Esekiele 35 - Tosi Tapu

Folafola kikite ki Seili

¹ Na tuku mai loa kiate au le folafola a le Eteleno, o pati :

² Vosa o le tagata, siki ou mata ki le mauga o Seili, Ti ke kikite kiate ia !

³ E ke pati loa kiate ia : E folafola le Aliki, le Eteleno, o pati : Ko leinei, e kau mamafa kiate koe, mauga o Seili ! E kau falo loku lima kiate koe, Ti e kau fakaliliu a koe ko se potu lavaki ti mo se toafa.

⁴ E kau maumaui loa ou kolo, E ke liliu loa ko se potu lavaki, Ti e ke iloa loa ko au ko le Eteleno.

⁵ O tupu na ke nofo fualoa mo lou vesia, O tupu na ke tamate ki le seleta a fanau a Iselaele, I le aso o lolatou mamae, I le aso leia na kaku ai le agaveli ki lona gatoaga,

⁶ E kau mauli, e pati le Aliki, le Eteleno, E kau tuku loa ke liligi lou toto, ti e tuli loa a koe e lou toto ; O tupu na leaise ke vesia ki le toto, E tuli loa a koe e le toto.

⁷ E kau fakaliliu loa le mauga o Seili ko se potu lavaki ti ko se toafa, Ti e kau tamate loa latou ala e ano i ai.

⁸ E kau fakaapele loa ki mate ona mauga ; I ou mauga liliki, mo ou vaivailiua, mo ou vanu fuli, E vivilo loa i ai latou fuli ala e tamate loa e le seleta.

⁹ E kau fakaliliu loa a koe ko se potu lavaki o lee gato, E leaise toe nofoi loa ou kolo, Ti e kotou iloa loa ko au ko le Eteleno.

¹⁰ O tupu na ke pati : Ko puleaga ana e lua o Iselaele mo Suta, ko fenua ana e lua, a aku loa laua, Ti e motou maua loa laua, Pe nofo foki le Eteleno i ai.

¹¹ E kau mauli ! e pati le Aliki, le Eteleno, E kau gaoi loa mo le ita ti mo le sausau Ala na ke fakasa i lou vesia kia laua ; Ti e kau sa loa a au i loto malie o laua Mo ka kau fakamaui loa a koe.

¹² E ke iloa loa ko au, le Eteleno, Na kau logo ki lauveli fuli Ala na ke fai ki mauga o Iselaele, O pati : Kua la maumau, Kua tuku mai laua ko se nea kai kia matou.

¹³ Na kotou malaga kiate au i akoutou masau, Na kotou liuliuga akoutou masau veli kiate au : Na kau logo.

¹⁴ Koia e folafola ai le Aliki, le Eteleno : I le aso leia e fiafia ai loa le fenua katoa, E kau fakaliliu loa a koe ko se fenua lavaki.

¹⁵ O tupu ko le fiafia leia na ke maua Talie kua maumau le tofiga o le fale o Iselaele, E kau fai fakatatau loa kiate koe ; E ke liliu loa ko se potu lavaki, mauga o Seili, A koe mo Etome katoa. Ti e lotou iloa loa ko au ko le Eteleno.