Esekiele 7 - Tosi Tapu

Ko le soko vave o le tautea

¹ Na tuku mai loa le folafola a le Eteleno kiate au, o pati :

² Ti ko koe, vosa o le tagata, ko leinei le folafola a le Aliki, le Eteleno, Ki le fenua o Iselaele : Ko leinei le fakaoki ! E au nei le fakaoki ki potupotu e fa o le fenua !

³ I le aso nei e au le fakaoki kiate koe ; E kau kakau mai loa loku sausau kiate koe, E kau fakamaau loa a koe o mulimuli ki ou ala, E kau fakaamo loa kiate koe au aga fakalialia fuli.

⁴ E leaise toe alofa loa loku mata kiate koe, Ti e leaise kau toe maua loa se ga manava alofa kiate koe ; Kae e kau fakaamo loa kiate koe ou ala, Ti e tuu loa au aga fakalialia i loto malie o ou ; Ti e kotou iloa loa ko au ko le Eteleno.

⁵ Koia e folafola ai le Aliki, le Eteleno : Ko se malaia, ko se malaia e tasi ! Ko leinei, e au a ia !

⁶ Kua au le fakaoki, kua au le fakaoki, kua ala ake a ia kiate koe ! Ko leinei kua au a ia !

⁷ Kakai o le fenua, kua soko lou aso ! Kua au le temi, kua ofi mai le aso, aso o le mamae, Ti e leaise koi sa se kalaga fakafiafia i atu mauga !

⁸ I le aso nei e kau liligi loa loku sausau kiate koe, E kau fakavilo loku sausau ke oki kiate koe ; E kau fakamaui loa a koe o mulimuli ki ou ala, E kau fakaamo loa kiate koe au aga fakalialia fuli.

⁹ E leaise alofa loa loku mata kiate koe, Ti e leaise kau toe maua loa se manava alofa, E kau fakaamo loa kiate koe ou ala, Ti e tuku loa i ou mua au aga fakalialia. Ti e kotou iloa loa ko au ko le Eteleno, leia e tautea ia.

¹⁰ Ko leinei le aso ! e au a ia ! Kua soko mai lou lakaga ! Kua se le laa ! Kua matala le fia nealasi !

¹¹ Kua tupu le agamakeke, ke liliu ko le tokotoko a le agaveli : E leaise toe loa se nea ia latou, i lolatou kakai logoa, i lolatou kakai toka api ! E leaise tagi loa kia latou !

¹² Kua soko mai le temi, kua ofi mai le aso ! Ke aua na fiafia leia e totogi, Ke aua na mamae leia e fakatau ! Talie kua mapaa le sausau ki le kakai katoa.

¹³ Leai, e leaise toe maua loa e le tagata fai koloa le nea leia na fakatau e ia, Logo ai e mauli a ia ; Talie e leaise toe fetogi loa le kikite ki lolatou kakai katoa ; Ti e leaise toe mauli loa se tasi, o tupu ko lalatou agasala.

¹⁴ Kua pupusi le fakatagi pupusi, kua tokamalie nea fuli, Kae e leaise saele se tasi ki le tau ; Talie e vilo loku sausau ki le kakai katoa.

¹⁵ Ko le seleta i fafo, ko le taumasaki mo le oge i loto ! Ko leia e nofo i le faisaga e mate loa i le seleta, Ko leia e nofo i le kolo e mate loa i le oge mo le taumasaki.

¹⁶ Ko latou ala na sao e sosola, E lotou nonofo i mauga, ofaipe lupe o vaivailiua, e Lotou fetagisi fuli O tupu ko alatou agaveli.

¹⁷ Kua gaegae a lima fuli, Kua fai a tuli fuli pe le vai.

¹⁸ Kua lotou tui ni taga, Ti kua kofu latou e le i ; Kua luma a mata fuli, Kua tele a ulu fuli.

¹⁹ E lotou laku loa alatou paaga i ala, Ti e lotou fakalialia loa ki lalatou aulo ; Talie e leaise mafai loa ke saofaki latou e lalatou paaga mo lalatou aulo I le aso o le sausau o le Eteleno ; E leaise mafai loa ke lotou fakafimalie olatou laumalie Pe fakamakona olatou manava ; Talie ko nea ana na fakavilo ia latou ki le agaveli.

²⁰ Na lotou nekenekea i olatou koloa fulumalilie, Ti na lotou fai ki ai olatou fakatata fakalialia, mo olatou taulaatua. Koia e kau fakaliliu ai loa olatou koloa ko se nea fakalialia kia latou.

²¹ E kau tuku loa a ia ke kaia e lima o kau matapule, Ti ko se koloa o le tau ki le kau pagani o le malama nei, O tupu ke lotou fakakelekele a ia.

²² E kau maliu kese loa oku mata ia latou, Ti e fakakelekele loa loku sagatualio ; E ulu loa ki ai ni tagata itaita, ti e lotou fakakelekele loa a ia.

²³ Teuteu a tini ! Talie kua apele le fenua i tukipo, Kua apele le kolo i le agamakeke.

²⁴ E kau aumai loa a kakai agaveli ake i kakai fuli, O tupu ke lotou too olatou fale ; E kau fakagato loa le fia nealasi o le kau makeke, Ti e fakakelekele loa olatou sagatualio.

²⁵ E au le maumau ! E lotou afa le fakamauli, kae e leai se fakamauli !

²⁶ E soko le malaia ki le malaia, E muli le logo veli i le logo veli ; E lotou afa ni tio ki polofeta ; E leaise koi iloa e le kau faisakilifisio le lao, E leaise koi maua e le kau matua ni tokoi.

²⁷ E tagi mamae le sau, e i le pule, E lulu a lima o le kakai o le fenua. E kau fai loa kia latou o mulimuli ki olatou ala, E kau fakamaau loa latou i le faitotonu, Ti e lotou iloa loa ko au ko le Eteleno.