suta, e Nepukatenesale, sau o Papilone.

⁷ Na taupau e ia a Atasa, leia na igoa ko Esitele, ko le taine o lona tuatinana, talie na leai sona tamana mo sona tinana. Na kuaga malie ti na mata malie ai le taine taupoou. I le mate o lona tamana mo lona tinana, na vavae a ia e Maletoseo ko lona taine.

⁸ I le fakasa o le fakatotonu a le sau mo lana lao, na fakatasii loa ki Suse, le kolo mua, ni taineliki mauke ai, o tuku latou ke leoleo e Ekai. Na too foki mo Esitele, o ave ki le fale o le sau, ke leoleo e Ekai, le tagata leoleo o fafine.

⁹ Na malie loa le taine ki mata o Ekai, ti na maua loa e ia se kalasia i ona mua : ti na fakatavili loa a ia o tuku kia Esitele a nea fuli ala na aoga ki lona teuteui mo lana kai, ti na soli loa e ia kiate ia ni taineliki e toka fitu ala na filifili i le fale o le sau, ti na tuku loa e ia a Esitele mo lana kau taineliki ki le potu malie o le fale fafine.

¹⁰ Na leaise fakasa fua e Esitele lona kakai mo lona fale, talie na tapui e Maletoseo kiate ia le masau ki nea ana.

¹¹ Ti na evaeva loa Maletoseo i mua o le malae o le fale o fafine, i aso fuli, ke iloa pe feaki Esitele, ti kolea e fai loa kiate ia.

¹² Na fakaoloolo a taineliki taki toka tasi o ulu ki le sau ko Asuelusi, i le oki o lana fai i masina e kau agafulu tupu lua a nea fuli ala na fakatotonu ki fafine ; i le temi lena, na lotou tokaga ki le teuteui o olatou tino, i masina e ono ki le lolo o le mila, mo masina e ono ki ni nea fakamanogi mo kaloni ala na fakaaoga masani e fafine.

¹³ Na fenaaki loa le ano o taineliki taki toka tasi ki le sau ; ti ka ano a ia i le fale o fafine ki le fale o le sau, na tuku kiate ia ke too e ia a nea fuli ala e loto a ia ki ai.

¹⁴ Na ulu a ia ki ai i le afiafi ; ti na mavae ake a ia i le usu ki le lua o fale o fafine, leia na leoleo e Saasekase, ko le enuke a le sau ki le tausi o lana kau tinifu. Na leaise toe liliu a ia ki le sau, kae kapau e toe oli loa le sau kiate ia, ti e kalagai loa a ia i lona igoa.

¹⁵ Ti na soko loa le lakaga o Esitele, ko le taine o Apikaile, tuatinana o Maletoseo, leia na taupau ia a ia ko lona taine, ke ano ai ki le sau, ti na kole loa e ia le nea fai leia na fakatotonu ake e Ekai, le enuke a le sau ki le tausi o fafine. Na alofaia Esitele e latou fuli ala na tio kiate ia.

¹⁶ Na taki loa Esitele ki le sau ko Asuelusi i lona fale fakasau, i le masina kau agafulu, leia ko Tepete, i le fetuu fitu o le sau a Asuelusi.

¹⁷ Na mamana lasi loa le sau kia Esitele o lasi ake i la ake fafine fuli, ti na maua loa e ia le kalasia mo le alofa i mua o le sau o lasi ake i la ake taineliki fuli. Na teki loa e ia le pala fakasau ki le ulu o Esitele, ti na fakanofo loa e ia Esitele ko le fafine sau o fetogi Vaseti.

¹⁸ Na fai loa e le sau se kai lasi ki lana kau aliki katoa mo lana kau tagata fakasausau, ko se kai lasi kia Esitele : ti na tuku loa e ia ni aso veteki popula i fenua fuli, ti na fai loa e ia ni nea alofa o gali mo lona kaisolisoli.

Iloa e Maletoseo o le fono ke tamate Asuelusi

¹⁹ I le fakatasii tua lua o taineliki, na tonatona Maletoseo i le matapa o le sau.

²⁰ Na leaise fakasa e Esitele lona fale ti mo lona kakai, talie na tapui a ia e Maletoseo kiate ia, ti na mulimuli katoa a ia ki fakatotonu a Maletoseo ofaipe le temi leia na koi fakalogo ai a ia kiate ia.

²¹ I aso ana, na nofo Maletoseo i le matapa o le sau, ti na ita loa ki le sau a Piketane mo Telese, ko enuke e toka lua a le sau, ko ni tagata leo matapa, ti na la loto loa ke tamate le sau ko Asuelusi.

²² Kae na iloa loa e Maletoseo le nea lena ti na fakasa loa e ia ki le fafine sau ko Esitele, leia na toe fakasa ia loa a ia ki le sau, i le igoa o Maletoseo.

²³ Ti na fai loa se afa ki le nea lena, ti na iloa loa lona maoki : Na tautau loa le sa enuke ki se laakau. Ti na tosi loa le nea lena ki le tosi isitolia i mua o le sau.