Esekiele 4 - Tosi Tapu

Ko le taui o Selusalemi

¹ Ti ko koe, vosa o le tagata, too se fa piliki, ti ke tuku a ia i ou mua, ti e ke paaki loa i ai se kolo, Selusalemi.

² Ke ke paaki a ia e lolotoga taui, ti ke fai ni mumuniaga, ke fakatuu ni palepale tau ki ai, ke takatakai a ia ki se nofoaga solia, ti ke takatakai a ia ki ni fana.

³ Ke ke too se laui ukamea, ti ke fakatuu a ia ofaipe se kaua ukamea i vasa o ou mo le kolo ; ti ke fakaagaaga ki ai ou mata, ti e takatakai loa a ia, ti ko koe, e ke taui loa a ia. Ke soko le nea lena ko se fakamailoga ki le fale o Iselaele !

⁴ Ti e ke moe loa ki lou fetuu sema, ke tuku ki ai le agaveli o le fale o Iselaele, ti e ke amo loa lalatou agaveli i aso fuli ala e ke moe ai loa ki lou fetuu lena.

⁵ E kau lau loa kiate koe ni aso o fakatatau ki le lasi o fetuu o lalatou agaveli, ko ni aso e kau lelau tolu kau iva ; e ke amo loa i ai le agaveli o le fale o Iselaele.

⁶ Ka oki loa a aso ana, ti e ke moe loa ki le fetuu atamai, ti e ke amo loa le agaveli o le fale o Suta i aso e kau fa ; e kau fakamaua kiate koe se aso e tasi ki le fetuu e tasi.

⁷ E ke fakaagaaga loa ou mata mo lou lima fakatekateka ki Selusalemi leia kua taui, ti e ke kikite loa kiate ia.

⁸ Ti ko leinei, e kau saisai loa a koe ki ni maea, ke aua na feala ke ke femafuliaki, o kaku ki le katoa o aso ala e tonu ke ke nofo saisai ai.

⁹ Ke ke too se fulumeto, mo se olese, mo ni aliko, mo ni lenitili, mo se mile, mo se epote, ti ke ke tuku a nea ana ki se pesini, ti ke fai ki ai se pane o fakafeauga ki aso fuli ala e ke moe fakafetuu ai loa ; e ke kai loa a ia i aso e kau lelau tolu kau iva.

¹⁰ Ko le nea kai leia e ke kai loa ko fa sikele e kau lua i le aso ; e ke kai fakavaevae loa a ia i le aso katoa.

¹¹ Ko le vai leia e ke inu loa ko le ini e tasi i le aso, e ke inu fakavaevae loa a ia i le aso katoa.

¹² E ke kai loa ni kato olese, ala e ke fakamoso loa i olatou mua ki ni faikauga o tagata.

¹³ Ti na pati le Eteleno : E kai feneeki loa e fanau o Iselaele lalatou pane kelekele, i puleaga ala e kau kapu loa latou ki ai.

¹⁴ Na kau pati : Ei Aliki Eteleno, ko leinei, na leikiai fua se fakakelekele loku laumalie e se nea kelekele ; talu i loku ikiiki o kaku mai ki le lakaga leinei, na leikiaise kau kai fua ki se manu mate, pe na tamate e se tasi ake a manu, ti na leikiaise ulu fua se kanoi manu kelekele ki loku gutu.

¹⁵ Na tali mai a ia kiate au : Ko leinei, e kau soli atu kiate koe ni taei pipi ke fetogi ai a faikauga o tagata, ti e ke fakamoso loa lau pane ki ai.

¹⁶ Na toe pati mai a ia kiate au : Vosa o le tagata, ka kau fatii loa le laakau o le pane i Selusalemi ; e lotou kai loa le pane kua fuafua i le mamae, ti e lotou inu loa le vai kua fuafua i le mamae.

¹⁷ Talie e lotou mativa loa i le pane mo le vai, ti e lotou fetioaki noa loa i le i, ti e lotou masasaki loa o tupu ko alatou agasala.