Esekiele 8 - Tosi Tapu

Ko le tausi a Iselaele ki taulaatua

¹ I lona ono fetuu, i le aso lima o lona ono masina, na kau tonatona i loku fale, ti na tonatona le kau matua o Suta i oku mua, na soko loa ko le lima o le Aliki, o le Eteleno, na teki kiate au.

² Na kau tio loa, ti ko leinei, ko se nea leia na mata ofaipe se tagata ; i lona sulugalava o ano ki lalo, na faipe se afi ; i lona sulugalava o ano ki aluga, na faipe se nea gigila, pe se sila momole.

³ Na falo loa e ia se nea pe se lima, ti na too loa e ia au i loku lau ulu. Na siki loa au e le Laumalie ki le vasa o le malama nei mo le lagi, ti na ave loa e ia au i ni tio ki Selusalemi, ki le fetuu loto o le matapa, leia e aga ki le noleto, leia na tuu ai le taulaatua o le finenonofo, leia e fakatupu ia le finenonofo o le Eteleno.

⁴ Ti ko leinei, na i ai le kololia o le Atua o Iselaele, ofaipe laku tio ki ai i le tio i le vaivailiua.

⁵ Na pati mai a ia loa kiate au : Vosa o le tagata, siki ake ou mata ki le fetuu noleto ! Na siki ake loa oku mata ki le fetuu noleto ; ti ko leinei, na tuu le fakatata lena o le finenonofo i le fetuu noleto o le matapa o le aletale, i le uluaga.

⁶ Ti na pati mai loa a ia kiate au : Vosa o le tagata, pe ke tio ki le nea leia e lotou fai, ki nea fakalialia lalasi ala e fai i leinei e le fale o Iselaele, o tupu ke kau fakamamao i loku sagatualio ? Kae e ke tio loa ki ni iki a nea fakalialia lalasi ake.

⁷ Ti na taki loa e ia au ki uluaga o le malae. Na kau tagaki loa, ti ko leinei, na i ai se pu i le paa.

⁸ Ti na pati mai loa a ia kiate au : Vosa o le tagata, puui le paa ! Na kau puui loa le paa, ti ko leinei, na i ai se matapa.

⁹ Ti na pati mai loa a ia kiate au : Ulu ki loto, ti ke tio ki nea fakalialia lalasi ala e lotou fai i leinei !

¹⁰ Na kau ulu loa, o tio ; ti ko leinei, na i ai ni paaki o manu totolo kesekese fuli, mo manu fakalialia, mo taulaatua fuli o le fale o Iselaele, kua tosi i le takatakai katoa o le paa.

¹¹ Ti na tutuu i mua o taulaatua ana se kau tagata e tino fitu o le kau fakamatuatua o le fale o Iselaele, o kau i ai a Sasania, vosa o Safani, ti na lotou tasi mo ia se tulipulo i lona lima, ti na malaga ake i le ganea lena se afu matotolu o le iseso.

¹² Na pati mai loa a ia kiate au : Vosa o le tagata, pe kua ke tio ki le nea leia e fai fakafufu e le kau matua o le fale o Iselaele, e le tagata taki toka tasi i lona kogafale leia kua apele i taulaatua ? Talie e lotou pati : e leaise tio mai le Eteleno kia tatou, ti kua tiaki e le Eteleno le fenua.

¹³ Na pati mai loa a ia kiate au : E ke toe tio loa ki ni iki ake a nea fakalialia lalasi ala e lotou fai.

¹⁴ Ti na taki e ia au ki le uluaga o le matapa o le fale o le Eteleno, i le fetuu noleto. Ti ko leinei, na i ai ni fafine ala na tonatona i le ganea lena, ti na lotou tagi o tupu ko Tamusi.

¹⁵ Na pati mai loa a ia kiate au : Pe ke tio, vosa o le tagata ? E ke toe tio loa ki ni iki ake a nea fakalialia lasi ake i nea anei.

¹⁶ Ti na taki loa e ia au ki le malae loto o le fale o le Eteleno. Ti ko leinei, i uluaga o le fale tapu o le Eteleno, i le vasa o le matapa ulu mo le aletale, na i ai se kau tagata e tino lua tupu lima, na lotou titua ki le fale tapu o le Eteleno, kae na lotou agaaga ki le potu esite ; ti na lotou punou ki le potu esite i mua o le laa.

¹⁷ Ti na pati mai loa a ia kiate au : Pe ke tio, vosa o le tagata ? Pe koi ikiiki aifai ki le fale o Suta a nea fakalialia ala e lotou fai i leinei ? Pe tonu foki ke lotou fakaapele le fenua ki tukipo, ti ke aua na lotou tuku loku fakaitaitai ? Ko leinei, e lotou fakafeofi le laakau ki olatou isu.

¹⁸ Ko au foki, e kau gaoi loa o mulimuli ki loku sausau ; e leaise toe aloalofa loa loku mata, ti e leaise kau toe maua loa se manava alofa ; ka lotou tagi leo lasi loa ki oku taliga, e leaise kau fakalogo loa kia latou.