Esekiele 34 - Tosi Tapu

Fakamaau o le kau tausi manu agaveli.

¹ Na tuku mai loa kiate au le folafola a le Eteleno, o pati :

² Vosa o le tagata, kikite ki le kau tausi manu o Iselaele ! kikite, o pati kia latou, ki le kau tausi manu : E folafola le Aliki, le Eteleno, o pati : Malaia ki le kau tausi manu o Iselaele, latou ala e fagai ia latou totonu ! Pe leaise tonu ke fagai e le kau tausi manu le kau manu ?

³ Na kotou kai le gako, ti na kotou teu ki le fului akeno, ti na kotou tamate a manu pepeti, ti na leaise kotou fagai le kau ovi.

⁴ Na leaise kotou fakamakeke le ovi gaegae, ti mo faitoo le ovi masaki, ti mo sai le ovi lavea ; na leaise kotou aumai le ovi sese, ti mo afa mai le ovi puli noa ; kae na kotou pulei fakamakeke latou.

⁵ Na lotou mavetevete talie na leaise lotou maua se tagata tausi ovi ; na lotou liliu ko le nea kai a manu fuli o le vao, koia na lotou mavetevete ai.

⁶ E sese laku kau manu i aluga o mauga fuli, i aluga o mauga liliki, ti e mavetevete laku kau manu i le fenua katoa. E leaise tokaga se tasi kiate ia, ti e leaise afa a ia e se tasi.

⁷ Koia, kau tausi manu, kotou fakalogo mai ki le folafola a le Eteleno !

⁸ E pati le Aliki, le Eteleno : E kau mauli ! O tupu kua tuku aku ovi ki lima o le kau kaia, ti kua lotou liliu ko le nea kai a manu fuli o le vao, talie e leaise koi maua se tagata tausi ovi, ti e leaise koi tokaga aku tagata tausi manu ki aku ovi, talie kua lotou fagai fai latou totonu, kae e leaise lotou fagai fua aku ovi,

⁹ Koia, kau tausi manu, kotou fakalogo mai ki le folafola a le Eteleno !

¹⁰ E folafola le Aliki, le Eteleno, o pati : Ko leinei, e kau mamafa ki le kau tausi manu ! E kau toe too loa aku ovi i olatou lima, ti e leaise kau toe tuku loa aku ovi ke lotou fagai, ti e leaise lotou toe fagai loa latou totonu ; e kau saofaki loa aku ovi i olatou gutu, ti e leaise lotou toe liliu loa ko se nea kai kia latou.

Le tagata tausi manu o Iselaele

¹¹ Talie e folafola le Aliki, le Eteleno, o pati : Ko leinei, e kau tokaga totonu loa ki aku ovi, ti e kau lau loa latou.

¹² E kau tokaga loa o tanaki laku kau ovi ofaipe le fai a se tagata tausi manu mo ka tio a ia kua mavete katoa lana kau manu. E kau ano loa o afa mai aku ovi i ganea fuli ala na fakamavete latou ki ai, i le aso veli mo fakapouli.

¹³ E kau too mai loa latou i loto o atu puleaga, ti e kau fakatasii loa latou i fenua fuli, ti e kau aumai loa latou ki lolatou fenua ; e kau fagai loa latou i mauga o Iselaele, i tafatafa o liua, mo ganea apiapi fuli o le fenua.

¹⁴ E kau fagai loa latou i se faisaga malie, ti e tuu loa olatou nofoaga i mauga taualuga o Iselaele ; i ganea ana, e lotou malolo loa i se maloloaga malie, ti e lotou maua loa ni faisaga mutie sesega malie i mauga o Iselaele.

¹⁵ Ko au leia e fagai ia loa aku ovi, ti ko au leia e fakamalolo ia loa latou, e pati le Aliki, le Eteleno.

¹⁶ E kau afa loa le ovi leia na puli noa, ti e kau aumai loa leia na sese, ti e kau sai loa le lavea o leia na lavea, ti e kau fakamakeke loa leia na masaki. Kae e kau maumaui loa a ovi ala e pepeti mo makeke. E kau taupau loa latou i le faitotonu.

¹⁷ Ti ko koutou ko aku ovi, e folafola le Aliki, le Eteleno, o pati : Ko leinei, e kau fakamaaui loa a ovi o le kau manu, a ovi tagata mo koti tagata.

¹⁸ Kolea e leaise fia kai ai a iki o koutou i le faisaga malie tukupau ? Kolea e lotou takatakafi fakaveliveli ai le mutie leia e toe ? Pe leaise feauga kia koutou le maua o se vai mea ke inu ? Kolea e kotou fakafufu ai ki okoutou vae le nea leia na leaise kotou inu ?

¹⁹ Ti e tonu ke kai e aku ovi le mutie leia na kotou takatakafi fakaveliveli, ti ke lotou inu le vai leia na kotou fakafufu.

²⁰ Koia e folafola le Aliki, le Eteleno, o pati : E kau fakamaaui loa a ovi pepeti mo ovi kakala o laku kau manu.

²¹ Talie na kotou aga o tule ki okoutou fetuu mo okoutou vae mua, ti na kotou aga o soka ki okoutou tala, a ovi gaegae, o kaku ki lakotou aga o kapu latou i le kau manu,

²² E kau au loa o saofaki aku ovi, o tupu ke aua na toe maua latou e ni tagata kaia, ti e kau fakamaaui loa le ovi mo le ovi.

²³ E kau tuku loa ki le ulu o laku kau manu se tausi manu e tasi, leia e poto loa i lona fagai, ti ko le tagata lena ko laku tagata fakasausau ko Tavite ; ko ia leia e fagai ia loa latou, ti e liliu loa a ia ko le tausi ovi maoki kia latou.

²⁴ Ti ko au, le Eteleno, e kau liliu loa ko lolatou Atua, ti e nofo loa laku tagata fakasausau ko Tavite ko le aliki ia latou. Ko au, le Eteleno, kua kau masau.

²⁵ E kau fai loa mo latou se sai o le tokamalie, ti e kau fakapuli loa i le fenua a manu fekai ; ti e nofo loa aku ovi i le fimalie i le toafa, ti e lotou momoe loa i loto o vaomatua.

²⁶ E kau fakaliliu loa latou mo potu ala e takatakai ia loku mauga taputapu ko se tapuakina ; ti e kau fakato loa le ua i lona temi totonu, ti ko se ua loa a ia o le tapuakina.

²⁷ E tuku loa e le laakau o faisaga lona fua, ti e soli loa e le kele ona fua. E fimalie loa aku ovi i lolatou fenua ; ti e lotou iloa loa ko au ko le Eteleno, i le aso leia e kau motusi ai loa a sai o lolatou popula, ti e kau saofaki ai loa latou i le lima o latou ala e fakamakeke kia latou.

²⁸ E leaise toe kaia loa latou e atu puleaga, ti e leaise toe sae loa latou e manu o le fenua, ti e lotou mauli fimalie loa, ti e leaise toe fakamamae loa latou e se tasi.

²⁹ E kau fakatuu loa kia latou se faisaga laakau leia e logologona loa ; ti e leaise toe pakupaku loa aku ovi i le fenua, ti e leaise lotou toe amo loa le luma o puleaga.

³⁰ Ti e lotou iloa loa ko au, le Eteleno, lolatou Atua, e kau nofo mo latou, ti ko latou ko loku kakai, latou o le fale o Iselaele, e pati le Aliki, le Eteleno.

³¹ Ko koutou, ko aku ovi, ko ovi o loku lotoa, ko koutou ko ni tagata ; ko au, ko lokoutou Atua, e pati le Aliki, le Eteleno.