Esekiele 44 - Tosi Tapu

Ko tagata fakasausau a le Atua

¹ Na toe aumai loa e ia au ki le matapa o le fale tapu, leia e agaaga ki le potu esite. Kae na mapono a ia.

² Ti na pati mai loa le Eteleno kiate au : E mapono loa le matapa leinei, e leaise toe mavaa loa a ia, ti e leaise toe ano loa i ai se tasi ; o tupu kua ulu i ai le Eteleno, le Atua o Iselaele. E tuu mapono loa a ia.

³ Kua tuku a ia ki le tama aliki, e feala loa ke kai i ai le tama aliki, i lona uiga tagata faisakilifisio, le pane i mua o le Eteleno ; kae e ulu mai loa a ia i le ala o le kogafale ulu o le matapa, ti e toe mavae loa a ia i le ala lena.

⁴ Na taki loa e ia au ki le matapa o le potu noleto, i mua o le fale tapu. Na kau tio, ti ko leinei, na fakaapele e le kololia o le Eteleno le fale o le Eteleno. Ti na kau fakamapee loa ki lalo o fakatau oku mata ki le kele.

⁵ Ti na pati mai loa le Eteleno kiate au : Vosa o le tagata, tokaga lasi lou loto, ti tio ou mata, ti fakalogo ou taliga ki nea fuli ala e kau fakasa atu loa kiate koe o uiga mo fakatotonu fuli o le fale o le Eteleno mo ona lao fuli. Ti ke tokaga lasi ki le uluaga o le fale tapu mo ona ala fuli ki fafo.

⁶ Ti ke pati loa ki le kau agatuu, ki le fale o Iselaele : E folafola le Aliki, le Eteleno, o pati : Kua feauga akoutou nea fakalialia fuli, fale o Iselaele !

⁷ Talie kua kotou fakaulu ki loto o loku sagatualio ni kau matapule lee silikosisio i le loto ti lee silikosisio i le kanofi, ke kelekele ai loku fale ; ti kua kotou momoli laku pane, le gako mo le toto, ki akoutou nea fakalialia fuli, ti kua kotou motusi laku sai.

⁸ Na leaise kotou fai le tausi o loku sagatualio, kae na kotou tuku ke lotou fetogi koutou i le fai o le tausi i loku fale tapu.

Le kau faisakilifisio o le fale tapu foou

⁹ Koia e folafola le Aliki, le Eteleno, o pati : E leaise ulu loa ki loku sagatualio se matapule e tasi, leia e lee silikosisio i lona loto ti e lee silikosisio i lona tino, io, e leaise ulu loa se matapule e tasi ia latou ala e nonofo i loto malie o fanau o Iselaele.

¹⁰ Ti ko le kau levita, ala na fakamamao iate au, i le temi leia na sese ai Iselaele iate au, o mulimuli i ona taulaatua, e amo ia loa le veli o lalatou agaveli.

¹¹ E lotou nonofo loa i loku fale tapu ofaipe ni tagata fakasausau, ti e lotou leoleo loa a matapa o le fale tapu ti e lotou fai loa le tausi i le fale tapu. E lotou tamate loa ki le kakai a manu o failaulau mo sakilifisio, ti e lotou tutuu loa i mua o le kakai o fakasausau kia latou.

¹² O tupu na lotou tausi ki le kakai i mua o taulaatua, ti na lotou fakavilo le fale o Iselaele ki le agasala, e pati le Aliki, le Eteleno : E kau siki loa loku lima kia latou, ke lotou amo le veli o lalatou agaveli.

¹³ E leaise lotou fakafeofi mai loa kiate au o tausi kiate au i le tuulaga fakapelepitelo, ti e leaise lotou fakafeofi loa ki oku sagatualio, mo oku ganea taputapu ; e lotou amo loa le veli o lalatou agaveli mo nea fakalialia ala na lotou fai.

¹⁴ E kau tuku loa kia latou le leoleo o le fale tapu, ti e lotou fai loa lona tausi katoa mo nea fuli ala e tonu ke fai i ai.

¹⁵ Kae ko le kau faisakilifisio, le kau levita, vosa o Satoke, ala na fai ia le tausi o loku fale tapu i le temi leia na sese ai fanau o Iselaele o mamao iate au, e fakafeofi mai loa kiate au o tausi kiate au, ti e lotou tutuu loa i oku mua o momoli mai kiate au le gako mo le toto, e pati le Aliki, le Eteleno.

¹⁶ E lotou ulu loa ki loku sagatualio, ti e lotou fakafeofi mai loa ki loku laupapa o tausi kiate au, io, e lotou tausi loa kiate au.

¹⁷ Ka lotou fakalaka loa i matapa o le malae loto, e lotou tui loa ni teu tetea ; e leaise lotou tui loa se teu leia na fai ki se fului manu, mo ka e lotou fai loa le tausi i matapa o le malae loto mo le fale tapu.

¹⁸ E lotou teki loa ki olatou ulu ni puloga kie tetea, ti e lotou tui loa ni vavae tetea ; e leaise lotou tui loa ni teu ke tupu ai lolatou kavakavaia.

¹⁹ Ti ka lotou ulu loa o ano ki le malae fafo ki le kakai, e lotou tatala loa a teu ala na lotou fai ai le tausi, ti e lotou tuku loa latou i ni kogafale o le fale tapu ; e lotou toe tui loa ni iki ake a teu, o tupu ke aua na maokioki le kakai i lalatou lave ki teu.

²⁰ E leaise lotou tele loa olatou ulu, ti e leaise lotou tuku loa olatou ulu ke loloa ; kae e tonu ke lotou koti latou.

²¹ E leaise inu loa e se tagata faisakilifisio se vino mo ka ulu a ia ki le malae loto.

²² E leaise lotou avaga loa mo se fafine lokonui, pe ko se fafine leia na kapu e lona avaga, kae e lotou avaga loa mo ni taine taupoou o le fale o Iselaele ; e feala foki ke lotou avaga mo se fafine lokonui, avaga o se tagata faisakilifisio.

²³ E lotou ako loa loku kakai ke poto i le fakakesekese o le nea leia e maokioki mo le nea leia e fakamalama, ti e lotou fakasa loa ki le kakai le nea leia e mea mo le nea leia e kelekele.

²⁴ E lotou tui fakamaau loa i nea ala e visi, ti e lotou fakamaaui loa o mulimuli ki aku lao. E lotou tausi loa aku lao ti mo aku fakatotonu i oku aso lalasi fuli, ti e lotou tokaga loa ke fakaapaapa ki oku sapato.

²⁵ E leaise ano loa le tagata faisakilifisio ki se mate, talie na kelekele a ia i lana ano ki le mate ; koi mafai ke fakakelekele loa a ia mo kapau ko lona tamana leia e mate, pe ko lona tinana, pe ko se tasi o ana fanau, pe ko se tasi i ona fetaina, pe ko se tuagaane leia e leikiaise avaga.

²⁶ I le oki o lona fakamea, e nofo loa a ia i aso e fitu, e leaise tausi loa a ia i le fale tapu.

²⁷ I le aso leia e ulu ai loa a ia ki le fale tapu, ki le malae loto, o fai le tausi i le fale tapu, e momoli loa e ia le sakilifisio ke fakamolemole ai kiate ia, e pati le Aliki, le Eteleno.

²⁸ Ko leinei le tofiga leia e lotou maua loa : Ko au totonu ko lolatou tofiga. E leaise kotou soli loa kia latou se tofiga i Iselaele : Ko au totonu ko lolatou tofiga.

²⁹ E lotou kai loa i moliga, mo sakilifisio ki agasala, mo failaulau ki le faisala ; ti e lotou maua loa a nea fuli ala e momoli mai loa kiate au i Iselaele.

³⁰ E maua loa e le kau faisakilifisio a uluaki fua o laakau fuli, mo moliga fuli e kotou fai mai loa kiate au ; ti e kotou soli loa ki le kau faisakilifisio a uluaki vaega o lakoutou falina kua lusi, o tupu ke ifo le tapuakina ki okoutou fale.

³¹ E leaise kai loa e tagata faisakilifisio se manu lele pe ko se manu masaki, pe ko se manu na tamate e se tasi a manu.