Esekiele 33 - Tosi Tapu

Ko le polofeta, ko se tagata leo i lona fenua

¹ Na tuku mai loa kiate au le folafola a le Eteleno, o pati :

² Vosa o le tagata, masau ki fanau o lou kakai, o pati kia latou : Ka kau aumai loa le seleta ki se fenua, ti e filifili loa e le kakai o le fenua lena se tagata i loto malie o ona, o fakanofo a ia ko se tagata leo,

³ Kapau e tio loa le tagata lena kua au le seleta ki le fenua, ti e pupusi loa e ia le fakatagi pupusi, ke valoki ai le kakai ;

⁴ ti kapau e leaise tokaga loa le tagata leia e logo loa ki le tagi o le fakatagi pupusi, ti e au loa le seleta o mautoka a ia, ti e vilo loa lona toto ki lona ulu.

⁵ Talie na logo a ia ki le tagi o le fakatagi pupusi, kae na leaise tui a ia, ti e vilo loa lona toto kiate ia ; kae kapau e tui loa a ia, e saofaki loa e ia lona laumalie.

⁶ Kapau e tio le tagata leo ki le au o le seleta, kae e leaise pupusi e ia le fakatagi pupusi ; kapau na leaise valoki le kakai, ti kapau e au le seleta o too le mauli o se tasi, e mate loa le tagata lena o tupu ko lana agaveli, kae e kau afa loa lona toto ki le tagata leo.

⁷ Ti ko koe, vosa o le tagata, na kau fakanofo a koe ko le tagata leo i le fale o Iselaele. E tonu ke ke fakalogo ki le folafola leia e mavae atu i loku gutu, ti ke ke valoki latou.

⁸ Kapau e kau pati ki le tagata agasala : Tagata agasala, e ke mate loa ! Kapau e leaise ke masau ke tafoki le tagata agasala i lona ala, e mate loa le tagata agasala lena i lana agasala, ti e kau afa loa lona toto kiate koe.

⁹ Kae kapau e ke valoki le tagata agasala ke tafoki i lona ala, kae e leaise tafoki a ia i ai, e mate loa a ia i lana agasala, ti ko koe, e ke saofaki loa lou laumalie.

¹⁰ Ti ko koe, vosa o le tagata, pati ki le fale o Iselaele : E kotou pati : Kua vilo kia matou amatou agaveli mo amatou agasala, koia leia kua motou gaegae ai ; pe feaki loa lamatou toe mauli ?

¹¹ Pati kia latou : E kau mauli ! e pati le Aliki, le Eteleno, ko le nea leia e kau loto ki ai, e leaise ko le mate o le tagata agasala, kae ke fetogi lona mauli ti ke mauli a ia. Kotou toe liliu mai, kotou toe liliu mai i lokoutou ala veli ; kolea e kotou mamate ai loa, fale o Iselaele ?

¹² Ti ko koe, vosa o le tagata, pati ki fanau o lou kakai : E leaise saofaki loa e le faitotonu a le tagata agatonu a ia i le aso o lana fai veli ; ti e leaise vilo loa le tagata agasala i lana agasala mo kapau e tafoki a ia i ai, ti e leaise mauli foki le tagata agatonu i lana faitotonu i le aso o lana fai veli.

¹³ Ti kapau e kau pati ki le tagata agatonu : E ke mauli loa, - kae kapau e fanaki loa a ia ki lana faitotonu ti fai loa e ia le agaveli, e galoi loa lona faitotonu katoa, ti e mate loa a ia o tupu ko le agaveli leia kua fai e ia.

¹⁴ Ti kapau e kau pati ki le tagata agaveli : E ke mate loa ! - kae kapau e tafoki loa a ia i lana agaveli, o fai le nea leia e totonu mo maoki,

¹⁵ Kapau e liufaki loa e ia le nea fakamaoki, ti e fakaliliu loa e ia le nea leia na kaia e ia, ti kapau e mulimuli loa a ia ki pelesepeto ala e soli ia le mauli, kae e leaise toe fai loa e ia le agaveli, e mauli loa a ia, kae e leaise mate loa a ia.

¹⁶ E galoi loa a agasala fuli ala na fai e ia ; kua fai loa e ia le faitotonu mo le maoki, e mauli loa a ia.

¹⁷ E pati a fanau o lou kakai : E leaise sako le ala o le Aliki. Ko lolatou ala leia e leaise sako.

¹⁸ Kapau e tafoki le tagata agatonu i lana faitotonu, o fai le agaveli, e mate loa a ia, o tupu ko le nea lena.

¹⁹ Ti kapau e tafoki le tagata agasala i lana agaveli, o fai le faitotonu mo le maoki, e mauli loa a ia, o tupu ko le nea lena.

²⁰ E kotou pati : E leaise sako le ala o le Aliki. E kau fakamaaui loa koutou taki toka tasi o mulimuli ki okoutou ala, fale o Iselaele !

Ko le tupuaga o le vilo o Selusalemi

²¹ I le fetuu kau agafulu tupu lua, i le aso lima o le masina kau agafulu o lomatou popula, na au se tagata leia na sola i Selusalemi, o pati mai kiate au : Kua vilo le kolo !

²² Na teki loa le lima o le Eteleno kiate au i le afiafi, i mua o le tau mai o le tagata lena na sola. I lana tau mai kiate au i le usu, na fakamavaa loa e le Eteleno loku gutu. Na mavaa loa loku gutu, ti na mafai loa laku masau.

²³ Ti na tuku mai loa le folafola a le Eteleno kiate au, o pati :

²⁴ Vosa o le tagata, e pati latou ala e nonofo i kolo maumau o le fenua o Iselaele : Na toka tasi Apalaamo, kae na maua e ia le fenua ; kia tatou anei kua toka api, kua soli mai le fenua kia tatou.

²⁵ Koia ke ke pati kia latou : E folafola le Aliki, le Eteleno, o pati : E kotou kai akoutou nea kai mo le toto, ti e kotou siki okoutou mata ki okoutou taulaatua, ti e kotou liligi le toto. Ti e kotou maua loa i ai le fenua !

²⁶ E kotou fanaki kia akoutou seleta, ti e kotou fai ni nea fakalialia, ti e kotou tasi ano ki le avaga o lona oloi. Ti e kotou maua loa i ai le fenua !

²⁷ Pati kia latou : E folafola le Aliki, le Eteleno, o pati : E kau mauli ! E tamate loa e le seleta latou ala e nonofo i kolo maumau ; ti e kau soli loa latou ala e nonofo i faisaga ke kai e manu ; ti e mamate loa i le taumasaki latou ala e nonofo i kolo tau mo ana.

²⁸ E kau fakaliliu loa le fenua o toafa ; ti e kau fakagato loa lona fia taualuga i lona makeke, ti e tuu noa loa a mauga o Iselaele, talie e leaise toe fakalaka loa i ai se tasi.

²⁹ Ti e lotou iloa loa ko au ko le Eteleno, i le aso leia e kau fakaliliu ai le fenua o lavaki mo toafa, o tupu ko nea fakalialia fuli ala na lotou fai.

³⁰ Ti ko koe, vosa o le tagata, ko leinei, e masau a fanau o lou kakai kiate koe i lalo o kaua mo mua o matapa o fale, ti e lotou femasauaki, le taina ki lona taina : Kotou au o fakalogo ki le folafola leia e au i le Eteleno !

³¹ Ti e lotou au toka api kiate koe, ti e tonatona loku kakai i ou mua ; e lotou fakalogo ki au folafola, kae e leaise lotou fai fuai latou, talie e kakata olatou gutu ki ai, ti e manumanu koloa olatou loto.

³² Ko leinei, e ke fai kia latou pe se tagata sua malie, leia e leo malie, ti e poto i le fai musika. E lotou fakalogo ki au masau, kae e leaise lotou fai fua latou.

³³ I le aso leia e soko ai loa a nea ana, ti kua lotou ofi fua ! e lotou iloa loa na i ai se polofeta i loto malie o latou.