Esekiele 47 - Tosi Tapu

Na mapuna se liua i le fale tapu

¹ Na toe aumai loa e ia au ki le matapa o le fale tapu. Ti ko leinei, na i ai se vai leia na mapuna i le uluaga o le fale tapu, i le potu esite, talie ko le tamua o le fale tapu na agaaga ki le potu esite ; na tafe le vai i le fetuu atamai o le fale tapu, ki le potu saute o le aletale.

² Na taki loa e ia au i le ala o le matapa noleto, ti na fakafoli loa e ia au i fafo o kaku ki le matapa esite. Ti ko leinei, na tafe le vai i le fetuu atamai o le matapa lena.

³ Na saele loa le tagata o ano fakaaga ki le esite ; ti na too loa e ia i lona lima se afo ti na fua loa e ia ni meta e kau lelau lima. Ti na taki loa e ia au ki loto malie o le vai, ti na kaku loa le vai ki oku fatuvae.

⁴ Na toe fua loa e ia ni meta e kau lelau lima, ti na toe taki loa e ia au ki loto malie o le vai, ti na kaku loa le vai ki oku tuli. Na toe fua loa e ia ni meta e kau lelau lima, ti na toe taki loa e ia au ki loto malie o le vai, ti na kaku loa le vai ki loku sulugalava.

⁵ Na toe fua loa e ia ni meta e kau lelau lima, kae kua liliu a ia ko se vaitafe, leia na leaise mafai ke kau fakalaka ai, talie na loloto ai le vai ti na tonu ke kakau i ai ; ko se vaitafe leia na leaise feala ke fakalaka i ai.

⁶ Na pati mai loa a ia kiate au : Pe kua ke tio, vosa o le tagata ? Ti na toe aumai loa e ia au ki le laugutu o le vaitafe.

⁷ I le oki o lana aumai au ki le laugutu o le vaitafe, ko leinei, na i ai i le laugutu o le vaitafe ni laakau mauke ai.

⁸ Na pati mai loa a ia kiate au : E tafe loa le vai leinei ki le fenua o le potu esite, o ifo ki le toafa, o tau ki le tai ; ti ka kaku loa le vaitafe ki le tai, e fakamauli loa e ia a vai o le tai.

⁹ Ko nea fuli ala e taugaoi e mauli loa i ganea fuli ala e tafe ai loa le vaitafe, ti e i ai loa ni ika mauke ai ; talie ko le ganea leia e tau ki ai le vai leinei e mauli loa, ti e mauli loa a nea fuli i ganea fuli ala e tau loa ki ai le vaitafe leinei.

¹⁰ E tutuu loa ni kau fai feua i ona laugutu ; i Ene-Keti o kaku ki Ene-Ekalaimi, e fola loa i ai ni kupega ; ti e i ai loa ni ika kesekese, ofaipe ika o le moana, ti e lotou lasi loa.

¹¹ Kae e leaise mauli loa a pela mo nipu i le mata tai, talie e tiaki loa latou ki le patai.

¹² I laugutu o le vaitafe e sosomo ai loa a laakau fua kesekese. Ti e leaise toe gini loa olatou lau ti e leaise toe gato loa lalatou fua. E leleu loa a fua o laakau i masina fuli, talie e fakavai loa latou e le vai leia e ifo i le fale tapu. Ti e kai loa a fua o laakau, kae faitoo loa ki olatou lau.

Ko koiga o le fenua

¹³ E folafola le Aliki, le Eteleno, o pati : Ko nei a koiga o le fenua leia e kotou vae loa ko le tofiga o faasiga e kau agafulu tupu lua o Iselaele. E maua loa e Sosefo ni vaega e lua.

¹⁴ E kotou vae fakatatau loa le fenua ia koutou ; talie na kau fakapapau o siki loku lima, ke kau soli le fenua leinei ki okoutou tamana. Koia e soli atu loa le fenua leinei kia koutou ko lokoutou tofiga.

¹⁵ Ko nei a koiga o le fenua. I le potu noleto, e kamata le koiga i le tai Metitelanea, o ifo i le ala o Eteloni o kaku ki Setate,

¹⁶ mo Amati, mo Pelota, mo Sipalaimi, ala e tuu i le vasa o le koiga o Tamaso mo Amati, o kaku ki Atesele-Atikone i le koiga mo Avalani ;

¹⁷ ti e kamata loa le koiga lena i le tai Metitelanea, o au i Atesale-Enoni, i le koiga o Tamaso, mo Tesafoni i le potu noleto, mo le koiga o Amati : Ko le koiga lena o le potu noleto.

¹⁸ Ko le koiga o le potu esite ko le Solotane i le vasa o Avalani mo Tamaso ti mo Kalaate, ti mo le fenua o Iselaele ; e kotou fua loa i le koiga i le noleto o kaku ki le tai Mate i le potu esite : ko le koiga loa lena o le potu esite.

¹⁹ Ko le potu saute, e kamata loa le koiga i Tamale o kaku ki vai o Melipa i Katesi, o ano fakaloaloa i le vaitafe o Esipito o kaku ki le tai Metitelanea ; ko lena le koiga o le potu saute.

²⁰ Ko le koiga uesite, ko le tai Metitelanea, i le koiga o le potu saute o kaku ki Amati i le potu noleto. Ko lena le koiga o le potu uesite.

²¹ E kotou vae loa le fenua lena ia koutou, o mulimuli ki faasiga o Iselaele.

²² E kotou vaevae loa a ia ko lokoutou tofiga o mulimuli ki le toso, kia koutou mo matapule ala e nonofo i loto malie o koutou, ala e maua ia loa ni alatou fanau i loto malie o koutou ; e kotou tio loa kia latou ofaipe ni kakai totonu o le fenua o fanau o Iselaele ; e lotou vaevae loa mo koutou le tofiga o mulimuli ki le toso, i loto malie o faasiga o Iselaele.

²³ E kotou soli loa ki le matapule lona tofiga i le faasiga leia e nofo ai loa a ia, e pati le Aliki, le Eteleno.