Esekiele 43 - Tosi Tapu

Le fale tapu na apele i le kololia o le Eteleno

¹ Na taki loa e ia au ki le matapa, ki le matapa leia na tuu i le potu esite.

² Ti ko leinei, na au le kololia o le Atua o Iselaele i le potu esite. Na tatau lona leo mo le gugulu o vai lalasi, ti na gigila le malama nei i lona kololia.

³ Ko le nea lena na kau tio ki ai na tatau mo leia na kau tio ki ai i le aso leia na kau au ai ke maumaui le kolo ; ti na tatau le nea lena mo leia na kau tio ki ai i tafa o le vaitafe o Kepale. Ti na kau fakavilo loa ki lalo o fakatau oku mata ki le kele.

⁴ Ti na ulu loa le kololia o le Eteleno ki le fale tapu i le matapa leia na tuu i le potu esite.

⁵ Ti na too loa au e le Laumalie o ave ki le malae loto. Ti ko leinei, kua apele le fale tapu i le kololia o le Eteleno.

⁶ Na kau logo loa ki se tasi leia na masau mai kiate au i le fale tapu, ti na tuu se tagata i oku tafa.

⁷ Na pati mai loa a ia kiate au : Vosa o le tagata, ko leinei le ganea o loku ekeekeaga fakasau, le ganea leia e kau teki ai loa oku taga vae ; e kau nofo loa i ai o lee gato i loto malie o fanau o Iselaele. E leaise toe fakakelekele loa e le fale o Iselaele mo ona sau loku suafa maokioki ki alatou nea fakalialia mo mate o olatou sau i olatou ganea taualuga.

⁸ Na fakatuu e sau a uluaga mo matapa o olatou fale sau i tafa fua o uluaga mo matapa o loku fale tapu ; ti ko se paa fuai leia na vae ia loku fale tapu mo olatou fale. Na lotou fakakelekele loa i ai loku suafa maokioki ki alatou nea fakalialia, koia na kau tamate ai latou i loku sausau.

⁹ I le aso nei, e lotou fakamamao loa iate au alatou nea fakalialia mo mate o olatou sau, ti e kau nofo loa i loto malie o latou o lee gato.

¹⁰ Ko koe, vosa o le tagata, fakasa le fale tapu leinei ki le fale o Iselaele ; ke lotou tio ki lona paaki, ti ke lotou fakasemala ki alatou agasala.

¹¹ Kapau e lotou fakasemala ki alatou agatuu, ti ke fakailo loa kia latou le paaki o le fale tapu leinei, lona fakatuutuu, mo ona katupa, mo ona uluaga, mo ona paaki fuli, mo ona fakatuutuu fuli ; io, ona paaki fuli mo ona lao. Tuku ki olatou mata a paaki kesekese fuli, o tupu ke lotou taupau ona paaki fuli mo ona fakatotonu fuli, ti ke lotou mulimuli katoa ki ai i lona fai.

¹² Ko lena le lao o le fale. I le tumutumu o le mauga, e maokioki loa le ganea katoa leia e tonu ke fakatuu ai a ia. Ko lena le lao o le fale.

Ko le aletale o failaulau ; ko moliga

¹³ Ko nei a fuafua o le aletale, leia na fai ki le fua na satimeta kau lima. Ko lona vae na satimeta kau lima lona taualuga, ti na kau lima lona laulasi. Ko le tapa fakatali i le takatakai na satimeta kau lima lona taualuga, ti na satimeta kau lima lona laulasi ; ti mo se tala i le takatakai leia na satimeta kau lua lona taualuga.

¹⁴ I le vae i le kele o kaku ki lalo o le uluaki laui aletale na meta katoa, ti na satimeta kau lima lona laulasi. I le laui aletale ikiiki ki le laui aletale lasi na meta lua, ti na satimeta kau lima lona laulasi.

¹⁵ Na meta lua le aletale ; ti na tuu ona tala e fa i ona tifi e fa.

¹⁶ Na tapa fa tatau le laui aletale leia na tafu ai le afi : na meta ono lona loa, ti meta ono lona laulasi.

¹⁷ Na tapa fa tatau foki le laui aletale lasi, o meta fitu lona loa ti meta fitu lona laulasi. Ti ko lona tapatapa fakatali i le takatakai na satimeta kau lua tupu lima lona taualuga, ti ko lona matai lava na satimeta kau lima. Ti na pale ki ai i ni fa takakega i le fetuu esite.

¹⁸ Na pati mai loa a ia kiate au : Vosa o le tagata : E folafola le Aliki, le Eteleno, o pati : Ko nei a lao o le aletale, i le aso leia e fakatuu ai loa a ia, o tupu ke momoli ai a failaulau ti ke liligi ai le toto o vikitima.

¹⁹ E pati le Aliki, le Eteleno : E ke soli loa se pipi tagata muli ki tagata faisakilifisio, ki le kau levita, latou ala e kau i le sakoga o Satoke, talie ko latou fai ala na kau fakataga ke fai ia le tausi kiate au. Ti e lotou momoli loa se sakilifisio ki le fakamolemole o agasala.

²⁰ E ke too loa lona toto, ti e ke takai loa ki ai a tala e fa o le aletale, mo ona tifi e fa, mo lona tapa fakatali i le takatakai katoa. E ke fakamea loa i ai le aletale ti e ke fakatapu loa a ia.

²¹ E ke too loa le pipi tagata o le sakilifisio ki le agasala, ti e tutu loa a ia i se ganea leia kua teuteu ki ai i fafo o le fale tapu.

²² I le lua aso, e ke momoli loa ki le fakamolemole o agasala se koti tagata lee mele ; e fakamea loa i ai le aletale, ofaipe lona fakamea ki le pipi tagata.

²³ I le oki loa o lau fai le fakamea, e ke momoli loa se pipi tagata muli lee mele mo se koti lee mele.

²⁴ E ke momoli loa a manu ana i mua o le Eteleno ; e laku loa e tagata faisakilifisio se patai ki manu ana, ti e lotou momoli loa latou ko se failaulau ki le Eteleno.

²⁵ I le lolotoga o ni aso e fitu, e ke momoli loa i aso taki tasi se koti tagata ko se vikitima ki agasala. E toe momoli loa se pipi tagata muli mo se ovi tagata i le kau manu, ti e tonu ke lee mele a manu ana.

²⁶ I le lolotoga o ni aso e fitu, e fai loa le sakilifisio o le fakamolemole o agasala mo le fakamea o le aletale, ti e fakatapui loa i ai le aletale.

²⁷ Ka oki loa a aso ana, ti e kamata loa i le valu o aso o sosolo mai ai, e momoli loa e le kau faisakilifisio i le aletale akoutou failaulau mo akoutou sakilifisio fakafetai. Ti e kau loto malie loa kia koutou, e pati le Aliki, le Eteleno.