Esetalasi 5 - Tosi Tapu

Toe soko atu o le fau o le fale tapu i le fakamakeke a le kau polofeta

¹ Ti na masau loa le polofeta ko Akeseo, mo le polofeta ko Sakalia, vosa o Ito, ki le kau Sutea leia na nofo i Suta mo Selusalemi, i le suafa o le Atua o Iselaele.

² Ti na tutuu ake loa ki aluga a Solopapele, vosa o Saletiele, mo Sosue, vosa o Sotesatake, o kamata le fau o le fale o le Atua i Selusalemi. Ti na kau mo laua le kau polofeta a le Atua, o tokoi kia laua.

³ I le temi foki lena, na au loa Tatenai, ko le kovana o le fetuu lena o le vaitafe, mo Setale-Posenai, ti mo ola fetaina, o pati kia latou : Ko ai leia na fakataga ia ke kotou laga le fale lena ti mo toe fau ona paa fatu ?

⁴ Na lotou toe pati foki kia latou : Ko ai ma a igoa o tagata anei e laga ia le fale ?

⁵ Kae na leoleo a mata o le Atua ki le kau matua o le kakai Sutea. Koia na tuku ai loa ke soko atu a gaoi kae ave loa se tosi kia Taliusi o kaku ki le maua o se tali o uiga mo le gaoi.

⁶ Ko leinei le siki o le tosi leia na ave ki le sau ko Taliusi e Tatenai, kovana o le fetuu lena o le vaitafe, mo Setale Posenai, ti mo ola fetaina mei Afalesake i le fetuu lena o le vaitafe.

⁷ Na lotou ave loa kia Taliusi le tosi leinei : Ki le sau ko Taliusi, fakaalofa !

⁸ Ke iloa e le sau na motou ano ki le fenua o Suta, ki le fale o le Atua lasi. E lolotoga fakatuu le fale ki ni fatu lalasi ti kua teki le laakau ki paa ; e vave ai le fai o le gaoi, ti kua manuia a ia i olatou lima.

⁹ Na motou fakavesilii le kau matua ti na motou masau kia latou, o pati : Ko ai na fakataga ia kia koutou ke laga le fale leinei, ti mo toe fakatuu o ona paa fatu ?

¹⁰ Na motou afa foki olatou igoa ke fakasa atu kiate koe, ti kua motou tosi a igoa o tagata ala e takitaki kia latou.

¹¹ Ko leinei le tali na lotou fai mai kia matou : Ko matou ko tagata fakasausau a le Atua o le lagi mo le kele, ti e motou toe laga le fale leinei na kamata laga ti kua sili ki ai ni fetuu mauke ai ; io, na fau a ia e se sau lasi o Iselaele o oki malie.

¹² Kae na agasala loa omatou tamana o tupu ai le sausau o le Atua o le lagi, leia na tuku ia loa latou ki lima o Nepukatenesale, tagata Kaletea, sau o Papilone, leia na maumaui ia le fale leinei ti na ave popula ia loa le kakai ki Papilone.

¹³ Kae i le uluaki fetuu o Silusi, sau o Papilone, na fakatotonu loa e le sau ko Silusi ke toe laga le fale leinei o le Atua.

¹⁴ Ti na too foki e le sau ko Silusi mei le fale tapu o Papilone a ipu aulo mo paaga o le fale tapu o le Atua, ala na aumai e Nepukatenesale mei le fale tapu o Selusalemi ki le fale tapu o Papilone, o tuku latou ki lima o se tagata ko Sesepatesale, leia na fakanofo e ia ke kovana,

¹⁵ ti na pati loa le sau kia Solopapele : Too a ipu anei ti ke ano o tuku latou ki le fale tapu i Selusalemi, ti ke toe laga le fale o le Atua i le ganea leia na tuu ai i mua.

¹⁶ Ti na au loa le Solopapele lena, ti na teki loa e ia a fakatafito o le fale o le Atua i Selusalemi ; talu loa mei ai le fau o le fale o kaku mai ki le aso nei, ti e leikiaise oki.

¹⁷ I le lakaga nei, kapau e malie ki le sau, ke fai ni afaafa i le fale o koloa o le sau o Papilone, o tioi pe maoki na fai e le sau ko Silusi se fakatotonu ke toe laga le fale leinei o le Atua i Selusalemi. Ti ke fakasa mai kia matou e le sau lona finegalo o uiga mo le nea leinei.