Esekiele 39 - Tosi Tapu

Le fakamaui o Koke

¹ Ti ko koe, vosa o le tagata, kikite ki Koke ! E ke pati loa : E folafola le Aliki, le Eteleno, o pati : Ko leinei, e kau mamafa kiate koe Koke, Pule o Loseke, mo Meseke, mo Tupale !

² E kau toso loa a koe mei lou fenua, e kau taki loa a koe, E kau fakamavae loa a koe mei potupotu o le noleto, Ti e kau aumai loa a koe ki mauga o Iselaele.

³ E kau fatii loa lau gasau i lou lima sema, Ti e vivilo loa au gasau i lou lima atamai.

⁴ E ke mate loa i mauga o Iselaele, A koe mo au kau solia fuli, Ti mo kakai fuli ala e kau mo koe ; E kau soli loa a koe ko le nea kai a manu lele fekai fuli, Ti mo manu o faisaga.

⁵ E ke vilo loa i aluga o le kele, Talie na kau masau, e pati le Aliki, le Eteleno.

⁶ E kau kakau loa le afi ki Makoke, Ti mo latou ala e nonofo fimalie i atu motu ; Ti e lotou iloa loa ko au ko le Eteleno.

⁷ E kau fakasa loa loku suafa maokioki i loto malie o loku kakai ko Iselaele, Ti e leaise kau toe tuku loa ke fakakelekele loku suafa maokioki ; Ti e iloa loa e atu puleaga ko au ko le Eteleno, Ko le Maokioki o Iselaele.

⁸ Ko leinei, kua au a nea ana, kua lotou kaku mai, E pati le Aliki, le Eteleno ; Ko le aso leia na kau masau ki ai.

⁹ Ti e ulu loa ki fafo a kakai o kolo o Iselaele, E lotou tae loa ti e lotou tutu loa a masafu tau, A paletau liliki mo paletau lalasi, A kalolo mo gasau, A suki mo tao. E lotou tafu loa se afi ki nea ana i fetuu e fitu.

¹⁰ E leaise lotou too loa ni fafie i faisaga, Ti e leaise lotou tuuti loa ni fafie i vaomatua, Talie e lotou tafu loa a afi ki masafu. E lotou fakamativa loa latou ala na fakamativa ia latou, E lotou kaia loa latou ala na kaia ia latou ; E pati le Aliki, le Eteleno.

¹¹ I le aso lena, E kau soli loa ki Koke se ganea ke fai ai lona tanuma i Iselaele, Le vaivailiua o le kau fanoga, i le potu esite o le tai ; E tapono loa e le tanuma lena le ala ki le kau fanoga. Ko lena le ganea e tanu ai loa a Koke mo lona kakai api katoa, Ti e fakaigoa loa le vaivailiua lena ko le vaivailiua o le kakai toka api o Koke.

¹² E tanu loa latou e le fale o Iselaele, O tupu ke fakamea le fenua ; Ti e fai loa le nea lena i masina e fitu.

¹³ E tanu loa latou e le kakai katoa o le fenua, Ti e logologona loa le nea lena, I le aso leia e kau fakakololia ai loa, E pati le Aliki, le Eteleno.

¹⁴ E lotou filifili loa ni tagata ala e taka loa i le fenua, Ti e tanu ia loa, o tokoi ki ai le kakai fanoga, A tino ala na toe i aluga o le kele. E lotou fakamea loa le fenua, Ti e lotou fai loa le afa lena i masina katoa e fitu.

¹⁵ E lotou taka loa i le fenua ; Ti ka tio loa se tasi ia latou ki ni ivii tagata, E fakatuu loa e ia i ona tafa se fakamailoga, O kaku ki le au a le kau tanu mate, o ave a ivi o tanu I le vaivailiua o le kakai toka api o Koke.

¹⁶ E i ai loa mo se kolo e igoa ko Amona, Ko lona uiga kakai toka api. E fenaaki loa le fakamea o le fenua.

¹⁷ Ti ko koe, vosa o le tagata, e folafola le Aliki, le Eteleno, o pati : Pati ki manu lele, mo nea fuli ala e maua ia ni kapakau, Ti mo manu fuli o faisaga : Kotou fakatasi mai, kotou au, kotou fakatasi mei potu fuli, Ki le sakilifisio leia kua kau fai kia koutou, Ko se sakilifisio lasi ai i mauga o Iselaele ! E kotou kai loa le kanofi, ti e kotou inu loa le toto.

¹⁸ E kotou kai loa le kanofi o le kau toa, Ti e kotou inu loa le toto o le kau pule lalasi o le malama nei, Ala kua fetogi ia a ovi tagata, mo akeno, mo koti tagata, Mo pipi tagata ala na fakapepeti i Pasani.

¹⁹ E kotou kai loa le gako o kaku ki lokoutou makokona, Ti e kotou inu loa le toto o kaku ki lokotou konana, I le katoaga lena e kau fai loa kia koutou.

²⁰ E kotou makokona loa i loku laupapa i le kanofi o osi mo le kau ekeosi, I le kanofi o le kau toa mo kau tau fuli, E pati le Aliki, le Eteleno.

²¹ E kau fakasa loa loku kololia i lotolotoga o atu puleaga ; Ti e tio loa a atu puleaga fuli ki fakamaau ala e kau fai loa, Ti mo tautea ala e taai ai loa latou ki ai e loku lima.

²² E iloa loa e le fale o Iselaele ko au ko le Eteleno, lona Atua, Talu mei le aso lena o kaku ki le temi ka au.

²³ Ti e iloa loa e atu puleaga na tupu ko ana agasala Leia na ave ai le fale o Iselaele ki le popula, Na tupu ko ana agatuu kiate au ; Koia na kau fufu ai oku mata kia latou, Ti na kau tuku ai latou ki lima o le fili, O tupu ke lotou mamate fuli i le seleta.

²⁴ Na kau tautea latou o mulimuli ki alatou aga fakalialia mo alatou agasala, Ti na kau fufu kia latou oku mata.

Le toe laga o Iselaele

²⁵ Koia e folafola ai le Aliki, le Eteleno, o pati : I le aso nei e kau toe aumai loa le kau popula o Sakopo, E kau alofa loa ki le fale katoa o Iselaele, Ti e kau finenonofo loa ki loku suafa maokioki.

²⁶ Ti e lotou galoi loa lolatou luma, Ti mo agatuu fuli ala na lotou fai kiate au, I le temi leia na lotou nonofo ai i le fimalie i lolatou fenua, Ti na leaise tasi ke fakamamae ia latou.

²⁷ Ka kau toe aumai loa latou mei loto malie o atu puleaga, Ka kau fakatasi loa latou mei le fenua o le fili, E lotou fakasa loa loku maokioki i mua o ni puleaga mauke.

²⁸ Ti e lotou iloa loa ko au ko le Eteleno, lolatou Atua, Leia na ave ia latou o fakapopula i atu puleaga, Ti e toe fakatasi ia latou i lolatou fenua ; E leaise kau toe tuku loa se tasi ke nofo i atu puleaga,

²⁹ Ti e leaise kau toe fufu loa oku mata kia latou, Talie e kau liligi loa loku Laumalie ki le fale o Iselaele, E pati le Aliki, le Eteleno.