Esekiele 46 - Tosi Tapu

Fakatotonu ki le tausi o le fale tapu

¹ E folafola le Aliki, le Eteleno, o pati : E mapono loa le matapa o le malae loto, i le fetuu esite, i aso e ono ala e gaoi ai ; kae e fakamavaa loa a ia i le aso o le sapato, ti e toe fakamavaa foki a ia i le aso o le masina foou.

² E ulu mai loa le tama aliki i le malae ki fafo o ano ki le kogafale loto, ti e tuu loa a ia i tafa o pou o le matapa ; e momoli loa e tagata faisakilifisio lana failaulau mo ana sakilifisio fakafetai ; ti e fai loa e ia lana su i le uluaga o le matapa, ti toe ulu loa a ia ki fafo, ti e leaise tapono loa le matapa i mua o le afiafi.

³ E atolasio loa le kakai o le fenua ki le Eteleno i le uluaga o le matapa lena, i aso sapato mo masina foou.

⁴ Ko le failaulau leia e momoli loa e le tama aliki ki le Eteleno i le aso o le sapato, e fai loa ki ni akeno lee mele e ono mo se ovi tagata lee mele ;

⁵ Ti ko lana moliga nea kai, ko le efa e tasi ki le ovi tagata e tasi, mo le nea leia e loto a ia ki ai ki akeno, mo se ini lolo e tasi i le efa e tasi.

⁶ I le aso o le masina foou, e momoli loa e ia se pipi tagata muli, mo ni akeno lee mele e ono, mo se ovi tagata lee mele ;

⁷ ti ko lana moliga nea kai, ko se efa e tasi ki le pipi tagata, mo se efa e tasi ki le ovi tagata, mo le nea leia e loto a ia ki ai ki akeno, mo se ini lolo e tasi i le efa e tasi.

⁸ Ka ulu loa le tama aliki ki loto, e ulu loa a ia i le kogafale o le matapa, ti e toe ulu loa a ia ki fafo i le ala lena.

⁹ Kae i le aso leia e tuu ai loa le kakai o le fenua i mua o le Eteleno, i aso lalasi, ko le tagata leia e ulu loa i le matapa noleto, ke atolasio ki le Eteleno, e ulu loa ki fafo i le matapa saute, ti ko le tagata leia e ulu loa ki loto i le matapa saute e ulu loa ki fafo i le matapa noleto ; e leaise tonu loa ke toe liliu i le matapa leia na ulu ai ki loto, kae ke ulu loa ki fafo i le matapa leia e tautonu mo ia.

¹⁰ E ulu loa le tui ki loto mo latou i le temi leia e lotou ulu ai, ti e toe ulu loa a ia ki fafo i le temi leia e lotou ulu ai loa ki fafo.

¹¹ I aso lalasi mo aso fakatasi, ko le moliga ko le efa e tasi i le pipi tagata e tasi, ko le efa e tasi i le ovi tagata e tasi, mo le nea leia e loto loa a ia ki ai ki akeno, mo le ini lolo loa e tasi i le efa e tasi.

¹² Kapau e momoli loa e le tama aliki ki le Eteleno sana failaulau i lona loto malie pe ko se sakilifisio fakafetai i lona loto malie, e fakamavaa loa kiate ia le matapa i le fetuu esite, ti e momoli loa e ia lana failaulau mo lana sakilifisio fakafetai ofaipe lana fai masani i le aso o le sapato ; ti ka oki a ia ti toe ulu loa a ia ki fafo ; ti e toe tapono loa le matapa i le oki o lana ulu ki fafo.

¹³ E ke momoli loa i le aso taki tasi se failaulau ki le Eteleno ko se akeno fetuu tasi, mo lee mele ; e ke momoli loa a ia i usu fuli.

¹⁴ E ke teki loa ki le failaulau se moliga nea kai i usu fuli : ko le vaega ono o le efa, mo le vaega tolu o le ini lolo, ke lusi ai le falina. Ko se moliga nea kai lena ki le Eteleno, ti e tonu ke mulimuli tuumau ki ona lao.

¹⁵ E momoli loa ki le Eteleno i usu fuli le akeno, mo le moliga nea kai, mo le lolo : Ko se failaulau lena e tonu ke fai tuumau.

Ko le tofiga o vosa o le Tui

¹⁶ E folafola le Aliki, le Eteleno, o pati : Kapau e fai loa e le tama aliki ki se tasi o ona vosa se nea alofa i lona tofiga, e maua loa le nea alofa lena e le vosa lena mo ana fanau, ti e liliu loa le kele lena ko lolatou tofiga.

¹⁷ Kae kapau e fai loa e ia ki se tasi o ana tagata fakasausau se nea alofa ko se kele leia na too i lona tofiga, e maua loa le nea alofa lena e le tagata fakasausau o kaku ki le fetuu o lona lauateaina, ti e toe liliu loa le kele lena ki le tui ; e gato tasi loa ki ona vosa totonu ala e feala ke maua ia le kele lena na too i lona tofiga.

¹⁸ E leaise too loa e le tama aliki se nea i le tofiga o le kakai, ti e leaise fakamativa loa e ia le kakai i olatou kele ; ko le nea leia e soli loa e ia ko se tofiga ki ona vosa, e too loa e ia a ia i ona koloa, o tupu ke aua na kapu se tasi i loku kakai i lona tofiga.

¹⁹ Na taki loa e ia au i le uluaga leia na tuu i tafa o le matapa, ki kogafale tapu ala na tuku ki tagata faisakilifisio, i le fetuu noleto. Ti ko leinei, na i ai se ganea i muli, i le fetuu uesite.

²⁰ Na pati mai loa a ia kiate au : Ko le ganea leinei e fakamoso ai loa e tagata faisakilifisio a inati o sakilifisio fakamolemole o agasala ti mo sala, ti e lotou fakamoso loa i ai a moliga, o tupu ke aua na ave a inati ki le malae tafa ti ke aua na fakamaokioki le kakai e ni nea taputapu.

²¹ Na taki loa e ia au ki le malae ki fafo, ti na ave loa e ia au ki tifi e fa o le malae. Ti ko leinei, na i ai se ga lotoa i le tifi taki tasi o le malae.

²² I tifi e fa o le malae na i ai loa ni ga lotoa liliki i lalo o ni aleso, ti na lotou tatau fuli, ko lona loa ko meta e kau lua, ti ko lona laulasi ko meta e kau agafulu tupu lima.

²³ Na takatakai le lotoa taki tasi e se paa ti na fakatuu i le paa taki tasi se ganea tafu afi.

²⁴ Na pati mai loa a ia kiate au : Ko fale kuka ana, ala e fakamoso ai loa e tagata fakasausau o le fale tapu a inati o failaulau ala e fai loa e le kakai.