Esekiele 42 - Tosi Tapu

Ko kogafale o nea taputapu

¹ Na ave loa e ia au ki fafo o le fale tapu, ki le malae ki fafo i le fetuu noleto, ti na taki loa e ia au ki kogafale ala na agaaga ki le potu lauatea ti mo le fale i muli o le fale tapu.

² Ko le fale lena i le potu noleto na meta kau lima lona loa ti kau lua tupu lima lona laulasi.

³ I le tasi fetuu na agaaga le fale lena ki le potu lauatea leia na takatakai ia le fale tapu i ni meta e kau agafulu ; i le tasi fetuu na kaku a ia ki le faliki o le malae ki fafo. Na tuu ona kogafale i lau fata e tolu.

⁴ I mua o kogafale, i le fetuu ki le malae loto na i ai se ala, ko lona laulasi ko meta e lima ti ko lona loa ko meta e kau lima. Na ulu a ia ki le fale lena i le potu noleto.

⁵ Ko kogafale o lau fata na lau liliki ake i kogafale lalo o tupu na kai e le ala le lau fata loto mo le lau fata aluga.

⁶ Na fesiliaki a lau fata e tolu, kae na leai ni pou, ofaipe pou o le malae ki fafo ; koia leia na kamata lau lalasi a kogafale i le kele ti kaku atu ki loto mo aluga kua lotou lau liliki.

⁷ I le fetuu o le malae ki fafo, na meta kau lua tupu lima le loa o le kaua fafo leia na agaaga ki kogafale,

⁸ talie ko le loa o kogafale ana ki le fetuu o le malae tafa na meta kau lua tupu lima. Kae ki le fetuu ki le fale tapu, na meta kau lima.

⁹ I lalo o kogafale ana, i le fetuu esite o le fale, na i ai se uluaga kia latou ala na au i le malae fafo.

¹⁰ Na i ai foki ni kogafale i aluga o le kaua o le malae i le fetuu esite, o agaaga ki le potu lauatea mo le fale tapu.

¹¹ Na i ai foki se ala i mua o kogafale ana. Na tatau a fuafua o kogafale ana mo kogafale o le potu noleto, olatou loloa, mo olatou laulasi, mo olatou fakatuutuu, mo olatou matapa, mo olatou katupa.

¹² Na toe fenaaki foki mo matapa o kogafale o le fetuu saute. Na i ai foki se matapa i mua o le ala, o aga ki le paa o le potu esite leia e puipui ia le sagatualio.

¹³ Na pati mai loa a ia kiate au : Ko kogafale o le noleto mo kogafale o le saute, ala e mavaa ki le potu lauatea, ko kogafale tapu ; i kogafale ana, ko tagata faisakilifisio ala e fakafeofi ki le sagatualio o le Eteleno e kai ia loa i ai a nea taputapu, ti e lotou tuku loa i ai a nea taputapu, a moliga, mo manu o sakilifisio kesekese ki le fakamolemole o agasala ti mo le fakamalie ; talie e maokioki le ganea lena.

¹⁴ Ka ulu loa a tagata faisakilifisio ki loto, e leaise mafai loa ke lotou mavae i le fale tapu o ulu ki le malae tafa. E tonu ke lotou tuku a teu ala na lotou tui ke fai ai le tausi i kogafale ana, talie e maokioki a teu ana ; e lotou tui loa ni iki ake a teu i ai i mua o lalatou ano ki le kakai.

Ko fuafua o le paa ki tafa

¹⁵ I le oki o le fua e le tagata o le fale loto, na taki loa e ia a au ki fafo i le matapa o le fetuu esite, ti na fua loa e ia le malae leia na takatakai ia le fale tapu.

¹⁶ Na fua loa e ia le fetuu esite ki le fa u, ti na maua loa e ia ko le kilometa e tasi vaelua.

¹⁷ Na fua loa e ia le fetuu ki le noleto ki le fa u, ti na maua loa e ia ko le kilometa e tasi vaelua.

¹⁸ Na fua loa e ia le fetuu ki le saute ki le fa u, ti na maua loa e ia ko le kilometa e tasi vaelua.

¹⁹ Na mafuli loa a ia ki le potu uesite, o fua, ti na maua loa e ia ko le kilometa e tasi vaelua.

²⁰ Na fua loa e ia a fetuu e fa o le kaua leia na takatakai ia le malae o le fale tapu ; ko lona loa ko le kilometa e tasi vaelua, ti ko lona laulasi ko le kilometa e tasi vaelua ; ko le kaua lena na vae ia le potu tapu i le potu fakamalama.