Esekiele 36 - Tosi Tapu

Ko le toe laga o Iselaele

¹ Ti ko koe, vosa o le tagata, kikite ki mauga o Iselaele ! E ke pati loa : Mauga o Iselaele, kotou fakalogo mai ki le folafola a le Eteleno !

² E folafola le Aliki, le Eteleno, o pati : O tupu kua pati le fili kia koutou : A ! a ! Kua liliu a potu taualuga anei ko lomatou kele talu mei mago !

³ Kikite, o pati : E folafola le Aliki, le Eteleno : Io, o tupu kua loto mei potu fuli ke maumaui koutou mo folo koutou, Ke kotou liliu ko le kele o ni puleaga kese, O tupu kua kotou liliu ko le nea gologolo mo lauveli a atu kakai,

⁴ Mauga o Iselaele, kotou fakalogo mai ki le folafola a le Aliki, le Eteleno ! E folafola le Aliki, le Eteleno, o pati : Ki mauga lalasi mo mauga liliki, Ki liua mo vaivailiua, Ki potu kua toafa mo kolo kua tiaki, Ala kua liliu ko le nea kai mo le nea gologolo Ki la ake puleaga i le takatakai ;

⁵ E folafola le Aliki, le Eteleno, o pati : Io, i le afi o loku finenonofo, E kau masau ki la ake puleaga ti mo Etome katoa, Ala na too ia loku fenua ma latou, I le fiafia katoa o lolatou loto mo lolatou vesia kiate ia, O tupu ke lotou kaia ona fua.

⁶ Koia kikite ki le fenua o Iselaele, Pati ki mauga lalasi mo mauga liliki, Ki liua mo vaivailiua : E folafola le Aliki, le Eteleno, o pati : Ko leinei, e kau masau i loku finenonofo mo loku sausau, Talie kua kotou amo le luma o atu puleaga.

⁷ Koia e folafola ai le Aliki, le Eteleno, o pati : E kau siki loku lima ! Ko puleaga ala e takatakai ia koutou Ala e amo ia loa lolatou luma.

⁸ Kae ko koutou, mauga o Iselaele, e tupu loa okoutou laa o lalasi, Ti e kotou amo loa ni fua ki loku kakai ko Iselaele ; Talie kua vave soko a nea ana.

⁹ Ko leinei, e kau tuku loa loku kalasia kia koutou, E kau tokaga loa kia koutou, Ke fakamaluu koutou mo to koutou.

¹⁰ E kau tuku loa kia koutou ni tagata o lasi ai, I le fale katoa o Iselaele. E toe nofoi loa a kolo, Ti e toe lagai loa le nea leia na maumaui.

¹¹ E kau liuliuga loa kia koutou a tagata mo manu ; E lotou liuliuga loa mo fanaunau loa ; E kau loto ke kotou nofo i le fenua ofaipe le temi mua, Ti e kau tapuaki loa kia koutou o lasi ake i le temi mua ; Ti e kotou iloa loa ko au ko le Eteleno.

¹² E kau fakasaele loa koutou i ganea fuli o le fenua, loku kakai ko Iselaele, Ti e kotou maua loa le fenua, Ti e liliu loa a ia ko lokoutou tofiga, Ti e leaise toe maumaui loa a ia.

¹³ E folafola le Aliki, le Eteleno, o pati : O tupu na pati atu kia koutou : Na ke kai ni tagata, Na ke maumaui lou puleaga totonu,

¹⁴ Io, o tupu ko le nea lena e leaise ke toe kai loa ni tagata, E leaise ke toe maumaui loa lou puleaga totonu, E pati le Aliki, le Eteleno.

¹⁵ E leaise ke toe logo loa ki lauveli a atu puleaga, Ti e leaise ke toe amo loa le luma o atu puleaga ; E leaise ke toe maumaui loa lou puleaga, e pati le Aliki, le Eteleno.

¹⁶ Na tuku mai loa kiate au le folafola a le Eteleno, o pati :

¹⁷ Vosa o le tagata, i le koi nofo a le fale o Iselaele, i lolatou fenua, na lotou fakakelekele a ia ki alatou aga mo alatou gaoi ; na fai kiate au alatou aga pe le kelekele o se fafine i lona masaki fakafafine.

¹⁸ Koia na kau liligi ai loku sausau kia latou, o tupu ko le toto leia na lotou aga o liligi i le fenua, mo taulaatua ala na lotou fakakelekele ai a ia.

¹⁹ Na kau veteki latou ki atu puleaga, ti na lotou mavetevete i fenua kesekese ; na kau fakamaaui latou o mulimuli ki alatou aga mo alatou gaoi.

²⁰ Na lotou kaku ki puleaga ala na lotou ano ki ai, ti na lotou fakakelekele loku suafa maokioki, o tupu ai le pati kia latou : Ko le kakai lena o le Eteleno, ti kua lotou mavae i lona fenua.

²¹ Ti na kau mamae ki loku suafa maokioki, leia na fakakelekele e le fale o Iselaele i puleaga ala na ano a ia ki ai.

²² Koia ke ke pati ki le fale o Iselaele : E folafola le Aliki, le Eteleno, o pati : E leaise kau fai a nea anei o tupu ko koutou, fale o Iselaele, kae tupu ko loku suafa maokioki, leia kua kotou aga o fakakelekele i puleaga ala na kotou ano ki ai.

²³ E kau fakamaokioki loa loku suafa lasi, leia na fakakelekele i lotolotoga o atu puleaga, leia na kotou aga o fakakelekele i loto malie o atu puleaga. Ti e iloa loa e atu puleaga ko au ko le Eteleno, e pati le Aliki, le Eteleno, i le aso leia e kotou fakamea ai loa loku suafa i olatou mua.

²⁴ E kau too loa koutou i loto malie o atu puleaga, ti e kau fakatasii loa koutou i fenua fuli, ti e kau aumai loa koutou ki lokoutou fenua.

²⁵ E kau liligi loa kia koutou se vai mea, ti e kotou mea loa ; e kau fakamea loa koutou i akoutou aga fakalialia fuli mo okoutou taulaatua fuli.

²⁶ E kau soli loa kia koutou se loto foou, ti e kau tuku loa kia koutou se laumalie foou ; e kau too loa ia koutou le mafu fatu, ti e kau tuku loa kia koutou se mafu kanofi.

²⁷ E kau tuku loa loku Laumalie kia koutou, ti e kau fakalotoi loa koutou ke kotou mulimuli i aku fakatotonu, ti ke kotou tausi mo fai aku lao.

²⁸ E kotou nonofo loa i le fenua leia na kau soli ki okoutou tamana ; ti e kotou liliu loa ko loku kakai, ti e kau liliu loa ko lokoutou Atua.

²⁹ E kau saofaki loa koutou i okoutou kelekele fuli. E kau fakamauli loa le fulumeto kia koutou, ti e kotou maua loa ni taukai lalasi ; ti e leaise kau toe aumai loa kia koutou le oge.

³⁰ E kau liuliuga loa a fua o laakau mo fua o faisaga, o tupu ke aua na kotou toe maua loa le luma o le oge i mua o atu puleaga.

³¹ I le aso lena e kotou manatui loa lokoutou mauli leia na veli, mo akoutou gaoi ala na leaise malilie ; ti e kotou fakalialia loa kia koutou totonu, o tupu ko akoutou agaveli mo akoutou aga fakalialia.

³² Ke kotou iloa, e leaise kau fai a nea anei, o tupu ko koutou, e pati le Aliki, le Eteleno ! Ke kotou luma ti ke kotou fakasemala ki akoutou aga, fale o Iselaele !

³³ E folafola le Aliki, le Eteleno, o pati : I le aso leia e kau fakamea ai loa koutou i akoutou agaveli fuli, e kau fakakakai loa a kolo, ti e toe lagai loa ki aluga a kolo ala na maumaui ;

³⁴ E toe gaoii loa le kele leia na maumaui, ti e leaise toe tio loa latou ala e fakalaka ki se kele leia na tiaki ;

³⁵ Ti e pati loa : Kua faipe se oloto o Eteni le kele leinei na maumaui ; ti kua toe fakamakeke mo toe nofoi a kolo anei na maumaui ti na titiaki.

³⁶ Ti e iloa loa e puleaga ala e nonofo loa i okoutou tafatafa ko au, le Eteleno, na kau toe fakatuu le nea leia na maumaui, ti na kau toe to ia le kele leia na tiaki. Ko au le Eteleno, kua kau masau, ti e kau fai loa a ia.

³⁷ E folafola le Aliki, le Eteleno, o pati : Ko leinei foki le tasi a nea leia e kau tuku ai loa le fale o Iselaele ke kalaga mai kiate au, ti e kau fai loa kia latou, o fakaliliu ona tagata ke api ofaipe manu o se kau manu.

³⁸ I aso lalasi, na apele Selusalemi i manu o sakilifisio, ala ko ni kau manu katoa. E toe apele tatau loa okoutou kolo ala na maumaui ko tagata. Ti e lotou iloa loa ko au ko le Eteleno.