Esetalasi 1 - Tosi Tapu

Fono a Silusi ke toe liliu le kau Sutea ki Selusalemi, o toe laga le fale tapu

¹ I le uluaki fetuu o Silusi, sau o Pelesi, na fakasoko loa e le Eteleno le folafola leia na fakasa e le polofeta ko Selemia. Na fafagu loa e le Eteleno le laumalie o Silusi, sau o Pelesi, leia na fakasa ia loa mo fai ia loa le tosi leinei i lona puleaga katoa :

² Ko leinei le masau a Silusi, sau o Pelesi : Kua soli mai kiate au e le Eteleno, le Atua o le lagi, a puleaga fuli o le malama nei, ti kua fakatotonu mai e ia kiate au ke fakatuu kiate ia se fale i Selusalemi i Suta.

³ Ko ai ia koutou e kau ki lona kakai ? Ke nofo lona Atua mo ia, ti ke pale a ia ki Selusalemi i le fenua o Suta, o fakatuu le fale o le Eteleno, le Atua o Iselaele ! Ko le Atua leia e agai i Selusalemi.

⁴ I ganea fuli ala e nofo ai ni toetoega o le kakai o le Eteleno, e tonu ke soli loa kia latou e le kakai o le fenua lena se paaga, mo se aulo, mo ni koloa, mo ni manu, ti mo ni nea alofa ki le fale o le Atua leia i Selusalemi.

⁵ Ko pule famili o Suta mo Pesamino, mo le kau faisakilifisio, mo le kau Levi, ti mo latou fuli ala na fafagu olatou loto e le Atua, na tutuu ake loa ke ano o laga le fale tapu o le Eteleno i Selusalemi.

⁶ Ko latou fuli ala na nofo i olatou tafatafa na soli ia loa kia latou ni paaga, mo se aulo, mo ni koloa, mo ni manu, ti mo ni nea mauiga, kae na leaise lau a nea alofa.

⁷ Na toe fakaliliu loa e le sau ko Silusi a ipu fuli o le fale o le Eteleno, ala na aumai e Nepukatenesale mei Selusalemi o tuku i le fale o lona atua.

⁸ Na kakau loa e Silusi, sau o Pelesi, kia Miteletate, le tagata taupau koloa, ke too e ia latou o fakatoo kia Sesepatesale, leia ko Solopapele, ko le aliki o Suta.

⁹ Ko leinei le lasi o ipu : ko pesini aulo e kau tolu, mo pesini paaga e afe, mo sele e kau lua tupu iva,

¹⁰ Mo ipu aulo lalasi e kau tolu, mo ipu siliva lalasi e kau lelau fa kau agafulu, mo ni iki ake a ipu na afe.

¹¹ Ko le lasi o ipu fuli ala na aulo ti mo paaga ko afe e lima mo kau lelau e fa. Na ave loa e Solopapele a nea fuli mei Papilone ki Selusalemi i le toe liliu mei le popula.