Esetalasi 8 - Tosi Tapu

Kau ano o Esetalasi mei Papilone

¹ Ko nei a pule famili mo sakoga o latou ala na pale mai mo au mei Papilone i le sau a Aletasese :

² I vosa o Finesi : ko Kelesoni ; i vosa o Itamale : ko Taniela ; i vosa o Tavite : ko Atuse ;

³ i vosa o Sekania, i vosa o Paleoke : ko Sakalia, ti na tosi mo ia se kau tagata na tino lelau mo le tino lima ;

⁴ i vosa o Pasate-Moape : ko Elioenai, vosa o Selakesa, mo tagata e tino lelau lua,

⁵ i vosa o Sekania : ko le vosa o Sakasiele, mo tagata e tino lelau tolu ;

⁶ i vosa o Atine : ko Epeti, vosa o Sonatane, mo tagata e tino lima ;

⁷ i vosa o Elame : ko Esaia, vosa o Atalia, mo tagata e tino fitu ;

⁸ i vosa o Sefatia : ko Sepatesa, vosa o Misaele, mo tagata e tino valu ;

⁹ i vosa o Soape : ko Apetiasi, vosa o Seiele, mo tagata e tino lelau lua tino agafulu tupu valu ;

¹⁰ i vosa o Selomite : ko le vosa o Sosifia, mo tagata e tino lelau tino ono ;

¹¹ i vosa o Pepai : ko Sakalia, vosa o Pepai, mo tagata e tino lua tupu valu ;

¹² i vosa o Asekate : ko Sokanane, vosa o Akatane, mo tagata e tino lelau tino agafulu ;

¹³ i vosa o Atonikame : ko Elifeleti, mo Seiele, mo Semaesa, ko vosa muli latou o Atonikame, mo tagata e tino ono ;

¹⁴ i vosa o Pikevai : ko Utai mo Sapute, mo tagata e tino fitu.

¹⁵ Na kau tanaki fakatasi latou i tafa o le vaitafe leia e tafe ki Aava, ti na motou nonofo loa i ai i aso e tolu. Na kau tioi loa le kakai mo le kau faisakilifisio, ti na leaise kau maua loa se fa toka tasi fua i vosa o Levi.

¹⁶ Koia na kau kalagai ai loa a pule ko Eliesele, mo Aliele, mo Semaesa, mo Elenatane, mo Salipe, mo Elenatane, mo Natane, mo Sakalia, mo Mesulame, ti mo toketa o le lao ko Sosalipe mo Elenatane.

¹⁷ Ti na kau kakau loa latou ki le pule ko Ito leia na nofo i Kasifia, ti na kau tuku loa ki olatou gutu le nea leia na tonu ke lotou fakasa kia Ito mo ona fetaina le kau Netinia ala na nonofo i Kasifia, o tupu ke lotou tuku mai ni tagata fakasausau ki le fale o lotatou Atua.

¹⁸ Ti na nofo ia matou le lima o le Eteleno, koia na lotou aumai ai loa Selepia, ko se tagata poto i vosa o Makeli, vosa o Levi, vosa o Iselaele, ti na au loa mo ia ona vosa mo ona fetaina, ko tagata e tino agafulu tupu valu ;

¹⁹ ti mo Asapia, mo Esaia, i vosa o Melali, mo ona fetaina mo olatou vosa, ko tagata e tino lua ;

²⁰ i le kau Netinia, ala na fakanofo e Tavite mo le kau pule ke fakasausau ki le kau Levi : ko tagata e tino lelau lua tino lua, na lau latou taki tasi i olatou igoa.

Sesunio o uiga mo le folau

²¹ I le ganea lena, i le kauvai o le vaitafe ko Aava, na kau fakatotonu loa se sesunio fakamamae i mua o lomatou Atua, o tupu ke kole kiate ia ke puipui lomatou fanoga, mo amatou fanau, ti mo amatou nea fuli.

²² Talie na kau luma i le kole ki le sau ke tuku mai se solia mo ni osi ke puipui ia matou i le ala, talie kua motou pati ki le sau : E puipui loa e le lima o lomatou Atua latou fuli ala e afa ia a ia, kae e vilo loa lona makeke mo lona sausau kia latou fuli ala e tiaki ia a ia.

²³ Ko le tupuaga a ia o lamatou sesunio mo lamatou tagi ki lomatou Atua. Ti na tali loa e ia lamatou kole.

Tuku o koloa ki tagata faisakilifisio e tino agafulu

²⁴ Na kau filifili loa ni pule o le kau faisakilifisio e tino agafulu tupu lua : ko Selepia, mo Asapia, mo ni tagata e tino agafulu i ola fetaina.

²⁵ Na kau fua loa i olatou mua le mamafa o le paaga, mo le aulo, mo ipu, ala na soli alofa ki le fale o lomatou Atua e le sau, mo lana kau fono, mo lana kau pule, ti mo latou fuli o Iselaele ala na nonofo i le fenua.

²⁶ Ti na kau fakatoo loa ki olatou lima ni fa tenalio paaga e kau lelau ono kau lima, mo ni ipu paaga ki ni fa tenalio e kau lelau, mo ni fa tenalio aulo e kau lelau,

²⁷ mo ni ipu aulo e kau lua, ala na afe talame, mo ipu kapa malilie e lua, ala na tatau ola mauiga mo le aulo.

²⁸ Ti na kau pati loa kia latou : Kua fakatapui koutou ki le Eteleno ; ko nea tapu a ipu anei, ti ko le paaga mo le aulo leinei ko se moliga a ia ki le Eteleno, le Atua o tatou tamana.

²⁹ Kotou tokaga ti kotou taupau a nea fuli ana, o kaku ki lakoutou toe fua latou i mua o le kau pule faisakilifisio, mo le kau Levi, ti mo le kau pule famili o Iselaele, i Selusalemi, i kogafale o le fale o le Eteleno.

³⁰ Ti na too loa e le kau faisakilifisio mo le kau Levi le paaga leia na fua, mo le aulo, mo ipu, ke lotou ave latou ki Selusalemi, ki le fale o lomatou Atua.

Kaku o Esetalasi ki Selusalemi

³¹ Na motou mavae loa i le vaitafe o Aava, o ano ki Selusalemi, i le aso kau agafulu tupu lua o le uluaki masina. Na nofo ia matou le lima o lomatou Atua, ti na puipui e ia matou mei le fili ti mo tutamaki fuli o le ala.

³² Na motou kaku loa ki Selusalemi, ti na motou malolo loa i aso e tolu.

³³ I le fa o aso, na motou fua loa i le fale o lomatou Atua le paaga, mo le aulo ti mo ipu, ala na motou tuku loa ki lima o Melemote, vosa o Uli, le tagata faisakilifisio ; na nonofo mo ia Eleasale, vosa o Finesi, mo le Levi ko Sosapate, vosa o Sosue, mo Noatia, vosa o Pinui.

³⁴ Na fua loa a nea fuli, ti na tosi loa le mamafa o nea fuli.

³⁵ Ko le kakai leia na toe liliu mai mei le popula na momoli ia loa ni failaulau ki le Atua o Iselaele, ko ni pipi tagata e kau agafulu tupu lua ki Iselaele katoa, mo ni ovi tagata e kau iva tupu ono, mo ni akeno e kau fitu tupu fitu, ti mo ni koti tagata e kau agafulu tupu lua ki le fakamolemole o agasala : ko nea fuli ana ko ni failaulau ki le Eteleno.

³⁶ Na lotou fakasoko loa a fakatotonu a le sau ki fakafofoga o le sau mo kovana o le fetuu lena o le vaitafe, ala na tokoi loa ki le kakai o uiga mo le fale o le Atua.