Esetalasi 7 - Tosi Tapu

Kaku o Esetalasi ki Selusalemi ; fono a Aletasese

¹ I le sili o nea ana, i le sau a Aletasese, sau o Pelesi, na au loa Esetalasi, vosa o Selasa, vosa o Asalia, vosa o Ilekisa,

² vosa o Salume, vosa o Satoke, vosa o Asitupe,

³ vosa o Amalia, vosa o Asalia, vosa o Melasote,

⁴ vosa o Selakesa, vosa o Usi, vosa o Puki,

⁵ vosa o Apisua, vosa o Finesi, vosa o Eleasale, vosa o Alone, le tagata faisakilifisio lasi.

⁶ Na au loa le Esetalasi lena mei Papilone : ko se tagata sekelipa a ia, leia na poto i le lao a Moisese leia na tuku kiate ia e le Eteleno, le Atua o Iselaele. Ti na kau mo ia le lima o le Eteleno, lona Atua, koia na soli ai e le sau kia Esetalasi a nea fuli ala na kole e ia kiate ia.

⁷ Ti na au loa se toka api o fanau a Iselaele, se kau tagata faisakilifisio, mo se kau Levi, mo se kau sua, mo se kau tuu matapa, ti mo se kau Netinia, ki Selusalemi, i le fetuu fitu o le sau a Aletasese.

⁸ Na kaku loa Esetalasi ki Selusalemi i le masina lima o le fetuu fitu o le sau a le sau.

⁹ Talie na mavae a ia mei Papilone i le uluaki aso o le uluaki masina, ti na kaku loa a ia ki Selusalemi i le uluaki aso o le masina lima, talie na nofo le lima o lona Atua mo ia.

¹⁰ Talie na tokaga fakamalotoloto Esetalasi o ako mo fai le lao a le Eteleno, ti mo ako ki le kakai o Iselaele a folafola mo lekula o le lao lena.

¹¹ Ko leinei le tosi leia na fai e le sau ko Aletasese o soli kia Esetalasi, tagata faisakilifisio mo sekelipa, leia na ako ia a folafola mo lekula a le Eteleno ki Iselaele :

¹² Ko au, Aletasese, sau o kau sau, kia Esetalasi ko le tagata faisakilifisio, ti ko le tagata sekelipa i le lao a le Atua o le lagi, ke iate koe le fimalie i le temi nei…

¹³ Na kau fakatotonu ke tuku ke ano latou fuli o le kakai o Iselaele, mo le kau faisakilifisio, ti mo le kau Levi, ala i loku puleaga ti e loto malie ke ano mo koe ki Selusalemi.

¹⁴ Na kakau a koe e le sau mo lana kau fono e toka fitu, ke ano o tioi a Suta mo Selusalemi o mulimuli ki le lao a lou Atua leia e too i lou lima,

¹⁵ ti mo ave le paaga mo le aulo leia na momoli e le sau mo lana kau fono ki le Atua o Iselaele, leia e tuu lona nofoaga i Selusalemi,

¹⁶ mo le paaga katoa mo le aulo leia e ke maua loa i le fenua o Papilone, ti mo nea alofa ala na fai e le kakai mo le kau faisakilifisio ki le fale o lolatou Atua i Selusalemi.

¹⁷ Koia, e ke tokaga loa o totogi ki le paaga lena ni pipi tagata, mo ni ovi tagata, mo ni akeno, mo nea fuli ala e aoga ki moliga, mo moliga vino ti mo lolo, ti e ke momoli loa a nea ana i aluga o le aletale o le fale o lokoutou Atua i Selusalemi.

¹⁸ E kotou fai loa ki le toe o le paaga mo le aulo, le nea leia e kotou tio loa e aoga ke fai, e koe mo ou fetaina, o kotou mulimuli ki le finegalo o lokoutou Atua.

¹⁹ E tuku loa ki mua o le Atua o Selusalemi a ipu ala na soli kiate koe ki le tausi i le fale o lou Atua.

²⁰ E ke too loa i le fale koloa o le sau a nea ala e aoga ki la ake gaoi, io, a gaoi ala e ke fai loa ki le fale o lou Atua.

²¹ Ko au, sau ko Aletasese, e kau tuku le fakatotonu ki tagata taupau koloa fuli i le fetuu lena o le vaitafe, ke lotou soli totonu kia Esetalasi, le tagata faisakilifisio mo sekelipa i le lao o le Atua o le lagi, a nea fuli ala e kole atu loa e ia kia koutou,

²² o kaku ki kilo paaga e afe tolu, mo kilo falina e kau tolu afe, mo liti vino e afe fa, mo liti lolo e afe fa, ti mo se patai lasi.

²³ Ke fai katoa a nea fuli ala kua fakatotonu e le Atua o atu lagi ke fai ki lona fale, o tupu ke aua na vilo lona sausau ki le puleaga, mo le sau ti mo ona vosa.

²⁴ E motou fakasa atu kia koutou e leaise feala loa ke too ni totogi, pe ko ni tukusau, pe ko ni fatogia i le kau faisakilifisio, mo le kau Levi, mo le kau sua, mo ko le kau tuu matapa, mo le kau Netinia, ti mo le kau fakasausau o le fale lena o le Atua.

²⁵ Ti ko koe, Esetalasi, o mulimuli ki le poto o le Atua leia e nofo mo koe, fakanofo ni tui fakamaau mo ni tagata o le lao ala e fakamaau ia i le faitotonu le kakai katoa o le fetuu lena o le vaitafe, mo latou fuli ala e iloa ia a lao o lou Atua ; ti ke ako latou ke iloa e latou ala e leaise iloa ia latou.

²⁶ Ko leia e leaise fakalogo vave loa ki le lao a lou Atua mo le lao a le sau, e tautea loa ki le mate, pe ki le kapu mei le fenua, pe ki se tukusau pe ko le pilisoni.

²⁷ Ke fakafetai ki le Eteleno, le Atua o otatou tamana, leia na teuteui ia le loto o le sau ke fakakololia feneeki ai le fale o le Eteleno i Selusalemi,

²⁸ ti na fakaliliu ia le sau, mo le kau fono, mo lana kau pule lalasi fuli, ke agamalie kiate au ! Na nofo iate au loa le lima o le Eteleno, loku Atua, o fakamakeke au, ti na kau tanaki loa le kau pule o Iselaele ke toe liliu mo au.