Esekiele 5 - Tosi Tapu

Le tautea mo le mavetevete o Iselaele

¹ Ti ko koe, vosa o le tagata, too se nea matakakai, se mataitele tele kava ; too a ia, o ke tele lou ulu mo lou kaukava. Ti ke too loa se fua, ti ke vae tolu loa a fului ulu.

² Ke ke tutu loa le vaega e tasi i le afi, i loto malie o le kolo, mo ka oki loa a aso o le taui o le kolo ; ke ke too loa le tasi vaega, ti ke tuutuu loa a ia ki le matai tele i le takatakai katoa o le kolo ; ti ke laku loa le vaega fakaoki ke viligia i le matagi ; ti e kau too loa le seleta, o kapu ai latou.

³ E ke too loa se ga lukuga fului ulu, ti e ke nonoa loa a ia ki le tapatapa o lou kofu.

⁴ E ke too loa i ai ni iki ga fului ulu, o ke ti loa latou ki le afi ke lotou vela i ai. E mavae loa i ai se afi ki le fale katoa o Iselaele.

⁵ Koia e folafola ai le Aliki, le Eteleno : Ko lena le Selusalemi leia na kau aga o fakatuu i loto malie o atu puleaga, mo fenua ala e takatakai ia a ia.

⁶ Kua maumaui e ia aku lao mo aku fakatotonu, ti kua agasala a ia o lasi ake i atu puleaga mo fenua i ona takatakai ; talie kua tiaki e ia aku lao, ti na leaise mulimuli a ia ki aku fakatotonu.

⁷ Koia e folafola ai le Aliki, le Eteleno : O tupu na kotou agatuu o lasi ake i atu puleaga ala e takatakai ia koutou, o tupu na leaise kotou mulimuli ki aku fakatotonu mo tausi aku lao, kae na kotou mulimuli ki lao o puleaga ala e takatakai ia koutou ;

⁸ Io, o tupu ko le nea lena, e folafola le Aliki, le Eteleno : Ko leinei e kau mamae kiate koe, ti e kau fakasoko loa i loto malie o ou aku fakamaauaga i mata o atu puleaga.

⁹ O tupu ko au aga fakalialia fuli, e kau fai loa kiate koe le nea leia na leikiaise kau fai i se aso, le nea leia e leaise kau toe fai loa i se aso.

¹⁰ Koia e kai loa e ni tamana alatou fanau i loto malie o ou, ti e kai loa e ni fanau olatou tamana ; e kau fakasoko loa aku fakamaauaga kiate koe, ti e kau veteki loa ki matagi fuli le nea leia e toe loa iate koe.

¹¹ Koia e pati le Aliki, le Eteleno : E kau mauli ! O tupu na ke fakakelekele loku fale tapu ki au taulaatua fuli mo au nea fakalialia fuli, ko au foki, e kau too loa oku mata iate koe, ti e leaise maua loa e loku fa mata se manava alofa kiate koe.

¹² E mate loa le tolu vaega o lou kakai i le masaki veli ti mo le oge i loto malie o ou ; ti e mate loa le tasi vaega i le seleta i ou tafatafa ; ti e kau veteki loa le tasi vaega ki matagi fuli, ti e kau tuli loa latou ki le seleta.

¹³ E kau fagai loa ke makona loku sausau, ti e kau fakavilo loa loku sausau kia latou o kaku ki loku fimalie ; ti e lotou iloa loa ko au, le Eteleno, kua kau masau i loku sausau, o liligi kia latou loku mafaia.

¹⁴ E kau fakaliliu loa a koe ko se toafa, ko se nea fakalumaluma ki puleaga ala e nonofo i lou takatakai, mo latou fuli ala e fakalaka i ou tafa.

¹⁵ E ke soko loa ko se nea nukinukii, mo se nea fakalumaluma, mo se faifaitakiaga ti mo se nea fakaii ki puleaga fuli ala e takatakai ia a koe, mo ka kau fakasoko loa kiate koe aku fakamaauaga i se sausau lasi mo ni valoki mamafa, - ko au, le Eteleno, leia e masau, -

¹⁶ E kau laku loa kia latou a gasau veveli o le oge, ala e soli ia le mate, ala e kau kakau ia mai loa ke maumaui ia koutou ; talie e kau toe tuku loa le oge ke fakalasi ai okoutou mamae, ti e kau fatii loa kia koutou le laakau o le pane.

¹⁷ E kau kakau loa kia koutou le oge mo manu fekai, ala e tamate ia loa akoutou fanau ; e ano loa le masaki mo le toto i loto malie o ou ; ti e kau kakau mai loa kiate koe le seleta. Ko au, le Eteleno, leia e folafola.