Esetalasi 9 - Tosi Tapu

Kole mo le kofesio a Esetalasi o tupu ko avaga mo fafine matapule

¹ I le oki o nea fuli ana, na au loa le kau pule, o pati mai kiate au : Ko le kakai o Iselaele, mo le kau faisakilifisio, ti mo le kau Levi, e leaise lotou mavae kese fua mei le kakai o le fenua leinei, ti kua lotou faifaitaki alatou aga fakalialia, a aga a le kau Kanaane, mo le kau Eti, mo le kau Felesi, mo le kau Sepusi, mo le kau Amone, mo le kau Moape, mo le kau Esipito, ti mo le kau Amole.

² O tupu kua lotou avaga mo ni taineliki o fenua ana, ti kua toe felaaki mo olatou vosa, ti kua lotou filo le lanu tapu mo le kakai o fenua pagani anei ; ti ko le kau pule mo le kau tui fakamaau, ala na uluaki fai ia le agasala lena.

³ I laku logo ki le nea lena, na kau sae loa oku kofu mo loku taupulupulu, ti na kau futi loa oku fului ulu mo loku kaukava, ti na kau tonatona loa i le mamae.

⁴ Na fakatasi mai loa ki oku tafa latou fuli ala na i ki folafola a le Atua o Iselaele, o tupu ko le patigataa o vosa o le popula ; ti ko au, na kau tonatona loa i le mamae o kaku ki le temi o le moliga o le afiafi.

⁵ I le temi o le moliga o le afiafi, na kau tuu ake loa mei loku mafaia, mo oku kofu ti mo loku taupulupulu masaesae ; na kau tutuli loa ki lalo, o siki oku lima ki le Eteleno, loku Atua,

⁶ ti na kau pati : Ei loku Atua, e kau nofo i le mafaia ti e kau luma, ei loku Atua, i le tio kiate koe ; talie kua fakalaka amatou agaveli i omatou ulu, ti kua kaku amatou agasala ki le lagi.

⁷ Talu mei aso o omatou tamana kua motou agasala lasi o kaku mai ki le aso leinei. Ti ko amatou agasala ala kua tuku ia matou, mo omatou sau, mo omatou tagata faisakilifisio, ki lima o sau matapule, mo le seleta, mo le popula, mo le maumau, ti mo le luma leia kua ufiufi ia omatou mata i le aso nei.

⁸ Kae logo ai a nea ana, na alofa kia matou le Eteleno, lomatou Atua, o fakamauli ni iki o matou, ti kua soli mai e ia kia matou se mumuniaga i lona nofoaga tapu, o tupu ke fakamalamai ai omatou mata mo soli mai ai kia matou se malolo i lotolotoga o lomatou popula.

⁹ Talie e motou popula, kae na leaise tiaki matou e le Atua i le lolotoga o lomatou popula. Kua fakaliliu e ia a sau o Pelesi ke alofa kia matou, o fakamauli matou, mo fakataga ke motou fakatuu le fale o lomatou Atua, o toe fakafoou ona potu kua maumau, ti mo tuku kia matou se malolo i Suta mo Selusalemi.

¹⁰ I le lakaga nei, kolea loa lamatou pati i le oki o nea ana, ei lomatou Atua ? Talie kua motou tiaki au fakatotonu,

¹¹ ala na ke tuku ki au tagata fakasausau, le kau polofeta, o pati : Ko le fenua leia ka kotou ulu loa ki ai, o maua ma koutou, ko se fenua a ia e kelekele o tupu ko aga fakakelekele o kakai o fenua ana, mo agaveli, ala kua lotou fakaapele ki ai le fenua mei leia potu ki leia potu.

¹² Koia, aua na kotou soli loa okoutou taineliki ki olatou tamaliki, ti aua na kotou too loa olatou taineliki ke avaga mo okoutou vosa, ti aua na kotou afa loa ke lotou fimalie ti ke lotou mou koloa ; o tupu ke kotou liliu loa o makeke, ti mo kotou kai loa a fua malilie o le fenua, ti mo kotou tuku loa le fenua ko se tofiga ki okoutou vosa, o lee gato.

¹³ I le sili o nea fuli ala kua soko kia matou, o tupu ko amatou gaoi veveli mo amatou sala lalasi ala na motou fai, kae na leaise ke tautea matou, ei lomatou Atua, o mulimuli ki le lasi o amatou agaveli ; ti ko leinei kua ke fakamauli ni iki,

¹⁴ pe motou toe kamata maumaui loa au folafola o fakatasi mo kakai fakalialia ana ? Pe leaise toe vilo loa lou sausau kia matou, o maumaui fuli matou ke aua na toe mauli se tasi ?

¹⁵ Eteleno, Atua o Iselaele, e ke faitotonu, talie koi mauli ni iki o matou i le aso nei. Ko nei matou i ou mua ko ni tagata agasala, kae na leaise tonu ke motou tutuu i ou mua.