Esekiele 32 - Tosi Tapu

Lua tagi laulau kia Falaone mo Esipito

¹ I le fetuu kau agafulu tupu lua, i le uluaki aso o le masina kau agafulu tupu lua, na tuku mai loa kiate au le folafola a le Eteleno, o pati :

² Vosa o le tagata, Fai se tagi laulau kia Falaone, sau o Esipito ! E ke pati loa kiate ia : Na ke faipe se laione muli i loto malie o atu puleaga ; Na ke faipe se kolokotile i atu tai, Na ke ano i loto o ou vaitafe, Na ke fakafufu olatou vai ki ou vae, Na ke fakapiau olatou galu.

³ Koia e folafola ai le Aliki, le Eteleno, o pati : E kau folasi loa loku kupega kiate koe, I se fakatasiga a ni kakai toka api, Ti e lotou toso loa a koe i loku kupega ki le mata tai.

⁴ E kau tiaki loa a koe i le kele, E kau ti loa a koe ki faisaga ; E kau aumai loa kiate koe a manu lele fuli o le lagi Ti e kau fagai loa a manu fuli o le kele kiate koe.

⁵ E kau tuku loa lou kanofi i aluga o mauga, Ti e kau fakaapele loa a vaivailiua ki ou toetoega.

⁶ E kau fakavai loa ki lou toto le fenua leia e ke kakau ai, O kaku ki mauga, Ti e apele loa a vanu fuli iate koe.

⁷ I le aso leia e kau tamate ai loa a koe, e kau uufi loa le lagi ki se kie, E fakapouli loa a fetuu, E kau tapono loa le laa ki ao, E leaise toe sa loa le malama o le masina.

⁸ E kau tamate loa o tupu ko koe a malama fuli o le lagi, Ti e kau liligi loa le fakapouli ki lou fenua, E pati le Aliki, le Eteleno.

⁹ E kau fakamamae loa le loto o ni kakai toka api, Mo ka kau fakasa loa lou maumau i atu puleaga, Ki ni fenua ala na leaise ke iloa.

¹⁰ E kau taai loa ki le ofolele lasi ni kakai mauke o tupu ko koe, Ti e lulu loa olatou sau i le i o tupu ko koe, Mo ka kau siki loa laku seleta i olatou mua ; E lotou lulu loa le tagata taki tasi o tupu ko lona mauli, I le aso o lou vilo.

¹¹ Talie e folafola le Aliki, le Eteleno, o pati : E oso loa le seleta a le sau o Papilone kiate koe.

¹² E kau tamate loa lou kakai toka api ki le seleta a ni tagata toa Ala ko ni tagata agamakeke i kakai fuli ; E lotou fakagato loa le fia nealasi o Esipito, Ti e maumaui loa lona kakai toka api.

¹³ E kau fakamate loa lana kau manu katoa i tafa o lona vaitafe lasi ; E leaise toe fakafufu loa a vai e le vae o le tagata, E leaise toe fakafufu loa latou e vae o manu.

¹⁴ E kau fakamalolo loa a vai i le aso a ia, Ti e kau fakatafe loa ona vaitafe ofaipe le lolo, E pati le Aliki, le Eteleno.

¹⁵ Ka kau fakaliliu loa le fenua o Esipito ko se toafa, Ti e too loa a nea fuli ala na maua e ia, Ka kau tautea loa latou fuli ala e nonofo i ai, E lotou iloa loa ko au ko le Eteleno.

¹⁶ Ko lena se tagi laulau leia e tonu ke sua ; E sua loa a ia e taineliki o atu puleaga ; E lotou sua loa a ia ki Esipito mo lona kakai katoa, E pati le Aliki, le Eteleno.

¹⁷ I le fetuu kau agafulu tupu lua, i le aso kau agafulu tupu lima o le masina, na tuku mai loa kiate au le folafola a le Eteleno, o pati :

¹⁸ Vosa o le tagata, Fai se tagi laulau ki le kakai api o Esipito, ti ke ti a ia ki le loloto o le kele, A ia mo taineliki o atu puleaga makeke, Ki potu loloto o le kele, Mo latou ala e ifo ki le popoko !

¹⁹ Ko ai e ke fakalaka ai i le fulumalie ? Ifo ki lalo, ti ke moe mo le kau lee silikosisio !

²⁰ E lotou vivilo loa mo latou ala na tamate e le seleta. Kua ta le seleta : Kotou ave Esipito mo lona kakai katoa !

²¹ E pati loa kiate ia le kau toa makeke Mo latou ala na tokoi kiate ia, I le nofoaga o le kau mate : Kua lotou ifo mai ki lalo nei, kua lotou momoe ia tatou, Le kau lee silikosisio lena, ala na tamate e le seleta.

²² I lena e i ai le sau o Asilia, mo lana kau solia katoa ; Ti e takatakai a ia e tanuma o lana kau solia ; Kua lotou mamate fuli, na lotou vivilo i le seleta.

²³ E tuu olatou tanuma i potu loloto o le popoko, Ti e takatakai lona tanuma e lana solia katoa ; Na lotou mamate fuli i le seleta, Latou ala na liligi ia le i i le fenua o le kau mauli.

²⁴ I lena e i ai Elame, mo lana solia katoa ; E takatakai lona tanuma e lana kau solia, Ala na tamate fuli e le seleta ; Kua lotou ifo fuli ki potu loloto o le kele, Latou ala na liligi ia le i i le fenua o le kau mauli ; Ti kua lotou amo ia lolatou luma kia latou ala kua ifo ki le popoko.

²⁵ Kua moe a ia mo lana solia katoa i le nofoaga o le kau mate, Ti kua takatakai lona tanuma e tanuma o lana kau solia, Ala na tamate fuli e le seleta. Kua lotou ifo fuli ki potu loloto o le kele, A kau pagani ana na liligi ia le i i le fenua o le kau mauli. Kua lotou luma i le fakatasi mo latou ala kua ifo ki le popoko. Io, kua tuku latou ki le kau mate.

²⁶ I lena e i ai Meseke, mo Tupale, mo ala kau solia katoa, Ti kua takatakai o la tanuma e tanuma o ala kau solia. Na tamate a kau pagani fuli ana e le seleta, O tupu na lotou liligi le i i le fenua o le kau mauli.

²⁷ Na leaise lotou momoe mo le kau toa, Latou ala kua vivilo mo le kau pagani. Kua lotou ifo ki le nofoaga o le kau mate mo alatou masafu tau, Kua lotou uluga ki alatou seleta, Kae teki alatou seleta i olatou fatafata ; O tupu na lotou liligi le i ki le kau toa i le fenua o le kau mauli.

²⁸ Ko koe foki, Esipito, e fatii loa a koe i loto malie o le kau pagani ; E ke moe loa mo latou ala na tamate e le seleta.

²⁹ I lena e i ai Etome, ona sau mo ona pule fuli, Ala na logo lolatou loto toa, na fakanonofo latou Mo latou ala na tamate e le seleta ; Kua lotou momoe mo le kau pagani, Mo latou ala kua ifo ki le popoko.

³⁰ I lena e i ai a pule fuli o le potu noleto, mo le kau Sitone fuli, Ala kua ifo ki le kau mate i le luma, Logo ai na lotou liligi le i o tupu ko lolatou makeke ; Kua momoe le kau pagani lena mo latou ala na tamate e le seleta, Ti kua lotou luma i le fakatasi mo latou ala kua ifo ki le popoko.

³¹ E tio loa Falaone kia latou, Ti e fiafia loa a ia mo lona kakai katoa, O tupu ko lona famili leia na tamate e le seleta mo lana solia katoa, E pati le Aliki, le Eteleno.

³² Talie e kau liligi loa le i ki le fenua o le kau mauli ; Ti e moe loa Falaone mo lona kakai api katoa i loto malie o le kau pagani, Mo latou ala na tamate e le seleta, E pati le Aliki, le Eteleno.