Esekiele 37 - Tosi Tapu

Le tio ki le vaivailiua o ivii tagata malo : Le toe mauli o Iselaele

¹ Na iate au loa le lima o le Eteleno, ti na ave loa au e le Laumalie o le Eteleno, o tuku ki loto malie o se vaivailiua leia na apele i ni ivii tagata.

² Na kakau loa e ia au ke ano o folii a ivi ; ti ko leinei, na lasi ai a ivi i fuga o le vaivailiua, ti kua lotou malo fuli.

³ Na pati mai loa a ia kiate au : Vosa o le tagata, pe feala loa ke toe mauli a ivi ana ? Na kau tali loa : Aliki Eteleno, e ke iloa le nea lena.

⁴ Na pati mai loa a ia kiate au : Kikite ki ivi ana, o pati kia latou : Ivi malolo, kotou fakalogo mai ki le folafola a le Eteleno !

⁵ E folafola le Aliki, le Eteleno, ki ivi ana : Ko leinei, e kau fakaulu loa kia koutou se laumalie ti e kotou mauli loa ;

⁶ E kau soli loa ni ua kia koutou, ti e kau fakasomo loa ia koutou se kanofi, ti e kau kofu loa koutou ki se kili, ti e kau tuku loa kia koutou se laumalie, ti e kotou mauli loa. Ti e kotou iloa loa ko au ko le Eteleno.

⁷ Na kau kikite loa, o mulimuli ki le fakatotonu leia na fai mai kiate au. I laku koi lolotoga masau, na i ai loa se logoa, ti ko leinei na fai loa se taugaoi, ti na fesosokoaki loa a ivi, o tasi pipiki ki lona tuuaga.

⁸ Na kau tio loa, ti ko leinei, na tupu ake loa kia latou ni ua, mo se kanofi, ti na ufiufi loa latou e se kili ; kae na leaise maua ia latou se laumalie.

⁹ Na pati mai loa a ia kiate au : Kikite, o masau ki le laumalie ! Kikite, vosa o le tagata, o pati ki le laumalie : E folafola le Aliki, le Eteleno, o pati : Laumalie, au i fetuu matagi e fa, agi ki mate anei, ti ke lotou toe mauli !

¹⁰ Na kau kikite o mulimuli ki le fakatotonu leia na tuku mai kiate au. Ti na ulu loa le laumalie kia latou, ti na lotou toe mauuli loa, ti na lotou toe tutuu loa i olatou vae ; ko se kau tau toka api ai.

¹¹ Na pati mai loa a ia kiate au : Vosa o le tagata, ko ivi anei ko le fale katoa o Iselaele. Ko leinei, e lotou pati : Kua malo omatou ivi, ti kua maumaui lamatou amanaki malie, ti kua motou puli noa !

¹² Kikite, o pati kia latou : E folafola le Aliki, le Eteleno, o pati : Ko leinei, ei loku kakai, e kau fakamavaa loa okoutou tanuma, ti e kau fakaulu loa koutou ki fafo i okoutou tanuma, ti e kau toe aumai loa koutou ki le fenua o Iselaele.

¹³ Ti e kotou iloa loa ko au ko le Eteleno, i le aso leia e kau fakamavaa ai loa okoutou tanuma, ti e kau fakaulu ai loa koutou ki fafo i okoutou tanuma, ei loku kakai !

¹⁴ E kau tuku loa loku Laumalie kia koutou, ti e kotou mauli loa ; e kau toe fakanofo loa koutou ki lokoutou fenua, ti e kotou iloa loa ko au le Eteleno, kua kau masau ti kua kau fai a ia, e pati le Eteleno.

¹⁵ Na tuku mai loa kiate au le folafola a le Eteleno, o pati :

¹⁶ Ti ko koe, vosa o le tagata, too se potu laakau, ti ke tosi i ai : Kia Suta mo fanau a Iselaele ala e kau mo ia. Too se tasi potu laakau, ti ke tosi i ai : Kia Sosefo, ko le laa o Efalaimi, mo le fale katoa o Iselaele leia e kau mo ia.

¹⁷ Ti ke fakasosoko fakatasi laua ko se laa e tasi, o tupu ke la soko o tasi i lou lima.

¹⁸ Ti ka e vesili atu loa a fanau o lou kakai kiate koe : Pe leaise ke fakamatala mai loa kia matou le uiga o le nea lena ?

¹⁹ Ti ke tali loa kia latou : E folafola le Aliki, le Eteleno, o pati : Ko leinei, e kau too loa le laakau o Sosefo leia e tuku i le lima o Efalaimi, mo faasiga o Iselaele ala e kau mo ia ; ti e kau fakapipiki loa latou ki le laakau o Suta, ti e kau fai loa latou ko se laakau e tasi, o tupu ke lotou liliu o tasi i loku lima.

²⁰ Ti ko laakau ala e ke tosi i ai, e ke too loa laua i lou lima, ke lotou tio ki ai.

²¹ Ti e ke pati loa kia latou : E folafola le Aliki, le Eteleno, o pati : Ko leinei, e kau too loa a fanau o Iselaele i loto malie o puleaga ala na lotou ano ki ai, ti e kau fakatasii loa latou i potu fuli, ti e kau aumai loa latou ki lolatou fenua.

²² E kau fakaliliu loa latou ko se puleaga e tasi i le fenua, i mauga o Iselaele ; ti e lotou maua fuli loa se sau e tasi, ti e leaise lotou toe nofo loa ko ni kakai e lua, ti e leaise lotou toe vaelua loa latou i ni puleaga e lua.

²³ E leaise lotou toe fakakelekele loa i olatou taulaatua, mo alatou aga fakalialia, mo alatou agaveli fuli. E kau too loa latou i potu fuli ala na lotou nonofo ai ti na lotou agasala ai, ti e kau fakamea loa latou. E lotou liliu loa ko loku kakai, ti e kau liliu loa ko lolatou Atua.

²⁴ E liliu loa laku tagata fakasausau ko Tavite ko lolatou sau, ti e lotou maua fuli loa se tagata tausi ovi e tasi. E lotou mulimuli loa ki aku fakatotonu, ti e lotou tausi loa aku lao ti mo fai loa latou.

²⁵ E lotou nofo loa i le fenua leia na kau soli ki laku tagata fakasausau ko Sakopo, ti na nofo ai okoutou tamana. E lotou nonofo loa i ai, latou, mo alatou fanau, ti mo fanau o alatou fanau, o lee gato ; ti e nofo loa laku tagata fakasausau ko Tavite ko lolatou sau o lee gato.

²⁶ E kau fai loa mo latou se sai o le tokamalie, ti e i ai loa se sai lee gato mo latou : e kau fakanofo loa latou i ai, ti e kau liuliuga loa latou, ti e kau fakatuu loa loku fale tapu i loto malie o latou ki le lee gato.

²⁷ E tuu loa loku nofoaga i lotolotoga o latou ; e kau nofo loa i ai ko lolatou Atua, ti ko latou ko loku kakai.

²⁸ Ti e iloa loa e atu puleaga ko au ko le Eteleno, ti kua kau fakatapui Iselaele, ke tausi kiate au, i le aso leia e toe fakatuu ai loa loku fale tapu i lotolotoga o latou o lee gato.