Esetalasi 6 - Tosi Tapu

Fakatotonu a Taliusi

¹ Ti na fakatotonu loa e le sau ko Taliusi ke fai ni afaafa i le fale tanaki tosi, leia na tanaki ai a koloa o Papilone.

² Ti na maua loa i Akemeta, kolo mua o le fenua o Meti, se takaiga tosi leia na tosi ai le nea leinei :

³ I le uluaki fetuu o le sau ko Silusi, na tuku e le sau ko Silusi le fakatotonu leinei o uiga mo le fale o le Atua i Selusalemi : Ke toe lagai le fale, ke liliu ko se ganea leia e momoli ai ni sakilifisio, ti ke makeke ona fakavae. Ko lona taualuga ko meta e kau tolu, ti mo lona lau lasi ko meta e kau tolu,

⁴ mo ni atu fatu lalasi e tolu, ti mo se atu papa foou e tasi. E totogi loa lona laga e le fale o le sau.

⁵ Ti ko ipu aulo mo ipu siliva o le fale o le Atua, ala na ave e Nepukatenesale mei le fale tapu o Selusalemi ki Papilone, e toe fakaliliu loa ki le fale tapu o Selusalemi i le ganea leia na lotou tuku ai, i le fale o le Atua.

⁶ Ti ko leinei, ko koe Tatenai, kovana o le fetuu lena o le vaitafe, mo Setale-Posenai, ti mo okoulua fetaina i Afalesake, ala e nonofo i le fetuu lena o le vaitafe, ke kotou fakamamao mei le ganea lena.

⁷ Kotou tuku ke soko atu a gaoi o le fale lena o le Atua ; ke toe laga e le kovana o le kau Sutea mo le kau matua le fale i lona tuuaga masani.

⁸ Ko leinei le fakatotonu leia e kau tuku o uiga mo le nea leia e tonu ke kotou fai ki le kau matua lena o le kau Sutea o uiga mo le fakatuu o le fale lena o le Atua : E kotou too loa le paaga ki le gaoi i le koloa o le sau, leia e maua mei tukusau i le fetuu lena o le vaitafe, o tuku tonu ki lima o tagata ana, o tupu ke aua na toe tuu le gaoi.

⁹ Ko nea ala e aoga ki failaulau ki le Atua o le lagi, a pipi tagata, mo ovi tagata mo akeno, mo le fulumeto, mo le patai, mo le vino, ti mo le lolo, e tonu ke soli latou o fakalogo ki le nea leia e lotou loto ki ai, ki le kau faisakilifisio o Selusalemi i aso fuli ti ke aua na puli fua se nea,

¹⁰ o tupu ke lotou momoli ni sakilifisio manogi malie ki le Atua o le lagi ti ke lotou ulufaki le mauli o le sau mo ona vosa.

¹¹ Ti ko leinei le fakatotonu leia e kau tuku o uiga mo leia e agatuu ki le fakatotonu lena : E too loa mei lona fale se fa laakau, ti ke fakatuu a ia, ti ke tautau a ia ki ai, kae maumaui loa lona fale.

¹² Ke maumaui e le Atua, leia e agai lona suafa i le ganea lena, a sau fuli mo kakai fuli ala e falo loa olatou lima ke maumaui laku fakatotonu, ti mo maumaui le fale lena o le Atua i Selusalemi ! Ko au, Taliusi, na kau tuku le fakatotonu leinei. Ke fai katoa a ia.

Fakaoki mo le fakatapu o le fale tapu

¹³ Ko Tatenai, kovana o le fetuu lena o le vaitafe, mo Setale-Posenai, ti mo ola fetaina, na fakalogo katoa loa ki le fakatotonu lena a le sau ko Taliusi.

¹⁴ Ti na laga loa e le kau matua o le kau Sutea le fale o manuia, o mulimuli ki le folafola a le polofeta ko Akeseo, mo le polofeta ko Sakalia, vosa o Ito ; na lotou laga loa le fale o oki o mulimuli ki le fakatotonu a le Atua o Iselaele mo le fakatotonu a Silusi, mo Taliusi, mo Aletasese, ko sau o Pelesi.

¹⁵ Na oki loa le fale i le aso tolu o le masina o Atale, i le fetuu ono o le sau a Taliusi.

¹⁶ Ko fanau o Iselaele, mo le kau faisakilifisio, mo le kau Levi, ti mo le kakai leia na toe liliu mei le popula, na fakatapu ia loa le fale o le Atua i le fiafia.

¹⁷ Na lotou momoli loa i le fakatapu o le fale lena o le Atua ni pipi tagata e kau lelau, mo ni ovi tagata e kau lelau lua, mo ni akeno e kau lelau fa, ki le fakamolemole o agasala a Iselaele katoa, ti na lotou momoli loa ni koti e kau agafulu tupu lua, o mulimuli ki famili o Iselaele.

¹⁸ Na lotou fakanofo loa le kau faisakilifisio o mulimuli ki olatou kalasi, ti mo le kau Levi o mulimuli ki olatou kalasi, ke tausi ki le Atua i Selusalemi, ofaipe lona tuu i le tosi a Moisese.

Toe fakatuu o le Pasikate

¹⁹ Ti na fakamanatu loa e le kakai leia na toe liliu mei le popula le Pasikate i le aso kau agafulu tupu fa o le uluaki masina.

²⁰ Na fakamea fuli loa le kau faisakilifisio mo le kau Levi ; ti na lotou momoli loa le sakilifisio o le Pasikate ki le kakai katoa leia na popula, ti mo olatou fetaina, le kau faisakilifisio ti mo latou totonu.

²¹ Ti na kai loa e fanau o Iselaele ala na toe liliu mei le popula le Pasikate, mo latou fuli ala na fakamamao mei le kelekele o puleaga o le fenua ti na fakatasi ake kia latou o afa le Eteleno, le Atua o Iselaele.

²² Na lotou fakamanatu loa i le fiafia le aso o pane sala fakatupu i ni aso e fitu, talie na tuku e le Eteleno le fiafia ki olatou loto i lana soli le loto malie ki le sau o Asilia ke tokoi kia latou i le gaoi o le fale o le Atua o Iselaele.