Esetalasi 3 - Tosi Tapu

Toe fakatuu o le aletale o sakilifisio

¹ I le masina fitu, ko fanau a Iselaele, ala kua nonofo loa i olatou kolo, na loto tasi fuli loa ke fakatasi ki Selusalemi.

² Ko Sosue, vosa o Sotesatake, mo ona fetaina kau tagata faisakilifisio, mo Solopapele, vosa o Saletiele, mo ona fetaina, na tutuu ake loa ki aluga o fakatuu le aletale o le Atua o Iselaele, ke momoli ai a failaulau o mulimuli ki le nea leia e tuu i le lao a Moisese, le tagata a le Atua.

³ Na lotou toe fakatuu loa le aletale i lona tuuaga, kae na lotou tuania ia le kakai o le fenua, ti na lotou momoli loa ni failaulau ki le Eteleno, a failaulau o le usu mo le afiafi.

⁴ Na lotou fakamanatu loa le aso o tapenakulo, ofaipe lona tuu i le tosi, ti na lotou momoli loa ni failaulau i aso taki tasi, o mulimuli ki le lasi o failaulau o le aso.

⁵ I le oki o nea ana, na lotou momoli loa le failaulau o le aso taki tasi, mo failaulau o le masina foou, mo aso lalasi fuli o le Eteleno, mo sakilifisio a latou ala na fia fai moliga ki le Eteleno.

⁶ Mei le uluaki aso o le masina fitu, na lotou kamata momoli loa ni failaulau ki le Eteleno. Kae na leikiaise tuku le fakatafito o le fale o le Eteleno.

⁷ Na soli loa se paaga ki le kau tafatu, mo le kau fai papa, ti na toe soli foki mo ni magiti, mo ni nea inu, ti mo se lolo, ki le kau Sitone mo le kau Tile, o tupu ke lotou aumai i le tai o kaku mai ki Safo ni sete mei Lipane, o mulimuli ki le fakataga leia na tuku kia latou e Silusi, sau o Pelesi.

Teki o fakavae o le fale tapu

⁸ I le lua o fetuu, talu mei le aso leia na lotou kaku ai ki le fale o le Atua i Selusalemi, i le masina lua, ko Solopapele, vosa o Saletiele, mo Sosue, vosa o Sotesatake, mo ola fetaina, le kau faisakilifisio mo le kau Levi, ti mo latou fuli ala na toe liliu mai mei le popula ki Selusalemi, na lotou gaoi loa ti na lotou tuku loa ki le kau Levi, mei le fetuu kau lua o fai ki aluga, ke leoleo ia a gaoi o le fale o le Eteleno.

⁹ Ko Sosue, mo ona vosa, mo ona fetaina, mo Katemiele, mo ona vosa, mei le sakoga o Suta, mo vosa o Enatate, mo olatou vosa mo olatou fetaina, le kau Levi, na leoleo ia loa le kau gaoi o le fale o le Atua.

¹⁰ I le temi leia na teki ai e le kau gaoi le fakatafito o le fale o le Eteleno, na au loa le kau faisakilifisio mo olatou kofu fakapelepitelo, mo ni fakatagi pupusi, mo le kau Levi, mei le sakoga o Asafe, mo ni pa fai musika, o tupu ke lotou fakavikiviki ki le Eteleno o mulimuli ki fakatuutuu a Tavite, sau o Iselaele.

¹¹ Na lotou sua loa, o fakavikiviki ki le Eteleno, o pati : Talie e agamalie a ia, talie e tuumau lona manava alofa ki Iselaele ! Ti na kalaga fakafiafia loa le kakai katoa ki le Eteleno, i le teki o le fakatafito o le fale o le Eteleno.

¹² Kae na toka api le kau faisakilifisio mo le kau Levi, mo se kau pule famili kua matutua, ala na tio ki le uluaki fale tapu, na fetagisi leo lasi loa, i lalatou tio ki le teki o le fakatafito o le fale. Kae na kalaga fakafiafia loa se tasi ake toka api,

¹³ o leaise mafai ke iloa kesekese le logoa o kalaga fakafiafia mo tagi i lotolotoga o le kakai, talie na kalaga leo lasi le kakai o logo ki mamao.