Esekiele 6 - Tosi Tapu

Ko le maumaui o le tausi ki taulaatua

¹ Na tuku mai loa kiate au le folafola a le Eteleno, o pati :

² Vosa o le tagata, tio ou mata ki mauga o Iselaele, Ti ke kikite kia latou !

³ E ke pati loa : Mauga o Iselaele, Kotou fakalogo mai ki le folafola a le Aliki, le Eteleno ! Ko leinei le folafola a le Aliki, le Eteleno, Ki mauga lalasi mo mauga liliki, ki vanu mo vaivailiua : Ko leinei e kau kakau mai loa le seleta kia koutou, Ti e kau maumaui loa okoutou ganea taualuga.

⁴ E maumaui loa okoutou aletale, E fatifatii loa okoutou fakatata o le laa, Ti e kau laku loa okoutou mate i mua okoutou taulaatua.

⁵ E kau tuku loa a mate o fanau a Iselaele i mua o olatou taulaatua, Ti e kau veteki loa okoutou ivi i tafatafa o okoutou aletale.

⁶ I ganea fuli ala e kotou nonofo ai, e maumau loa okoutou kolo, Ti e tiaki loa okoutou ganea taualuga ; E popo loa okoutou aletale o tuu noa, Ti e fatifatii loa okoutou taulaatua o pupuli, Ti e laku loa okoutou fakatata o le laa ki lalo, Ti e puli noa loa akoutou gaoiaga fuli.

⁷ E vivilo loa okoutou mate i loto malie o koutou, Ti e kotou iloa loa ko au ko le Eteleno.

⁸ Kae e kau tuku loa ni ga toetoega ia koutou, Ala e sao loa i le seleta i lotolotoga o atu puleaga, Mo ka kotou mavetevete loa i fenua kesekese.

⁹ Ko latou ala e sao loa e toe manatu loa kiate au I le lotolotoga o atu puleaga ala e lotou popula ai, Talie e kau fatifatii loa olatou loto sese mo patigataa, Mo olatou mata ala na faiaga ki olatou taulaatua ; E lotou fakalialia loa kia latou totonu, O tupu ko agaveveli ala na lotou fai, O tupu ko alatou aga fakalialia fuli.

¹⁰ Ti e lotou iloa loa ko au ko le Eteleno, Ti na leaise valoki noa latou, Ke kakau kia latou a malaia fuli ana.

¹¹ Koia e folafola ai le Aliki, le Eteleno : Pa lou lima, tuki ou vae, o pati : Malaia ! O tupu ko aga fakalialia fuli o le fale o Iselaele, Leia e vilo loa i le seleta, mo le oge, ti mo le taumasaki.

¹² Ko leia e nofo mamao loa e mate loa i le masaki veli, Ko leia e nofo ofi loa e mate loa i le seleta, Ko leia e toe loa ti e nofo loa i le kolo e mate loa i le oge. E kau fakamakona loa i ai loku sausau lasi kia latou.

¹³ Ti e kotou iloa loa ko au ko le Eteleno, Mo ka e lotou tio loa ki olatou mate kua laku i mua o olatou taulaatua, I tafatafa o olatou aletale, I aluga o ganea taualuga fuli, i tumutumu fuli o mauga, I lalo o laakau sesega fuli, i lalo o sene fuli e laulau, I ganea ala na lotou momoli ai ni kaloni manogi Ki olatou taulaatua fuli.

¹⁴ E kau siki loa loku lima kia latou, Ti e kau fakaliliu loa le fenua ke toe lavaki ake mo malo ake I le toafa o Tipela, I ganea fuli ala e lotou nonofo ai. Ti e lotou iloa loa ko au ko le Eteleno.