Esekiele 9 - Tosi Tapu

tautea o latou e tausi ki taulaatua

¹ Ti na kalaga leo lasi loa a ia ki oku taliga : Kotou fakafeofi mai, koutou ala e tonu ke tautea ia le kolo, o tasi mo ia lana masafu i lona lima ke tamate !

² Ti ko leinei, na kaku mai ni tagata e toka ono i le ala o le matapa aluga leia e aga ki le potu noleto, o tasi mo ia lana masafu ke tamate i lona lima. Na i ai se tagata i loto malie o latou leia na kofu ki se kofu tea fulumalie, ti na tau i lona vakavaka se tanakiaga nea fai tosi. Na lotou au loa o tutuu ofi ki le aletale sila.

³ Na malaga ake loa le kololia o le Atua o Iselaele i le Selupino leia na nofo ai, o ano loa ki le mua matapa o le fale tapu ; ti na kalaga loa a ia ki le tagata leia na kofu ki le kofu tea fulumalie ti na tau ia le tanakiaga nea fai tosi i lona vakavaka.

⁴ Na pati loa le Eteleno kiate ia : Ano i le loto kolo, i loto o Selusalemi, ti ke fai se fakamailoga i lae o tagata ala e mamae ti mo tagi o tupu ko nea fakalialia fuli ala e fai i ai.

⁵ Ti na masau loa a ia ki la ake tagata i oku mua, o pati : Kotou ano i ona muli i le kolo, ti kotou taai ; ke aua na toe aloalofa loa okoutou mata, ti ke aua na kotou toe manava alofa loa !

⁶ Kotou tamate, kotou maumaui a matua, mo tagata muli, mo taineliki taupoou, mo toe liliki, mo fafine ; kae aua na kotou fakafeofi loa ki se tasi leia e nofo loa mo se fakamailoga i lona lae ; kotou kamata i loku fale tapu ! Na lotou kamata loa i le kau matua ala na nonofo i mua o le fale tapu.

⁷ Na pati loa a ia kia latou : Kotou fakakelekele le fale tapu, kotou fakaapele ona malae ki mate !… Kotou ulu ki fafo !… Na lotou ulu loa ki fafo, ti na lotou taai loa le kolo.

⁸ Na kau nofo toka tasi i le temi lena na lotou taai ai le kolo, ti na kau fakamapee loa ki lalo o fakatau oku mata ki le kele, o kalaga : Ei Aliki Eteleno, pe ke maumaui loa a nea fuli ala koi toe i Iselaele, i lau liligi lou sausau ki Selusalemi ?

⁹ Na tali mai loa a ia kiate au : Kua lasi ai le agaveli o le fale o Iselaele mo Suta ti kua fakalaka foki a ai ; kua apele le fenua i tukipo, ti kua apele le kolo i agatuu, talie e lotou pati : Kua tiaki e le Eteleno le fenua, ti e leaise tio le Eteleno ki se nea.

¹⁰ Ko au foki, e leaise kau toe aloalofa loa, ti e leaise kau toe maua loa se manava alofa ; kae e kau fakato loa alatou gaoiaga ki olatou ulu.

¹¹ Ti ko leinei, ko le tagata leia na kofu ki le kofu tea fulumalie, ti na tau ia se tanakiaga nea fai tosi i lona vakavaka, na fai ia loa le tali leinei : Na kau fai le nea leia na ke fakatotonu mai kiate au.