Esekiele 40 - Tosi Tapu

Fale tapu i le temi ki muli

¹ I le fetuu kau lua tupu lima o lomatou popula, i le kamataaga o le fetuu, i le aso kau agafulu o le masina, i lona kau agafulu tupu fa fetuu i le oki o le maumaui o le kolo, i le aso totonu lena, na teki loa le lima o le Eteleno kiate au, ti na ave loa au e le Laumalie ki le fenua o Iselaele.

² Na ave loa e ia au ki ai i ni tio fakaatua, ti na tuku loa e ia au i le tumutumu o se mauga taualuga lasi ai, leia na tuu ai, i le potu saute, se nea leia na faipe se kolo leia e laga.

³ Na taki loa e ia a au ki ai ; ti ko leinei, na i ai se tagata, leia na gigila o tatau mo le sila ; ti na too e ia i lona lima se afo tea, mo se fa u ke fua ai, ti na tuu a ia i le matapa.

⁴ Ti na pati mai loa le tagata lena kiate au : Vosa o le tagata, tio ou mata, ti fakalogo ou taliga, ti tokaga fakamalielie lou loto ki nea fuli ala e kau fakasa loa kiate koe, talie na aumai a koe ki leinei o tupu ke kau fakasa kiate koe a nea anei. E ke fakasa loa ki le fale o Iselaele a nea fuli ala ka ke tio loa ki ai.

Le malae mo ona matapa ki tafa

⁵ Ti ko leinei, na i ai se kaua leia na takatakai ia le fale i ona fetuu fuli. Ti na i ai i le lima o le tagata se fa u meta tolu ke fuafua ai. Ti na fua loa e ia le matotolu o le kaua leia na meta tolu, mo le taualuga, leia na meta tolu.

⁶ Ti na ano loa a ia ki le matapa o le potu esite, ti na pale loa a ia i lona takakega. Ti na fua loa e ia le uluaki uluaga o le matapa, leia na meta tolu, ti mo le tasi ake uluaga, leia na meta tolu.

⁷ Ko kogafale leo taki tasi, ala na feagaaki i tafatafa o le uluaga, na meta tolu lona loa ti ma meta tolu lona laulasi. Ko paa, ala na vae ia a kogafale, na matotolu meta lua vaelua. Ti na i ai se uluaga meta tolu i mua o le kogafale leia na tuu i mua o le fale tapu.

⁸ Ti na fua loa e le tagata le kogafale loto lena, ti ma meta fa lona loloto, kae meta tasi le matotolu o ona paa fafo,

⁹ I loto o le matapa, ko le kogafale lena na ofi oki ki le fale tapu.

¹⁰ Ko kogafale leo e ono o le matapa o le potu esite na tatau fuli : Na tuu a kogafale e tolu i le tasi fetuu ti na tolu i le tasi fetuu o le ala loto. Ti na matotolu tatau a paa fuli ala na vae ia latou.

¹¹ Na toe fua foki e le tagata le laulasi o le ganea leia e feala ke fakamavaa ai le matapa, ti na maua e ia ni meta e lima. Na meta ono vaelua le laulasi o le ala loto.

¹² I mua o kogafale leo, ala na taki meta tolu lona loa mo lona laulasi, na i ai se a leia na vaelua meta lona taualuga, i fetuu taki tasi o le ala loto.

¹³ Ti na fua loa e le tagata le vasa i le paa o le kogafale o leia ake fetuu o le ala loto ki le paa o le kogafale o leia ake fetuu ; ti na maua loa e ia ni meta e kau agafulu tupu lua vaelua.

¹⁴ Ti na fua foki e ia le laulasi o le kogafale, leia na meta kau agafulu. Na takatakai e le malae o le fale tapu le kogafale lena.

¹⁵ I le uluaki uluaga i le kaua fafo o le matapa o kaku ki le paa o le kogafale, na meta kau lua tupu lima.

¹⁶ Na i ai ni katupa ukamea vagavaga i paa tafa o kogafale, i paa ala e vae ia a kogafale ti mo paa o le kogafale ; na ano fakalaulasi ki loto a katupa ana, ti na i ai foki ni iki i le takatakai o le matapa ; ti na paaki ni laui palemie i paa loto.

¹⁷ Na taki loa au e le tagata ki le malae ki fafo, leia na faliki ki ni fatu ta, ti na takatakai e kogafale e kau tolu.

¹⁸ Na ano le faliki fatu lena i tafatafa o matapa fuli, ti mo ganea fuli na lauatea. Na taulalo ake le malae lena i le malae loto.

¹⁹ Ti na fua loa e ia le vasa i le matapa o le malae ki fafo o kaku ki le paa o le malae loto ; ti na maua loa e ia ni meta e kau lima. Ti na toe fai loa e ia le nea lena i le potu esite mo le potu noleto.

²⁰ Ti na fua loa e ia le loa mo le laulasi o le matapa o le potu noleto leia e taki ia ki le malae ki fafo.

²¹ Na maua e ia ni kogafale leo e ono, o tolu i le tasi fetuu o le ala loto ti tolu i le tasi fetuu. Ti na tatau ona paa mo ona kogafale mo la o le uluaki matapa. Ko le loa katoa o le matapa ko meta e kau lua tupu lima ti ko lona laulasi ko meta e kau agafulu tupu lua vaelua.

²² Ko le kogafale, mo katupa, mo laui palemie fakateuteu, na tatau oki mo la o le matapa o le potu esite. Na pale i le matapa lena o le potu noleto i fa takakega e fitu, ki le kogafale.

²³ I mua o le matapa o le potu noleto, na i ai se matapa leia na ulu ki le malae loto, ofaipe le matapa o le potu esite. Ti na fua loa e le tagata i leia matapa ki leia matapa, ti na maua loa e ia ni meta e kau lima.

²⁴ Na taki loa e ia au ki le fetuu saute, ti na kau tio loa i ai ki se tasi matapa. Na fua loa e ia a kogafale leo, mo paa, mo le kogafale, ti na tatau a ia mo le matapa o le esite mo leia o le noleto.

²⁵ I lena foki, na i ai ni katupa i le takatakai o le matapa mo le kogafale. Na lotou tatau oki mo la o le potu esite mo la o le potu noleto. Ko le loa katoa o le matapa ko meta e kau lua tupu lima, ti ko lona laulasi ko meta e kau agafulu tupu lua mo le vaelua.

²⁶ Ti na pale ki ai i ni fa takakega e fitu, o tau ki le kogafale lasi ; ti na tuu ni laui palemie fakateuteu i paa, i fetuu e lua o le ala loto.

²⁷ I mua o le matapa lena na i ai se tasi ake matapa leia na mavaa ki le malae loto. Ti na fua loa e le tagata le vasa o matapa ana e lua o le potu saute, ti na maua loa e ia ko meta e kau lima.

Le malae mo matapa loto

²⁸ Ti na taki loa au e le tagata ki le malae loto i le matapa o le potu saute. Ti na fua loa e ia le matapa lena ti na tatau ona fuafua mo matapa o le kaua ki fafo.

²⁹ Na tatau a kogafale leo, mo paa, mo le kogafale, mo la ake matapa. Na i ai ni katupa i le takatakai o le kogafale. Ti ko le loa katoa o le kogafale ko meta e kau lua tupu lima, ti ko le laulasi ko meta e kau agafulu tupu lua mo le vaelua.

³⁰ Ti na tuu a kogafale i tafatafa o le ala loto, leia na meta kau agafulu tupu lua mo le vaelua lona loa ti meta lua vaelua lona laulasi.

³¹ Na mavaa le kogafale ki le malae ki fafo. Ti na tuu i paa loto ni laui palemie fakateuteu. Ti na pale ki ai i ni fa takakega e valu.

³² Ti na taki loa e ia a au ki le malae loto, i le matapa o le potu esite. Ti na fua loa e ia le matapa, ti na tio loa a ia na tatau a ia mo la ake matapa i mua.

³³ Ko kogafale leo, mo paa, mo le kogafale na tatau oki mo la ake matapa. Na i ai foki ni katupa i tafatafa o le matapa mo le kogafale. Ko le loa o le kogafale ko meta e kau lua tupu lima ti ko le laulasi o le kogafale ko meta e kau agafulu tupu lua mo le vaelua.

³⁴ Na mavaa le kogafale ki le malae ki fafo. Ti na togi i paa loto, i fetuu o le ala loto, ni lau palemie fakateuteu, ti na pale ki ai i ni fa takakega e valu.

³⁵ Ti na taki loa e ia au ki le matapa o le potu noleto. Na fua loa e ia a ia, ti na tatau a ia mo la ake matapa.

³⁶ Na i ai ni kogafale leo, mo ni paa, mo le kogafale, mo ni katupa i le paa takatakai o kogafale. Ko le loa o le kogafale ko meta e kau lua tupu lima ti ko lona laulasi ko meta e kau agafulu tupu lua mo le vaelua.

³⁷ Na mavaa le kogafale ki le malae ki fafo ; ti na tuu i paa loto, i leia fetuu mo leia fetuu o le ala loto, ni lau palemie fakateuteu, ti na pale ki ai i ni fa takakega e valu.

³⁸ Na i ai se kogafale na mavaa ki le kogafale o le matapa o le potu noleto ; ko le ganea lena na fakamea ai a manu ala na momoli i failaulau.

³⁹ I potupotu e lua o le kogafale na tuu ai ni laupapa e lua. Ti na tamate i ai a manu ala na momoli i failaulau : a failaulau mo sakilifisio kesekese ki le fakamolemole o agasala.

⁴⁰ I fafo o le kogafale lena na tuu ai foki ni iki laupapa e fa, o lua i le tasi fetuu, ti lua i le tasi fetuu mo ka ano fakaaga ki le matapa o le potu noleto.

⁴¹ Koia na tuu i le matapa ni laupapa e fa ki le tasi fetuu, ti fa ki leia fetuu, o fakatasi fuli ko laupapa e valu, ke tamate ai a manu o failaulau.

⁴² Ko laupapa e fa ala na fakaaoga ki le teuteui o failaulau, na fau ki ni fatu ta, ti na tatau lona loa mo lona laulasi, ko satimeta e kau fitu tupu lima, ti na satimeta kau lima lona taualuga ; na teki ki ai a nea gaoi ala na aoga ki le teuteui o manu ki failaulau mo la ake sakilifisio.

⁴³ Ti na fai foki i le tapatapa o laupapa ni ga matai lava na satimeta valu lona laulasi, ke fakatali ai le toto. Na teki loa a inati o failaulau i laupapa ana.

⁴⁴ Ti na ave loa au e le tagata ki le malae loto. Na i ai ni kogafale e lua i le ganea lena : Na tuu le tasi kogafale i tafa o le matapa noleto, o agaaga ki le potu saute, ti na tuu leia ake i tafa o le matapa saute, o agaaga ki le potu noleto.

⁴⁵ Ti na pati mai loa le tagata kiate au : Ko le kogafale lena e agaaga ki le potu saute, ko le kogafale a ia ki tagata faisakilifisio ala e tausi i le fale tapu ;

⁴⁶ Ti ko le kogafale leia e agaaga ki le potu noleto, ko le kogafale a ia ki tagata faisakilifisio ala e tausi ki le aletale. I vosa fuli o Levi, e gato loa ki vosa o Satoke ala e feala loa ke ulu ki le sagatualio o fai le tausi.

⁴⁷ Ti na fua loa e ia le malae loto, leia na tapa fa tatau, meta kau lima lona loa, ti meta kau lima lona laulasi. Ti na tuu le aletale i mua o le fale tapu.

⁴⁸ Ti na taki loa e ia a au ki le kogafale leia e ulu ki le fale tapu. Ti na fua loa e ia a pou o le matapa ; ti na meta lua vaelua le matotolu o le fa pou e tasi, kae na meta fitu le laulasi o le matapa. Na meta tasi vaelua le matotolu o paa o fetuu.

⁴⁹ Ti na meta kau agafulu le loa o le kogafale ti na meta lima vaelua lona laulasi. Na pale ki ai i ni fa takakega e kau agafulu. Na teu e ni fa pou lalasi e lua le matapa, o tasi i le tasi fetuu, ti tasi i le tasi fetuu.