Esekiele 41 - Tosi Tapu

Ko loto o le fale tapu

¹ Ti na taki loa e ia a au ki le fale tapu. Ti na fua loa e ia a paa i tafatafa o le ala loto, ti na maua loa e ia ko meta e tolu lona matotolu.

² Na meta lima le laulasi o le matapa, ti na meta lua vaelua i leia fetuu ki leia fetuu. Na fua loa e ia le loa o le kogafale lasi lena, ti na maua loa e ia ni meta e kau lua i lona loa ti mo meta e kau agafulu i lona laulasi.

³ Ti na ulu loa a ia ki le kogafale muli. Ti na fua loa e ia lona uluaga ; ti na meta tasi lona loloto kae meta tolu lona laulasi, ti na meta tolu vaelua le matotolu o paa i fetuu.

⁴ Na fua loa e ia le kogafale totonu, ti na maua loa e ia ni meta e kau agafulu i lona loa, mo meta e kau agafulu i lona laulasi ; ti na pati mai loa a ia kiate au : Ko leinei le potu taputapu.

⁵ Na fua loa e ia le paa loto o le fale tapu, ti na maua loa e ia ni meta e tolu i lona matotolu. Na i ai ni kogafale i le tafatafa katoa o le fale tapu, na meta lua le laulasi o le kogafale e tasi.

⁶ Na tuu a kogafale i ni lau fata e tolu, ti na i ai ni kogafale e kau tolu i le lau fata e tasi ; na ulu le kogafale taki tasi i le paa ki fafo kae na leaise ulu loa a ia i le paa o le fale tapu totonu.

⁷ Na fakaano ke lau lalasi ake a kogafale mo ka pale ki lau fata, kae na fakaano ke maninifi a paa, ti na pale ki fata i se kakega takamilomilo ; talie na pale se kakega takamilomilo i le takatakai o le fale tapu. Koia na feala ke pale fakasako ki le lau fata loto mo le lau fata aluga.

⁸ Na kau fakatokagai loa ko lau fata ala na takatakai ia le fale na komo ki aluga i ni meta e tolu.

⁹ Na meta lua vaelua le matotolu o paa o lau fata. Koia na i ai loa se potu lauatea i le vasa o kogafale fata ala na pipiki ki le fale tapu,

¹⁰ Mo la ake kogafale i tafatafa, leia na meta kau agafulu, i le takatakai o le fale tapu.

¹¹ Na ulu i kogafale ala na takatakai ia le fale tapu ki le potu lauatea lena, i ni matapa e lua : ko le tasi i le potu noleto, mo le tasi i le potu saute ; ti na meta lua vaelua le laulasi o le potu lauatea lena.

¹² I le potu uesite o le fale tapu, na tuu ai se fale o agaaga ki le potu lauatea lena. Na meta kau fa tupu lima lona loa, ti na meta kau tolu tupu lima lona laulasi. Ti na meta lua vaelua le matotolu o ona paa.

¹³ Ti na fua loa e le tagata le fale tapu ti na maua loa e ia ko meta e kau lima i lona loa. Ti ko le loa o le potu lauatea, mo le fale leia na tuu i le potu uesite, mo ona paa, na meta kau lima.

¹⁴ Ti na meta kau lima le laulasi o le tamua o le fale i le potu lauatea ki le potu esite.

¹⁵ Ti na toe fua foki e le tagata le loa o le fale leia na tuu i muli o le fale tapu. Ti na maua e ia ko meta e kau lima, o fakatasi mo mavaa o leia fetuu mo leia fetuu.

Ko loto o le fale tapu

¹⁶ Ko le kogafale ulu, mo le kogafale lasi mo le kogafale ki muli na aofi ki le papa, ti na toe tatau foki mo katupa mo kogafale o lau fata e tolu. Na aofi papa a nea fuli, i le kele o kaku ki katupa. Ti na aofi foki a katupa totonu ki le papa.

¹⁷ I fafo mo loto o le fale tapu, i le matapa ulu o kaku ki le kogafale i muli, na teuteui a paa fuli,

¹⁸ Ki ni paaki togi o ni kau selupino mo ni lau palemie. Na fakavasa e laui palemie a selupino. Na maua e le selupino taki tasi ni mata e lua :

¹⁹ Ko se mata o le tagata, leia na tio ki se laui palemie i se tasi fetuu, mo se mata o le laione, leia na tio ki se laui palemie i se tasi fetuu. Na liuliuga a paaki ana i le paa takatakai katoa o le fale tapu.

²⁰ Na togi a selupino mo laui palemie i paa i lalo o kaku ki aluga o matapa.

²¹ Na tapa fa tatau a pou o le fale tapu. I mua o le potu taputapu na feala ke tio ki se nea leia na faipe se aletale.

²² Ti na fai le aletale lena ki le laakau, ti ko lona taualuga ko le meta e tasi vaelua, ti ko lona loa ko le meta e tasi. Ti na toe fai foki ki le laakau ona tifi, mo ona vae, mo ona fetuu. Ti na pati mai loa le tagata kiate au : Ko leinei le laupapa leia e tuu i mua o le Eteleno.

²³ Na ulu loa ki le kogafale lasi i se matapa, ti mo le sagatualio i se tasi matapa.

²⁴ Na maua e matapa ana ni laui matapa e lua taki tasi, ala na sufegi.

²⁵ I matapa o le kogafale lasi na paaki ai ni selupino mo ni lau palemie o tatau mo paa. I fafo mo mua o le kogafale ulu na i ai se ga fakaseketalaa papa.

²⁶ I paa o le kogafale ulu, na i ai ni katupa ukamea vagavaga mo ni paaki o ni lau palemie.